HƏZRƏT ƏLİ FATİMƏNİ QƏZƏBLƏNDİRİB? (böhtana cavab)

Описание: Əhli-sünnədən olan Rəşad qardaşımız guya şiə mənbələrində Həzrət Əlinin Fatiməni qəzəbləndirdiyinə dair hədislər nəql edildiyini iddia edir. O, bir rəvayəti nəql edərək, guya həmin “hədisin” Qumi, Məclisi, Səduq kimi şüə mühəddislərinin əsərlərində yazıldığını iddia edir. Üstəlik, deyir ki, guya şiə alimi Xoi həmin rəvayətlə bağlı Əlinin Fatiməni qəzəbləndirməsinə haqq qazandırmağa çalışıb.
Əslində isə qardaşımız izləyicilərinə yalan məlumat verir və açıq şəkildə şiələrə böhtan atır - rafizi ifadəsilə olsa da.
Belə ki, söylədiyi hədis Buxari və Muslimin əsərlərində Allah rəsulu dünyasını dəyişən zaman 7-8 yaşında olmuş Misvər bin Məhrəmədən nəql edilir. Bu hədisə şiələrin mötəbər kitablarında rast gəlinmir.
İddiaya rəğmən, bu hədis Məclisi tərəfindən “Biharül-ənvar” əsərində yalnız Buxaridən NƏQL ETME formasında rəvayət edilir və o, həmin hədisi açıq şəkildə rədd edir. Belə ki, hədisin sənədi - yəni ravilər silsiləsi şiələrə görə mötəbər hesab edilmir.
Rəşad qardaşımıza sual: bir müəllifin öz kitabında bir hədisi gətirib, onu rədd edirsə, onda iddia edilə bilərmi ki, filan müəllif də kitabında bu hədisi yazıb?
Hələ qədimdən böyük şiə alimləri, o cümlədən Şeyx Tusi özünün "Təlxis əş-şafi" əsərində, Şeyx Mufid özünün “Təshih əl-İ‘tiqad” və “əl-İrşad” əsərlərində, Şeyx Təbərsi özünün “Məcmə əl-Bəyan” təfsirində, Əllamə Hilli özünün “Təzkirətul-fuqəha” və “Minhəc əl-kəramə” əsərlərində hədisi qətiyyətlə inkar etmişlər.
Sözügedən uydurma hədisə bənzər rəvayəti Şeyx Səduq özünün “İləluş-şərayi” əsərində, cild 1, səhifə 185-də fərqli mətnlə nəql edib. Amma təəssüflər olsun ki, Rəşad qardaşımız tamamilə fəqli mətni təqdim edib, guya bu rəvayəti Şeyx Səduqun da nəql etdiyini bildirir.
Əvvəla qeyd edək ki, Şeyx Səduq hətta öz gətirdiyi hədisin belə səhih olduğunu iddia etməyib. Həmin rəvayətin isnadında İbn Əbi Müqdamın adı yer alır ki, məşhur şiə hədis alimi Əllamə Hilli onun barəsində “çox zəif” olduğunu bildirir. Həmçinin rəvayətdə adı keçən Ziyad ibn Abdullah da “məchul” şəxs sayılır.
Bütün bunlardan daha mühüm olanı, Rəşad qardaşımızın rəvayəti oxuyarkən etdiyi təhrifdir; o, rəvayətin əvvəlini və sonunu ümumiyyətlə oxumur. Rəvayətdə isə deyilir:
“Bir bədbəxt-alçaq birisi – şəqiyyun minəl-əşqiya – Fatimənin yanına gəlib dedi: Xəbərin yoxdur ki, Əli Əbu Cəhlin qızına elçi düşüb?
Fatimə dedi: Doğrudanmı söylədiklərin həqiqətdir?
Kişi dedi, "bəli, həqiqətdir" və bunu üç dəfə təkrar etdi...
Rəvayətin son hissəsində Allah Rəsulu Əlinin yanına gəlib deyir: Ey Əli! Məgər bilmirdinmi ki, Fatimə mənim bir parçamdır və mən də onun?! Kim ona əziyyət verərsə, mənə əziyyət vermiş olar; kim mənə əziyyət verərsə, Allaha əziyyət vermiş olar…
Əli dedi: Bəli, ey Allahın Rəsulu.
(Peyğəmbər) dedi: Bəs səni etdiyin bu işə vadar edən nə oldu?
Əli dedi: Səni haqq ilə peyğəmbər göndərən Allaha and olsun ki, mənim barəmdə ona çatan deyilənlərdən heç nə olmamışdır və mən bunu heç zehnimdən də keçirməmişəm.
Peyğəmbər dedi: Doğru söylədin, doğru söylədin.
Bununla da Fatimə sevindi və gülümsədi, elə ki, dişləri göründü.
(Şeyx Səduq, İləluş-Şərayi, c. 1, s. 185.)
***
Rəşad qardaşım, şiə mənbəyindəki hədis bu şəkildədir. Əgər obyektiv fikir söyləmək istəyirsinizsə, ən azından rəvayəti olduğu kimi oxuyun, sonra tənqid edin.
Hədisin bu əsas hissələrini niyə gizlədirsiniz ki? Axı məsələnin kökü hədisin bu hissələridir - bədbəxt bir şəxs xəbər gətirir ki, guya Əli Əbu Cəhilin qızına elçi gedib, Fatimə bu xəbərə görə narahat olur, atasına bildirir, Peyğəmbər də məsələni araşdırıb şahidi olur ki, bu xəbər yalan xəbərdir. Fatimə də bunu bilib sevinir.
İndi deyin, lütfən – ƏLİ BURADA HANSI ƏMƏLİ İLƏ FATİMƏNİ QƏZƏBLƏNDİRİB?
***
Müasir şiə alimləri, o cümlədən qardaşımızın adını çəkdiyi Ayətullah Xoyi də sözügedən hədisi rədd etmişlər.
Xoyi özünün “Mü‘cəm Rical əl-Hədis” əsərində, 22-ci cildinin 240–241-ci səhifələrində bunları yazır:
“Bu rəvayət yalnız əhli-sünnənin tarix və siyrə kitablarında zikr olunmuşdur. Bizim şiə mənbələrində isnadı yoxdur. Üstəlik, mətn baxımından da qətiyyən qəbul edilə bilməz.” (Ayətullah Xoyi, “Mü‘cəm Rical əl-Hədis”, cild 22, s. 240–241)
Xülasə, bu rəvayət şiə hədis elminə görə zəif, hətta bir çox alimlərə görə uydurma hədisdir.
***
Şahidi olduğumuz kimi, Ayətullah Xoyi də hədisi rədd etmişdir. O, sadəcə əhli-sünnənin irəli sürdüyü iddialara cavab olaraq qeyd etmişdir ki, sözügedən rəvayətdə Əli dinə zidd olacaq heç bir əməl etməmişdir ki, Fatimə ona görə üzülmüş olsun. Sözügedən rəvayətdə Əli tərəfindən haram və ya məzəmmət olunacaq heç bir əməl baş verməmişdir ki, Fatimə buna görə kədərlənsin və ya incisin.
Bunları Xoyi əsla Əliyə haqq qazandırmaq üçün demir, sözügedən rəvayəti rədd etmək üçün bildirir. Rəşad qardaş isə Xoyinin rəddiyəsini belə kontekstdən çıxarıb, saxta iddiasını möhkəmləndirmək üçün istifadə edir.
Əli həyatı boyu Fatiməni qəzəbləndirəcək heç bir iş görməyib və tarix də şahiddir ki, Fatimə dünyasını dəyişənədək onun başqa bir zövcəsi də olmayıb.