વાપી ખાતે કંપનીમાં વાહન ભાડે મુકાવવાની લાલચ આપી છેતરપિંડી કરતી આંતરરાજ્ય ગેંગનો પર્દાફાશ,5 ઝડપાયા

Описание: કંપનીમાં વાહન ભાડે મુકાવવાની લાલચ આપી છેતરપિંડી કરતી આંતરરાજ્ય ગેંગનો પર્દાફાશ, 5 આરોપીઓ ઝડપાયા


વલસાડ જિલ્લામાં વાહન માલિકોને કંપનીઓમાં ઊંચા ભાડે વાહનો મુકાવી આપવાની લાલચ આપી, ગાડીઓ પડાવી લઈ વેચી મારતી એક આંતરરાજ્ય ટોળકીનો પોલીસે પર્દાફાશ કર્યો છે. વલસાડ લોકલ ક્રાઈમ બ્રાન્ચે (LCB) બાતમી અને ટેકનિકલ સર્વેલન્સના આધારે આ કૌભાંડ આચરતા પાંચ મુખ્ય સાગરીતોને ઝડપી પાડી જેલના સળિયા પાછળ ધકેલી દીધા છે.


વલસાડ જિલ્લાના વાપી ટાઉન પોલીસ સ્ટેશનમાં દીપક પટેલ અને અન્ય ભોગ બનનાર લોકોએ એક ફરિયાદ નોંધાવી હતી. ફરિયાદ મુજબ, આરોપીઓએ વાહન માલિકોને મોટી કંપનીઓમાં વાહનો ભાડે મુકાવી આપવા અને તેના બદલામાં ઊંચું ભાડું અપાવવાની લાલચ આપી હતી. વાહન માલિકોનો વિશ્વાસ જીતવા માટે આ ભેજાબાજ ટોળકી કાયદેસરના નોટરી ભાડા કરાર પણ કરતી હતી. જોકે, કરાર બાદ તેઓ ન તો ગાડીનું ભાડું ચૂકવતા હતા કે ન તો ગાડી પરત આપતા હતા..પોલીસ તપાસમાં બહાર આવ્યું હતું કે, આ ટોળકી વાહન માલિકોની જાણ બહાર તેમની કિંમતી ગાડીઓ અન્ય લોકોને ગીરવે આપી દેતી હતી અથવા બારોબાર વેચી મારતી હતી. લાખો રૂપિયાના આ વિશ્વાસઘાતની ગંભીરતાને જોઈને તપાસ વલસાડ લોકલ ક્રાઈમ બ્રાન્ચને સોંપવામાં આવી હતી..ઝડપાયેલા 5 મુખ્ય આરોપીઓ અને તેમનો ગુનાહિત ઈતિહાસ

પોલીસે ગણતરીના દિવસોમાં જ આ રેકેટ ચલાવતા પાંચ રીઢા ગુનેગારોને ઝડપી પાડ્યા છે. આ આરોપીઓ પોતાને મોટી કંપનીના દલાલ તરીકે ઓળખાવતા હતા. પકડાયેલા આરોપીઓમાં

 * સંદિપ વસંતભાઈ પ્રજાપતિ (જેની સામે નાસિક કોર્ટમાં ચેક બાઉન્સનો કેસ ચાલુ છે)

 * મનિષકુમાર બાબુભાઈ ચાંપાનેરી (વલસાડ રેલવે અને નવસારીમાં ચોરી અને દારૂના ગુના નોંધાયેલા છે)

 * અરવિંદ ઉર્ફે વિકાસ રામસુંદર સિંગ

 * મુસ્તાકઅલી અહેમદભાઈ ગોરી (વાપી ટાઉન અને ચીખલીમાં છેતરપિંડી, રાયોટિંગ અને પ્રોહિબિશનના ગુનાઓ છે)

 * પરેશ મુરઘન પાલતેવર (મહારાષ્ટ્ર અને ઉમરગામમાં મારામારી અને અકસ્માતના કેસ નોંધાયેલા છે)


વલસાડ LCB એ આરોપીઓની સઘન પૂછપરછ કરી તેમની પાસેથી તેમજ તેઓએ જ્યાં ગાડીઓ ગીરવે મૂકી હતી ત્યાંથી કુલ 4 ફોર-વ્હીલર વાહનો રિકવર કર્યા છે. જેમાં હ્યુન્ડાઈ વેન્યુ, બે ઈકો કાર અને એક હોન્ડા અમેઝ કારનો સમાવેશ થાય છે. પોલીસે વાહનો અને 5 મોબાઈલ ફોન મળી કુલ રૂ. 25,30,000 નો મુદ્દામાલ કબજે કર્યો છે.

હાલ આ પાંચેય આરોપીઓને વધુ તપાસ અર્થે વાપી ટાઉન પોલીસને સોંપવામાં આવ્યા છે.