KONOSE SU GLORIA: SEÑOR SU GLORIA TA SU KARAKTER, SU AMOR, MISERIKORDIA, HUSTISIA Y GRACIA REVELA.

Описание: KONOSE SU GLORIA
Famia, amigu i kontaktonan di e kanal “Palabras Actualizadas”, un dia den gran manera bendishoná pa kada un di boso.
Awe nos ta bin ku un teksto ku tin un promesa grandi, i na mes tempu un reto grandi:
“Pasobra manera awa ta kubri fondo di laman, asina konosementu di gloria di SEÑOR lo yena mundu.” — Habakuk 2:14
Pensa un tiki: ora bo ta wak laman, bo no ta mira awa na dos tres lugá so… awa ta kubri tur kaminda te na fondo. E no ta laga “espasio” ni partinan bashí. Dios ta bisa: asina lo ta ku konosementu di Su gloria. No ta trata di un tiki of un parti di konosementu. Pero mundu lo ta yena, manera awa ta kubri fondo di laman.
1) Kiko ta “gloria di SEÑOR”?
Hopí hende ora nan tende “gloria,” nan ta pensa riba lus, poder of splendor—i si, e tin esaki tambe. Pero den Beibel, “gloria” di Dios ta mas profundo:
Gloria ta Dios Su karakter revelá.
Su amor, Su hustisia, Su miserikòrdia, Su fidelidat, Su santidat, Su pasenshi, Su bèrdat.
E promesa aki no ta bisa solamente ku mundu lo tende tokante Dios, pero ku mundu lo konosé Dios: konosé Su manera di ta, Su kurason, Su prinsipionan.
2) “Konosementu” no ta igual ku informashon
Habakuk no ta papia di informashon di kabes so—datos, teologia, definishonnan. E ta papia di konosementu: eksperiensia real ku Dios.
Manera bo no por bisa: “Mi konosé un hende,” si bo a mira su foto so. Konosé ta pa bo a mira su estilo, su reaktshon, su manera di trata otro, su manera di pensa y expresa.
Asina tambe ta ku Dios: e mundu no mester solamente un mensaje tokante di Dios; e mundu mester un pueblo ku reflega Dios.
3) Kon e mundu lo yena? Dios ta hasi e promesa, pero nos ta parti di e kaminda
E versíkulo aki ta un profesia: Dios su plan lo gana. Pero e manera ku e promesa ta keda kumpli hopi biaha ta pasa pa medio di testimonio di Su pueblo.
E pregunta awe ta:
Si e mundu lo yena ku konosementu di Su gloria… ta pa medio di ken?
• Ora un persona ta perdoná den lugá na luga di represiaya, e mundo ta mira un sèñal di Su gloria.
• Ora un famia ta kambia su manera di papia—menos gritu, mas respet—e mundo ta mira Su gloria.
• Ora un kreyente ta keda honesto, aunke e ta perde kualkier benefisio, e mundo ta mira Su gloria.
• Ora nos ta yuda hende den nesesidat sin show, sin orguyo, sin laga bo man drechi sa kiko bo man robes a hasi, e mundo ta mira Su gloria.
Gloria di Dios no ta un diskurso bunita i elokuente; gloria di Dios ta un bida transformá.
4) Habakuk: fe den tempo di oscuridat
Laga nos keda honesto: Habakuk tabata biba den un tempu difícil. Inhustisia, violensia, konfushon. E profeta a hasi e pregunta: “Señor, te ki ora of ki dia?”
I den tur e turbulensia ey, Dios a duna un vista di futuro:
“E konosementu di Mi gloria lo yena mundu.”
Esaki ta importantísimo:
Dios no a bisa: “Ora tur kos ta bon, e mundu lo konosé Mi.”
Ela bisa: aunke e mundu ta den krisis, Mi gloria lo keda manifesta.
E esperanza di e kreyente no ta basa riba notisia; e ta basa riba promesa.
5) Aplikashon: 3 pregunta pa bo e siman aki
Mi ke laga bo ku tres pregunta prátiko—pasobra devoshonal sin aplikashon ta bira informashon so:
1. Kua parti di Dios Su karakter abo i ami mester revelá mas?
Amor? Pasenshi? Hustisia? Humildat? Kontrol di lenga?
2. Ken den nos serkania mester mira e gloria di Dios via di nos trato?
Mi esposo/esposa? Mi yunan? Un hende na trabou? Un ruman den iglesia ku mi no ta bai bon kune?
3. Kiko nos lo hasi diferente awe mes pa e konosementu di Su gloria krese?
Un disculpa? Un perdon? Un bishitá? Un ofrenda of sakrifisio di yudansa? Un ora di orashon serio?
Dal un di e paso chikítunan ariba menshona, pasobra nan tin poder grandi.
Un yamada i orashon
Famia, Habakuk 2:14 ta un promesa ku no por faya. Mundu lo yena ku konosementu di gloria di SEÑOR. Pero Dios ta buska hende ku ta bisa:
“Señor, hasi Bo gloria keda mira, keda resplandese den mi.”
Orashon:
Señor, yena nos kurason ku e konosementu di Bo gloria. No laga nos keda na palabra so, pero transforma nos karakter pa nos por reflehá Bo amor, Bo hustisia i Bo miserikòrdia. Usa nos den kas, den trabou, den iglesia, i den komunidat, pa otro hende por mira Kristu Hesus den nos. I manera awa ta kubri fondo di laman, hasi Bo gloria kubri nos bida i yena e mundu. Den nòmber di Hesus, Amèn.
Si e mensahe aki a toka bo, parti’é ku un otro, i keda sigui “Palabras Actualizadas.” Dios ta bendishoná boso.
BENDISHON
PALABRAS ACTUALIZADAS