AMIGU DI BERDAT: REALMENTE TA UN AMIGU SO NOS POR TIN KU TA GENUINO Y DI BERDAT. KRISTU HESUS

Описание: AMIGU DI BERDAT

Famia, amigu i kontaktonan di bo kanal “Palabras Actualizadas”, un sabat den gran manera bendishoná pa boso i boso famia kompletu.
Awe nos ta mira un texto ku ta hopi kortiku, pero e ta pega manera flecha den nos kurason:
Texto di awe: Proverbionan 18:24
“Tin amigu ku ta hunga manera amigu, pero tin un amigu ku ta pega mas serka ku un ruman.”
INTRODUKSHON
Nos tur ta yama hopi hende “amigu”. Pero ora bida bira pisá… ora bo pasa den doló… ora bo ta konfundi… ora bo ta den un decision grandi… e ora ei nos ta mira ken ta amigu di bèrdat i ken ta solamente un kontakto.
Proverbionan 18:24 ta mustra nos 2 realidat:
1. Tin amigu ku ta parse real, pero nan no ta keda.
2. Tin un amigu ku ta pega mas serka ku un ruman.
E pregunta ta: ki sorto amigu bo ta? I mas importante: ki Amigu bo tin?
DESAROLLO
1) No tur “amigu” ta amigu
E texto ta bisa: “Tin amigu ku ta hunga e rol di amigu…”
Esaki ta hende ku:
• ta serka ora tur kos ta dushi,
• ta gusta fiesta, harimentu, kontentura y benefisio,
• pero ora bo tin necesidat di orashon, di konfiansa of di un sakrifisio… nan ta riba distansiá.
E tipo di amigunan aki, ta “amigu” den palabra, pero no den karakter.
Tene kuenta: un amigu di bèrdat no ta midí bo segun bo utilidat, pa loke ku bo ta of tin, pero segun bo balor personal komo hende.
2) Amigu di bèrdat ta pega mas serka ku un ruman
E parti di dos ta bisa: “pero tin un amigu ku ta pega mas serka ku un ruman.”
Esaki ta amigu ku:
• ta laga bo mira e bèrdat sin humiyá bo,
• e ta koregi bo ku amor,
• e ta keda presente den bo peor momentunan,
• e ta protehá bo reputashon ora bo no ta presente,
• e ta kai na rudia pa bo ora bo no tin forsa pa bo mes hasie.
Sa mi ruman ku un ruman ta famia pa sanger, pero un amigu di bèrdat ta famia pa su lealtat.
3) E Amigu mas grandi ta Hesus
Awor laga mi hib’e mas profundu: Beibel ta laga nos mira ku e Amigu real, genuino ku ta pega mas serka ku un ruman tin un Nòmber i su nomber ta Kristu Hesus.
Hesu Kristu a mustra Su:
• Amistad ku sakrifisio, estta, Ela duna Su bida pa nos.
• Amistad ku fidelidat, esta, E no ta laga nos ni bandoná nos.
• Amistad ku verdad, esta, E ta yama nos na arrepentimentu, pero ku mizerikòrdia i mansedumbre.
Hopi hende por faya bo, hopi promesa por keda hasi i kibra.
Pero Hesus ta e Amigu ku no ta retirá Su amor ora nos ta kibrá.
APLIKASHON PRAKTIKO
Awe, hasi 3 kos:
1. Revisa bo sirkulo: ken ta añadi of laga bo fe, bo pas i bo prinsipionan den bida aumenta?
2. Bira e tipo di amigu ku bo ke haña of tin: si bo ke lealtat, ta leal, Si bo ke respet, ta respetoso, si bo ke integridat, ta integro.
3. Tuma Hesus serio i hasiE bo Amigu diario: papia kunE, lesa Su Palabra, Su rekomendashonnan i sigui Su guia i instrukshonnan.
YAMADA FINAL
Mi ruman, no laga soledat gaña bo, pasobra nos no a krea pa ta so. Pero mas ku tur kos, sa esaki mi ruman: Hesus su aparensia o presensia riba e mundu aki, ta tambe pa kibra soledat pa eternidat. Ku otro palabra, bo no mester biba sin e Amigu ku ta pega mas serka ku ruman i ku ta eterno.
Si akaso bo ta sinti ku hopi amistad den bo bida ta superficial… si bo ta kansá di relashonnan ku ta pa interes… awe tuma e desishon i bisa:
“Señor Hesus, mi ta habri mi kurason pa Abo ta mi Amigu di bèrdat.”
ORASHON
Señor, danki pa bo Palabra. Duna nos sabiduria pa skohé bon amistat, i forma nos pa ta amigu fiel tambe. I mas ku tur kos, laga nos eksperensiá Bo presensia manera e Amigu fiel, amoroso i eterno. Den Nòmber di Kristu Hesus nos ta pidi y gradisi, Amèn.
Si e mensahe aki a toka bo, kompartí’é ku un hende ku mester di un Amigu di bèrdat… i no lubidá: den Kristu bo no ta so.
BENDISHON
PALABRAS ATUALIZADAS