Ar aguès eu

Описание: Pistoleta

Ar agués eu mil marcs de fin argen
et atrestant de bon aur e de ros,
et agués pron civada e formen,
bòs e vacas e fedas e moutòs,
e cascun jorn cent liuras per despendre,
e fòrt chastel en que•m pogués defendre,
tal que nul om non m'en pogués forçar,
et agués pòrt d'aiga douça e de mar !

Et eu agués atrestant de bon sen
e de mesura com ac Salamós,
e no•m pogués far ni dir falhimen,
e•m trobès om leial totas sazós,
larc e metent, prometent ab atendre,
gent acesmat d'esmendar e de rendre,
et que de mi no•s poguesson blasmar
en ma colpa cavalier ni joglar !

Et eu agués bela domna plazen,
conhda e gaia, ab avinens faiçós,
e cascun jorn cent cavalier valen
que•m seguisson ont qu'eu anés ni fos,
ben arnescat, si com eu sai entendre ;
e trobès om a comprar et a vendre,
e granz avers non me pogués sobrar
ni res falhir qu'om saubés à triar !

Car enueis es, qui tot an vai queren
menutz percatz, paubres ni vergonhós,
perqu'eu volgra estar suau e gen
dinz mon ostal et aculhir los pros
et albergar cui que volgués descendre,
e volgra lor donar senes car vendre.
Aissí fera eu, si pogués, mon afar,
e car non pòis, non m'en deu om blasmar.

Domna, mon còr e mon castel vos ren
e tot quant ai, car etz bela e pros ;
e s'agués mais de que•us fezés presen,
de tot lo mond o fera, si mieus fos,
qu'en totaz cortz pòis gabar, ses contendre,
que•lh géncer etz en qu'eu pogués entendre.
Aissi•us fes Dieus avinent e ses par
que res no•us falh que•us deia ben estar.