AL EEN, MAAR NOOIT ALLEEN VIR DIE HERE NIE - 13 OKTOBER 2024

Описание: 1. GOD GRYP IN WANNEER SONDE WEN

Daniël 5:1-9 (AFR83) Koning Belsasar het 'n groot ete gegee vir sy duisend hoofamptenare en saam met hulle wyn gedrink. Toe hy onder die invloed van die wyn was, het hy die goue en die silwerbekers wat deur sy voorganger Nebukadnesar uit die tempel van Jerusalem weggevoer is, laat haal sodat hy en sy hoofamptenare, sy vrouens en sy byvrouens daaruit kon drink. Toe is die goue en die silwerbekers gebring wat weggevoer is uit die tempel van God in Jerusalem, en die koning en sy hoofamptenare, sy vrouens en sy byvrouens het daaruit gedrink. Hulle het wyn gedrink en die gode van goud, silwer, brons, yster, hout en klip geprys. Meteens verskyn daar toe 'n mensehand wat op die gepleisterde muur van die paleis skryf, reg teenoor die kandelaar. Die koning het die hand gesien terwyl dit skryf. Toe het die koning bleek geword, hy was baie bang, sy bene het gebewe en hy was lam van die skrik. Hy het hard geroep dat die voorspellers, die sterrekykers en die besweerders ingebring moes word en hy sê toe vir hulle, sy raadgewers: “Enigiemand wat kan lees wat hier geskrywe is en dit vir my kan uitlê, sal 'n koninklike kleed aangetrek word en 'n goue halsketting omgehang word, en hy sal as derde in rang regeer.” Al die koninklike raadgewers het ingekom, maar hulle was nie in staat om wat geskryf is, te lees en dit vir die koning uit te lê nie. Toe het koning Belsasar nog banger en bleker geword. Ook sy hoofamptenare het verslae gestaan.

Belsasar vier fees (hy is die kleinseun van Nebukadnesar, en hy regeer saam met Nabonidus tussen 556-539 v.C.). Hy hou ’n losbandige partytjie terwyl die Persiese magte Babilon beleër. Spottend drink die koning en sy sondige vriende uit bekers wat gesteel is uit die tempel in Jerusalem. Jesaja 22:13-14 se woorde word nou waar oor hulle. (Jeremia 27:16-18, en Esra 1:7 is kort hierna ook bewaarheid!) God se skrif teen die muur (vers 5). Dieselfde hand van God wat die tien gebooie geskryf het, skryf nou teen die muur van die paleis. Die vrees en desperaatheid van die koning (vers 6-9). Sy voorspellers, besweerders en sterrekykers moet help, maar kan nie.

2. ’N MAN VAN GOD IS OP DIE TONEEL

Daniël 5:10-12 (AFR83) Onderwyl die koning en sy hoofamptenare aan die praat was, het die koningin die eetsaal binnegekom. “Mag die koning baie lank lewe!” het sy gesê. “U moenie so bang en bleek wees nie. Daar is 'n man in u koninkryk in wie die gees van die heilige gode is. In die dae van u voorganger is daar gevind dat hy skranderheid, insig en wysheid het soos dié van die gode. U voorganger, koning Nebukadnesar self, het hom aangestel as hoof van die towenaars, die voorspellers, die sterrekykers en die besweerders. Hierdie man Daniël vir wie die koning die naam Beltsasar gegee het, het buitengewone bekwaamheid en kennis en insig om drome uit te lê, probleme op te los en moeilike dinge te ontrafel. Laat haal nou vir Daniël, en hy sal vir u die uitleg gee.”

God vergeet nooit sy kinders nie. Nooit tree ons af in God se diens nie. Na meer as 20 jaar word Daniël weer ingeroep. Hoekom?

Vers 11 het die antwoord:
a. Daniël is Geesvervuld.
b. Daniël het verstand, insig en wysheid.
c. Daniël was aan die hoof van al die top godsdienstige raadgewers van die koning.
d. Daniël het nie sy geloof en integriteit verloor nie. Al het die koning hom Beltsasar genoem, het hy Daniël gebly (vers 12).

3. DIE HERE SE WOORD WEN, AL IS JY AL EEN

Daniël 5:17 (AFR83) Toe het Daniël die koning geantwoord: “Hou gerus maar u geskenke en gee u beloning maar aan iemand anders. Ek sal in elk geval vir u lees wat geskryf is en dit vir u uitlê.”