Firaq Gorakhpuri (#9). Narm Faza Ki Karvatein Dil Ko Dukha Ke Rah Gaiin. Read by Vikas Phonsa

Описание: narm fazā kī karvaTeñ dil ko dukhā ke rah ga.iiñ
ThanDī havā.eñ bhī tirī yaad dilā ke rah ga.iiñ

shaam bhī thī dhuāñ dhuāñ husn bhī thā udaas udaas
dil ko ka.ī kahāniyāñ yaad sī aa ke rah ga.iiñ

mujh ko ḳharāb kar ga.iiñ nīm-nigāhiyāñ tirī
mujh se hayāt o maut bhī āñkheñ churā ke rah ga.iiñ

husn-e-nazar-fareb meñ kis ko kalām thā magar
terī adā.eñ aaj to dil meñ samā ke rah ga.iiñ

tab kahīñ kuchh pata chalā sidq-o-ḳhulūs-e-husn kā
jab vo nigāheñ ishq se bāteñ banā ke rah ga.iiñ

tere ḳhirām-e-nāz se aaj vahāñ chaman khile
fasleñ bahār kī jahāñ ḳhaak uḌā ke rah ga.iiñ

pūchh na un nigāhoñ kī turfa karishma-sāziyāñ
fitne sulā ke rah ga.iiñ fitne jagā ke rah ga.iiñ

tāroñ kī aañkh bhī bhar aa.ī merī sadā-e-dard par
un kī nigāheñ bhī tirā naam batā ke rah ga.iiñ

uf ye zamīñ kī gardisheñ aah ye ġham kī Thokareñ
ye bhī to baḳht-e-ḳhufta ke shāne hilā ke rah ga.iiñ

aur to ahl-e-dard kaun sambhāltā bhalā
haañ terī shādmāniyāñ un ko rulā ke rah ga.iiñ

yaad kuchh aa.iiñ is tarah bhūlī huī kahāniyāñ
kho.e hue diloñ meñ aaj dard uThā ke rah ga.iiñ

sāz-e-nashāt-e-zindagī aaj laraz laraz uThā
kis kī nigāheñ ishq kā dard sunā ke rah ga.iiñ

tum nahīñ aa.e aur raat rah ga.ī raah dekhtī
tāroñ kī mahfileñ bhī aaj āñkheñ bichhā ke rah ga.iiñ

jhuum ke phir chalīñ havā.eñ vajd meñ aa.iiñ phir fazā.eñ
phir tirī yaad kī ghaTā.eñ sīnoñ pe chhā ke rah ga.iiñ

qalb o nigāh kī ye iid uf ye ma.āl-e-qurb-o-dīd
charḳh kī gardisheñ tujhe mujh se chhupā ke rah ga.iiñ

phir haiñ vahī udāsiyāñ phir vahī suunī kā.enāt
ahl-e-tarab kī mahfileñ rañg jamā ke rah ga.iiñ

kaun sukūn de sakā ġham-zadagān-e-ishq ko
bhīgtī rāteñ bhī 'firāq' aag lagā ke rah ga.iiñ

https://www.rekhta.org/ghazals/narm-f...