گەڕانەوەی قاسملوو و یەکگرتنەوەی حیزب لە فۆرمێکی نوێدا

Описание: بەشی سێێەمی بەرنامەی پەنجەمۆر لەگەڵ ئەمیر قازی:

لەم بەشەی بەرنامەکدا باسی بزووتنەوەی ساڵانی 1967 – 1968 دەکات، کە لەلایەن سلێمانی موعینییەوە سەرکردایەتی دەکرا و بە بزووتنەوەیەکی بێبەرهەم ناوی دەبات.

باسی ئەحمەد تۆفیق و چارەنووسی، دوای ئەوەی خۆی رادەستی حکومەتی عێراق کردو پاشان شەهید دەكرێت!

گۆڕانکارییەکانی دوای ساڵی 1970 و گەڕانەوەی عەبدولڕەحمان قاسملوو و کەریمی حیسامی و یەکگرتنەوەی حیزب لە فۆرمێکی نوێدا. پەیوەندی نێوان حکومەتی عێراق و حیزبی دیموکرات دوای رێکەوتننامەی 11 ئاداری ساڵی 1970.

ئایا دوای یەکگرتنەوەی باڵەکانی نێو حیزبی دیموکرات، توودەیەکانی (چەپەکان) نێو حیزب دەسبەرداری بیروباوەڕی خۆیان بوون؟، یاخود بە نهێنی پەیوەندیان مابوو؟

ئەمانە و چەند بابەتێکی دیکە لە پەنجەمۆردا شایەتییان لەسەر دەدرێت.


ئەمیر قازی لە ساڵی 1938 لە حاجیاوا لە موکریان لە دایکبووە و کوڕی قازی محەممەد قازی لە بنەماڵەی قازییەکانی مهابادە.

لەسەرەتای لاوێتییەوە لە رێگای لاوانی دیموکرات و حیزبی توودەی ئێران تێکەڵاوی سیاسەت دەبێت و دەبێتە ئەندامی حیزبی دیموکراتی کوردستانی ئێران.

لە شەستەکانی سەتەی رابردوو روو لە باشووری کوردستان دەکات و لەنێو ریزەکانی دیموکراتدا درێژە بەکاری سیاسی خۆی دەدات. پلە حیزبییەکان دەبڕێت و دەبێتە ئەندامی مەکتەبی سیاسی حیزبی دیموکرات.

لە ساڵانی هەشتاکاندا لەناو حیزبدا شانبەشانی هاوڕێکانی درێژە بەکاری پێشمەرگایەتی و خەباتی دیپلۆماسی حیزب دەدات. بە هۆکاری جۆراوجۆر ریزەکانی دیموکرات جێدەهێڵێت و لە سوێد نیشتەجێ دەبێت. لەگەڵ چەند هاوبیرێکی خۆیدا پارتی سەربەخۆیی کوردستان دادەمەزرێنن و ئێستا سەرۆکی ئەو پارتەیە و لە وڵاتی سوێد دەژی.