Зүрхэн судар 2\ Heart sutra

Описание: Брүлгү Лувсан багшийн зүрхэн судрын тайлбар
Орчуулагч Зопа Чойцо

Tulku Lobsang rinpoche's online teaching
Translated by Zopa Chotso

Билгүүний зүрхэн судар \монголоор\
Энэтхэгийн хэлнээ, Багаватипражняапарамитахридаяа.
Төвдийн хэлнээ, Шэйрав Нинбо.
Билиг Барамид бурханаа мөргөмүү.
Ийн хэмээн миний сонсохуй тэр нэгэн цагт:
Ялж төгс нөгцсөн Ражгирын ойролцоох Тас цогцолсон уулнаа аяг тахимлагийн ихэс хувраг хийгээд бодьсадва нарын их хуврагийн чуулган лугаа хамт нэгнээ залран бөлгөө.
Тэр цагт ялж төгс нөгцсөн “Гүн нарийн үзэхүй” хэмээгдэх номын зүйлийн самади бясалгалд тэгш агуулан оршвой. Бас тэр цагт бодьсадва махасадва хутагт Жанрайсэг бээр билгийн чинад хүрсэн гүн нарийн явдлыг тийн үзээд, таван цогцосыг мөн чанараар хоосон хэмээн тийнхүү үзвэй.
Тэндээс бурханы хүчээр наснаа төгөлдөр Шаарийн хөвгүүн бээр бодьсадва махасадва хутагт Жанрайсэгт ийн хэмээн өгүүвэй: “Язгуурын хөвүүн юмуу язгуурын охин билгийн чинадад хүрсэн гүн явдлаар явсугай хэмээн хүсэгч бээр хэрхэн суралцвал зохих вэ?” хэмээн асуув.
Түүнийг ийнхүү асуусанд бодьсадва махасадва хутагт Жанрайсэг наснаа төгөлдөр Шарийн хөвгүүнд ийн хэмээн өгүүвэй: “Шаарийн хөвгүүн ээ, язгуурын хөвгүүн ба язгуурын охин билгийн чинад хүрсэн гүн нарийн явдлаар явсугай хэмээн хүсэгч тэдгээр нь энэ мэт үзэх буюу:
Таван цогцос нь мөн чанараар хоосон хэмээн даган үзсүгэй. Дүрс нь хоосон, хоосон нь дүрс болой. Дүрснээс өөр хоосон бус. Хоосноос өөр дүрс бус. Түүнчлэн сэрэхүй, хуран мэдэхүй, хураан үйлдэхүй, тийн мэдэл хоосон болой.
Шаарийн хөвгүүн ээ, Тэр мэтийн тулд хамаг үзэгдэл хоосон буюу бэлгэ чанар үгүй. Төрөх үгүй, түрдэх үгүй, хир үгүй, хирээс хагацсан үгүй, буурах үгүй, нэмэгдэх үгүй болой.
Шаарийн хөвгүүн ээ, тэр мэтийн тул хоосон дор дүрс үгүй, сэрэхүй үгүй, хуран мэдэхүй үгүй, хураан үйлдэхүй үгүй, тйин мэдэл үгүй буюу.
Нүд үгүй, чих үгүй, хамар үгүй, хэл үгүй, бие үгүй, сэтгэл үгүй, дүрс үгүй, дуу үгүй, үнэр үгүй, амт үгүй, хүртэхүй үгүй, ном үгүй болой.
Нүдний орон үгүйгээс сэтгэлийн орон үгүй, сэтгэлийн тийн мэдэхүйн орон хүртэл бие үгүй болой.
Мунхаг үгүй, мунхаг барагдахуй үгүйгээс өтлөх үгүй, үхэх үгүй, өтлөхүй үхэхүй барагдахуй гэх хүртэл үгүй болой. Түүнчлэн зовлон ба бүхэн гарах, түрдэх ба мөр үгүй, бэлгэ билиг үгүй, олох үгүй, үл олох үгүй болой.
Шаарийн хөвгүүн ээ, тэр мэтийн тул бодьсадва нар олох үгүйн тулд билгийн чинад хүрсэн гүнүүнээ шүтээд оршюу. Сэтгэлд түйтгэр үгүй болоод айх үгүй буюу.
Чанх буруугаас машид нөгчиж, нирвааны эцэст хүрмүй. Гурван цагт илт заларсан хамаг бурхад бээр билгийн чинад хүрсэн гүнүүнээ шүтэж дээр үгүй, үнэхээр туулсан, бодь дор илтэд төгссөн бурхан болмуй.
Тэр мэтийн тулд билгийн чинад хүрсэн тарни, их ухааны тарни, тэнсэлгүй тарни, сац бус лугаа сацуу тарни, хамаг зовлонг амирлуулагч тарни нь худал бусын тул үнэн гэж мэдээд билгийн чинад хүрсэн тарнийг өгүүлвэй:
ДАДЯАТА| УМ ГАДЭ ГАДЭ БАРА ГАДЭ БАРАСАМ ГАДЭ БОДИ СУХА

Шаарийн хөвгүүн ээ, бодьсадва махасадва нар тэр мэт гүн билгийн чинад хүрснээ суралцтугай.”
Тэндээс ялж төгс нөгцсөн тэр самадигаас босч бодьсадва махасадва хутагт Жанрайсэгт сайн болой хэмээн магтаад: “Сайн болой, сайн болой, язгуурын хөвгүүн ээ, тэр тэрчлэн болой, тэр тэрчлэн болой. Чиний ямар мэт үзүүлсэн түүнчлэн гүн билгийн чинад хүрснээ явахтун. Түүнчлэн ирэгсэд даган баясвай” гэлээ.
Ялж төгс нөгцсөн тийн хэмээн зарлиг болсонд наснаа төгөлдөр Шаарийн хөвгүүн хийгээд бодьсадва махасадва хутагт Жанрайсэг ба хамаг лугаа төгөлдөр тэдгээр ба тэнгэр, хүмүүн, асур, гандари сэлт ертөнц дахин даган баясалцаад Ялж төгс нөгчсөн бээр номлосныг илтэд магтвай.
Билгийн чинад хзрсэн зүрхэн судар төгсвэй.