PNLO ဦးဆောင် နာယက ဗိုလ်မှူးကြီးခွန်ဥက္ကာ အဖွဲ့ကနေ နှုတ်ထွက် | People's Spring

Описание: PNLO ဦးဆောင် နာယက ဗိုလ်မှူးကြီးခွန်ဥက္ကာ အဖွဲ့ကနေ နှုတ်ထွက်

People's Spring

အာဏာသိမ်းစစ်ကောင်စီကို ဆန့်ကျင်တိုက်ခိုက်နေတဲ့ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO/PNLA)က နေ နှုတ်ထွက်လိုက်ပြီလို့ အဲဒီအဖွဲ့ရဲ့ နာယက တာဝန်ယူခဲ့သူ ဗိုလ်မှုးကြီးခွန်ဥက္ကာက ကြေညာချက် ထုတ်လာပါတယ်။

ဗိုလ်မှုးကြီး ခွန်ဥက္ကာဟာ စစ်ကောင်စီနဲ့ထိတွေ့ဆက်ဆံမှု ရှိသူလည်းဖြစ်ပါတယ်။

PNLO အနေနဲ့ စစ်ကောင်စီနဲ့ တွေ့ဆုံဖို့ ကိုယ်စားလှယ်စေလွှတ်တာ မရှိဘူးလို့ စက်တင်ဘာလ ၁၄ ရက်က စာထုတ်ပြီးနောက်မှာ အဖွဲ့နာယက အဖြစ်ကနေ နှုတ်ထွက်တဲ့ ဗိုလ်မှုးကြီး ခွန်ဥက္ကာ ရဲ့စာထွက်လာတာပါ။

ဗိုလ်မှုးကြီး ခွန်ဥက္ကာ ရဲ့စာမှာ လက်ရှိ PNLOဥက္ကဋ္ဌ ဗိုလ်ချုပ်ခွန်သူရိန်ဟာ စုပေါင်းဦးဆောင်မှုအရ မဟုတ်ဘဲ တစ်ဦးတစ်ယောက်သဘောထားဆန္ဒနဲ့ အဖွဲ့ရဲ့ မူဝါဒ ကို အလွဲသုံးစားလုပ်နေတယ်လို့စွပ်စွဲထားတာတွေ့ရပါတယ်။

PNLO ဘက်ကတော့ အဖွဲ့ကို ဦးဆောင်ဖို့ ဥက္ကဋ္ဌ အဖွဲ့ ၃ဦး၊ အထွေထွေအတွင်းရေးမှူး ၁ ဦး ၊ ဗဟို အလုပ်အမှုဆောင်ကော်မတီ ၁ဦးစုစုပေါင်း ပုဂ္ဂိုလ်၅ဦးပါတဲ့အဖွဲ့ကို ဗဟိုကော်မတီဝင်တွေရဲ့ အများစု သဘောထားနဲ့ စက်တင်ဘာလ ၁၁ ရက်က တာဝန်ပေးခဲ့တယ်လို့ ရှင်းလင်းပါတယ်။

အခုလို ခေါင်းဆောင်ပိုင်း ၅ ဦးအဖွဲ့ကို တာဝန်ပေးရတဲ့အကြောင်းရင်းဟာ စစ်ကောင်စီကို ပြန်လည်တော်လှန်ချိန်မှာ အချို့ ခေါင်းဆောင်တွေဟာ ခံယူချက်အရ လက်နက်ကိုင် တော်လှန်ရေးမှာမပါတဲ့ သူတွေရှိနေတာကြောင့် ဖြစ်တယ်လို့ အဲဒီ အဖွဲ့ ပြောရေးဆိုခွင့်ရှိသူ ဗိုလ်မှူးကြီးခွန်အောင်မန်းက ပြောသည်။

PNLO ရဲ့ ခေါင်းဆောင်မှု ပြန့်ကြဲနေတာကို ကျစ်ကျစ်လစ်လစ်ဖြစ်အောင် ခေါင်းဆောင်ပိုင်း ၅ ဦီး ကို တာဝန်ပေးခဲ့တာလို့ လည်း ဗိုလ်မှူးကြီး ခွန်အောင်မန်းကဆိုပါတယ်။

ဗိုလ်မှုးကြီး ခွန်ဥက္ကာ ရဲ့ ကြေညာချက်မှာတော့ PNLO ဟာ အပစ်ရပ် စာချုပ် (NCA) ကို ချိုးဖောက်ပြီး ပစ်ခိုက်တိုက်ခိုက်မှုတွေ၊ စစ်ရေးဖော်ဆောင်မှုတွေ လုပ်လာတယ်လို့ ဖော်ပြပါတယ်။

ဒါကြောင့် မြို့ရွာတွေ ပျက်စီးတာ ၊ ပအိုဝ်းပြည်သူတွေ စစ်ပြေးစစ်ရှောင် များပြားလာတာကို မျက်ဝါးထင်ထင်တွေ့လာရတယ်လို့ ဗိုလ်မှုးကြီး ခွန်ဥက္ကာ ရဲ့ စာမှာ ပါရှိပါတယ်။

ဒါပေမယ့် ပအိုဝ်းဒေသ မြို့ရွာတွေကို စစ်ကောင်စီက လေကြောင်း နဲ့ လက်နက်ကြီးပစ်ခတ်တိုက်
ခိုက်တာတွေကြောင့် ပျက်စီးထိခိုက်ရတာကိုတော့ ဗိုလ်မှူးကြီးခွန်ဥက္ကာရဲ့ စာမှာ မျက်ကွယ်ပြုထားတာတွေ့ရပါတယ်။

ဒီလိုအခြေအနေတွေကြောင့် PNLO ကနေ အပြီးတိုင်နုတ်ထွက်သလို PNLO ရဲ့ လုပ်ဆောင်မှု အ၀၀ဟာ မိမိနဲ့ လုံးဝမသက်ဆိုင်တော့ဘူးလို့လည်း ဗိုလ်မှူးကြီးခွန်ဥက္ကာက ဆိုထားပါတယ်။

PNLO ဟာ ဦးသိန်းစိန်းအစိုးရလက်ထက်မှာ ၂၀၁၅ ခုနှစ်မှာ တနိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူ စာချုပ် (NCA) မှာ လက်မှတ်ရေးထိုးခဲ့ပါတယ်။

ဒါပေမယ့် အခုနှစ် ဇန်နဝါရီလမှာတော့ PNLO က နိုင်ငံရေးနည်းလမ်းနဲ့ ငြိမ်းချမ်းရေးဆွေးနွေးပွဲတွေမှာ ပါဝင်ခဲ့ပေမယ့် နိုင်ငံရေးအာမခံချက်ကိုမရတာကြောင့် အာဏာသိမ်းစစ်ကောင်စီကို တော်လှန်တော့မယ်လို့ ကြေညာချက်ထုတ်ပြန်ခဲ့တာပါ။

အဲဒီနောက် ရှမ်းပြည်တောင်ပိုင်း ဆီဆိုင် မြို့မှာ စစ်ကောင်စီတပ်နဲ့ PNLO /PNLA ကြား တိုက်ပွဲတွေ ပြင်းပြင်းထန်ထန် ဖြစ်ပွားခဲ့ပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring