စပိန်ကရထားတိုက်မှုဟာ သံလမ်းရဲ့ကြံ့ခိုင်မှုပြဿနာကြောင့် ဖြစ်နိုင်ကြောင်းကနဦးတွေ့ရှိ | People's Spring

Описание: စပိန်က ရထားနှစ်စီး တိုက်မှုဟာ သံလမ်းရဲ့ ကြံ့ခိုင်မှု ပြဿနာကြောင့် ဖြစ်နိုင်ကြောင်း ကနဦး တွေ့ရှိ

စပိန်မှာ ဖြစ်ပွားခဲ့တဲ့ ဆိုးရွားတဲ့ ရထားနှစ်စီး တိုက်မှုကြီးဟာ ရထားသံလမ်းရဲ့ ကြံ့ခိုင်မှု ပြဿနာကြောင့် ဖြစ်နိုင်ကြောင်း ကနဦး စစ်ဆေး တွေ့ရှိလာခဲ့ပါတယ်။

ဇန်နဝါရီ ၁၈ ရက်နေ့က စပိန်တောင်ပိုင်းမှာ အမြန်ရထားတစ်စီးက သံလမ်းချော်ထွက်သွားပြီး တခြားသံလမ်းပေါ်မှာ မျက်နှာချင်းဆိုင် အရပ်ကနေ ခုတ်မောင်းလာတဲ့ ရထားကို ဝင်ဆောင့်မိတာကြောင့် လူ ၄၅ ဦးထက်မနည်း သေဆုံးခဲ့ပါတယ်။ ဒါဟာ ဆယ်စုနှစ် တစ်ခုကျော်အတွင်း စပိန်ရဲ့ အဆိုးဆုံး ရထား မတော်တဆမှုလည်း ဖြစ်လာပါတယ်။

ဇန်နဝါရီ ၂၃ ရက်နေ့မှာတော့ စုံစမ်းရေး အရာရှိတွေက ကနဦး တွေ့ရှိချက်တွေကို ထုတ်ပြန်ခဲ့ရာမှာ ရထားသံလမ်းမှာ အက်ကြောင်းတစ်ခု ရှိနေခဲ့တယ်လို့ ဖော်ပြထားပါတယ်။ အဲဒီရထားလမ်းပိုင်းကို လွန်ခဲ့တဲ့ တစ်နှစ်လောက်ကမှ ပြန်လည် ပြင်ဆင် မွမ်းမံထားတာပါ။

အန်ဒါလူရှာ ပြည်နယ်ထဲမှာ ဖြစ်ပွားခဲ့တဲ့ ရထားနှစ်စင်း တိုက်မှုမှာ ဘယ်လို အမှားအယွင်းမျိုး ဖြစ်ခဲ့သလဲဆိုတာ ပွင့်လင်းမြင်သာမှုရှိရှိ ဖော်ထုတ်သွားမယ်လို့ အစိုးရက ကတိပြုထားပါတယ်။

ကနဦး တွေ့ရှိထားချက်အရ ရထားသံလမ်းပေါ်က အက်ကြောင်းဟာ ရထားတိုက်မှုကြီး မတိုင်ခင် ကတည်းက ရှိနှင့်နေတယ် ဆိုတာကို အတည်ပြုနိုင်ကြောင်း စပိန် အစိုးရရဲ့ ရထားမတော်တဆမှု စုံစမ်းရေး အေဂျင်စီ (CIAF) ထုတ်ပြန်ချက်မှာ ပါရှိခဲ့ပါတယ်။

ဒါပေမဲ့ ရထား လမ်းချော်ခဲ့တာဟာ အဲဒီ သံလမ်း အက်ကြောင်းကြောင့်လား ဆိုတာကို တိတိကျကျ ကောက်ချက်ချဖို့ နောက်ဆက်တွဲ ဆန်းစစ် တွက်ချက်မှုတွေ လိုအပ်နေသေးကြောင်းလည်း CIAFက ပြောကြားခဲ့ပါတယ်။

စပိန် သယ်ယူပို့ဆောင်ရေးဝန်ကြီး အော်စက ပူယန်တေးက ရထားလမ်းချော်တဲ့ နေရာဟာ အဖြောင့်အတိုင်း ဖောက်လုပ်ထားတာ ဖြစ်ပြီး သာမန်အားဖြင့် အဲဒီ နေရာမျိုးတွေမှာ လမ်းချော်ထွက်တာမျိုး အရမ်း ရှားပါးတယ်လို့ မှတ်ချက်ပေးထားပါတယ်။ ပြီးတော့ ရထားလမ်းပိုင်းကိုလည်း လောလောလတ်လတ် ပြန်လည် မွမ်းမံ အဆင့်မြှင့်ထားတာ ဖြစ်တယ်လို့ သူက ပြောပါတယ်။ အဓိပ္ပါယ်ကတော့ အဲဒီရထားလမ်းဟာ အသစ်ကျပ်ချွတ် ဖောက်လုပ်ထားသလို သဘောမျိုးလို့ ဝန်ကြီးက ဆိုပါတယ်။

ရထားဟာ မြန်နှုူန်းမြင့် ခုတ်မောင်းနေခဲ့တယ် ဆိုပေမယ့် သတ်မှတ်ထားတဲ့ ပမာဏကို မကျော်တဲ့အတွက် လူတွေရဲ့ အဆုံးအဖြတ် အမှားတစ်ခုခုကြောင့် လမ်းချော်ခဲ့တာ ဖြစ်နိုင်တယ်ဆိုတဲ့ ဖြစ်နိုင်ခြေကိုတော့ စုံစမ်းရေး အရာရှိတွေက ဖယ်ထုတ်ထားကြပြီး ဖြစ်ပါတယ်။

အဲဒီကိစ္စအပြီး တစ်ပတ်မပြည့်ခင် စပိန်မှာ နောက်ထပ် ရထား မတော်တဆမှု ဖြစ်စဉ် ၃ ခု ထပ်ကြုံခဲ့ပြီး လူ ၁ ဦး သေဆုံးခဲ့ပါသေးတယ်။ ဥရောပရဲ့ ဒုတိယ အကြီးဆုံး ရထားလမ်းကွန်ရက်ကို ပိုင်ဆိုင်ထားတဲ့ စပိန်မှာတော့ ဒီအခြေအနေတွေကြောင့် ရထားလမ်း လုံခြုံရေးနဲ့ ပတ်သက်လို့ စိုးရိမ်မှုတွေလည်း ပိုမိုမြင့်တက်လာနေပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA