Aksyon Laban sa Kahirapan - Season 2 – Episode 29

Описание: Tampok sa ika-29 na episode ang panayam kay Formal Labor and Migrant Workers Sectoral Council (FLMWSC) Member Abolcair Guro, sa programang Rise and Shine Pilipinas ng PTV-4.

Tinalakay ni Council Member (CM) Guro ang mga suliranin na kinakaharap ng mga Overseas Filipino Workers (OFWs), partikular ang isyu ng human trafficking at illegal recruitment. Ibinahagi niya ang adbokasiya ng FLMWSC na magtatag ng OFW Help Desk sa bawat lokal na pamahalaan (LGU) sa bansa. Para naman sa mga malalaking lungsod, isinusulong din nila na magkaroon ng OFW Help Desk sa bawat barangay.

Binigyang-diin ni CM Guro ang kahalagahan ng pagkakaroon ng OFW Help Desk, dahil sa pamamagitan nito, maaaring direktang magtanong ang mga mamamayan lalo na sa mga probinsya ukol sa mga lehitimong recruiter at mga kinakailangang dokumento upang makapagtrabaho sa ibang bansa. Bukod dito, maaari ring makakuha ng libreng pre-employment assistance ang mga nagnanais magtrabaho abroad.

Ibinahagi rin niya na nagtutulungan ang Department of Migrant Workers, Department of Justice, Overseas Workers Welfare Administration (OWWA), at Inter-Agency Council Against Trafficking upang ipasara ang mga illegal recruiter. Aniya dahil sa pagtutulungan ng mga ahensyang ito marami ng mga recruitment agency ang kanilang ipinasara.

Kabilang din sa kanyang ibinahagi ang mga programa ng OWWA para sa mga distressed OFWs tulad ng Balik Pinas, Balik Hanapbuhay, OFW Enterprise Development Program, at mga loan assistance program.

#NAPC26
#AksyonLabanSaKahirapan
#BagongPilipinas