Aksyon Laban sa Kahirapan - Season 2 – Episode 39

Описание: Bilang paggunita sa National Disaster Resilience Month (NDRM) ngayong Hulyo, tampok sa ika-39 na episode ng Aksyon Laban sa Kahirapan (AKSYON) ang panayam kay Office of Civil Defense (OCD) Spokesperson Junie Castillo sa programang Rise and Shine Pilipinas ng PTV-4, Hulyo 29.

Tinalakay ni Spokesperson Castillo ang kahalagahan ng NDRM bilang upang paigtingin ang kaalaman at kamalayan ng mga Pilipino sa pagharap sa iba’t ibang uri ng sakuna. Ayon sa kanya, bilang isang bansang madalas makaranas ng lindol, bagyo, at iba pang kalamidad, mahalagang ituring ang NDRM bilang isang paalala ng ating collective responsibility na maging handa, matatag, at mabilis makabangon sa oras ng panganib.

Ibinahagi rin niya ang tema para sa taong ito: “KUMIKILOS para sa Kahandaan, Kaligtasan at Katatagan.” Ayon kay Spokesperson Castillo, nangangahulugan ang salitang KUMIKILOS na acronym ng “Kayang Umaksyon ng Mamamayan upang Isa-buhay ang Kahandaan para maging Ligtas sa Oras ng Sakuna.” Binibigyang-diin nito na isang way of life ang kahandaan at hindi lamang tuwing may paparating na bagyo o sakuna ang kahandaan. Dagdag pa niya na makikita ang pagiging resilient sa maliliit na bagay na ginagawa natin sa araw-araw, anuman ang ating estado sa buhay.

Inilahad din ni Spokesperson Castillo ang mandato ng OCD bilang executive arm ng pamahalaan sa usapin ng disaster resilience, at isa sa mga pangunahing sangay ng National Disaster Risk Reduction and Management Council (NDRRMC), na binubuo ng 45 national government agencies. Ayon sa kanya, ang OCD ang nagsisilbing link at coordination mechanism upang matiyak ang epektibong pagpapatupad ng mga hakbangin sa disaster risk reduction and management mula sa preparedness, response, recovery, rehabilitation, hanggang sa prevention and mitigation.

Binigyang-diin din niya na mahalagang isaalang-alang ang ugnayan ng sakuna at kahirapan. Aniya, “Kapag tinamaan tayo ng sakuna, mabilis na bumabalik ang kahirapan sa ating mga mamamayan.” Kaya’t isinusulong ng OCD ang resilience building upang palakasin ang kakayahan ng mga komunidad na makabangon at manatiling matatag sa kabila ng mga pagsubok.

#NAPC26
#AksyonLabanSaKahirapan
#BagongPilipinas