မဟာဗုဒ္ဓဝင် ၊ ပထမတွဲ ၊ ပထမပိုင်း၊ အပိုင်း(၁၈)

Описание: ကျေးဇူးတော်ရှင်မင်းကွန်းဆရာတော်ဘုရားကြီး ဦးဝိစိတ္တသာရာဘိဝံသဦးစီးရေးသားသည့် နိုင်ငံတော်ဗုဒ္ဓသာသန၊ မဟာဗုဒ္ဓဝင် ၊ ပထမတွဲ ၊ ပထမပိုင်း) အပိုင်း(၁၈)ကိုဖတ်ပြပူဇော်ပေးထားတာဖြစ်ပါတယ်ရှင်


''''''''အသဒိသဒါနဝတ္ထုအကျဉ်းချုပ်ကား"""'''''

မြတ်စွာဘုရားသခင်သည် ဒေသစာရီကြချီ၍ ဇေတဝန်ကျောင်းသို့ နောက်ပါရဟန်းငါးရာနှင့်တကွ ပြန်လည်ဆိုက်ရောက်တော်မူလာသည်တွင်၊ ကောသလမင်းကြီးက မြတ်စွာဘုရားအမှူးရှိသော ရဟန္တာငါးရာကို ရွှေနန်းတော်သို့ ပင့်ဖိတ်လှူဒါန်းသည့်အခါ၊ သာဝတ္ထိပြည်သူပြည်သားတို့ကိုလည်း ဖိတ်ကြား၍ သူ၏အလှူအခမ်းအနားကို ကြည့်ရှု သာဓုအနုမောဒနာခေါ်စေသည်တွင်၊ သာဝတ္ထိပြည်သူပြည်သားတို့ကလည်းအားကျမခံဖြစ်ကာ နောက်တနေ့၌ ပြည်သူ့အင်အားဖြင့် ဘုရင်မင်းမြတ်ထက် ခမ်းနားသာလွန်အောင် အလှူကြီးစီမံပြီးလျှင်၊ ဘုရင်မင်းမြတ်ကို ပင့်ဖိတ်၍ရှုစား အနုမောဒနာပြုစေကြပြန်သည်။
တဖန် ဘုရင်မင်းမြတ်လည်း မခံမရပ်နိုင်ဖြစ်ကာ နောက်တနေ့တွင် ပြည်သူတို့ထက် သာလွန်အောင် အလှူအကြီးအကျယ် စီမံလှူဒါန်းပြန်၏။ ပြည်သူများကလည်းရှေးနည်းအတူပင် သာလွန်အောင် အကြီးအကျယ်စီမံလှူဒါန်းကြပြန်၏။ ဤနည်းအားဖြင့် ဘုရင်မင်းမြတ်ကလည်းခြောက်ကြိမ်၊ ပြည်သူလူထုကလည်း ခြောက်ကြိမ်လှူပြီးကြသောအခါ ဘုရင်မင်းမြတ်သည်-
ယခု ခုနှစ်ကြိမ်မြောက်ပြည်သူတို့ထက်သာလွန်အောင်စံမံလှူဒါန်းရန်မှာ လွန်စွာခဲယဉ်း၍နေချေပြီ။ တိုင်းပြည်နိုင်ငံကြီးရှင် ဘုရင်ဖြစ်ပါလျက် ပြည်သူလူထုအား အရှုံးပေးလိုက်ရပါလျှင် အသက်ရှင်‌နေသော်လည်း အဘယ်အကျိုးရှိအံ့နည်းဟူ၍ ကြံစည်စိတ်ညစ်ညူးနေရာ မလ္လိကာမိဖုရားကြီး၏ အကြံဥာဏ်စီမံချက်ဖြင့် ပြည်သူလူထုတို့ မတုပနိုင်အောင် ကြီးကျယ်စွာသော မဏ္ဍပ်ကြီးအတွင်းတွင် မင်းသမီးကလေးတွေကိုသာ နံ့သာသွေးခြင်း နံ့သာရေပက်ဖြန်းခြင်း ရဟန္တာကြီးများအား ယပ်လေခပ်ခြင်းစသောကိစ္စတို့ကိုပြုလုပ်စေပြီးလျှင် ရဟန္တာကြီးငါးရာတို့အားလည်း တပါးတပါး၏နောက်တွင် ဆင်ပြောင်ကြီး တစီးတစီးစီဝပ်ကာ ထီးဖြူဆောင်းမိုး၍ နေစေခြင်းကို ပြုလုပ်၏။ ထိုအလှူပွဲ၌ ယဉ်ကျေးသော ဆင်ပြောင်ငါးရာမပြည့်ဘဲ တကောင်လိုနေသည်တွင် ကြမ်းကြုတ်ဆိုးဝါးသော ဆင်ပြောင်တကောင်လိုနေသည်တွင် အရှင်အင်္ဂုလိမာလ၏ နောက်တော်တွင် အခြားဆင်များနည်းတူဝပ်စေ၍ ထီးဖြူမိုးစေသည်။ ထိုဆင်ကြမ်းကြီး ဤအလှူတွင် ပါဝင်၍ အရှင်အင်္ဂုလိမာလမထေရ်အား နူးညံ့သိမ်မွေ့စွာထီးဖြူဆောင်းပေးနေသည်ကို မြင်ကြရသော ပြည်သူတို့သည် များစွာအံဩကြကုန်၏။
အလှူပြီးစီးသောအခါ ဘုရင်မင်းမြတ်က ဤမဏ္ဍပ်ရှိအပ်သောပစ္စည်း၊ မအပ်သောပစ္စည်း အလုံးစုံတို့ကို လှူဒါန်းပါ၏ဟုဆို၍ လှူဒါန်းသောအခါ ပြည်သူလူထုက အရှုံးပေးကြရလေသည်။အရှုံးပေးကြရခြင်း၏အကြောင်းမှာ မဏ္ဍပ်တခုလုံးတွင် မင်းသမီးကလေးတွေသာ ဝေယျာဝစ္စ ရွက်ဆောင်နေကြရလေသည်ကို တုပ၍ မပြိုင်နိုင်တော့ပြီ၊ ပြည်သူလူထုလက်ထဲမှာ မင်းသမီးငါးရာလည်းမရှိ၊ ဆင်ပြောင်ငါးရာ ထီးဖြူငါးရာတို့လည်းမရှိ၊ ဤအချက်များဖြင့် အရှုံးပေးကြရလေသည်။
ဤသို့လျှင် အစိန္တေယျ သုံးလောကထွတ်ထား မြတ်စွာဘုရားသခင်၏လက်ထက်တော်မှာ အသဒိသအလှူရှင်သည် ကောသလမင်းကြီးဖြစ်၏။ အခြားအခြားသော ဘုရားရှင်တို့၏ လက်ထက်တော်အခါမှာလည်း ဤကဲ့သို့ အသဒိသဒါနအလှူရှင် တဦးတဦးစီသာပေါ်ပေါက်သည်ဟု မှတ်ယူရာ၏.......................... ။

#မဟာဗုဒ္ဓဝင်
#မဟာဗုဒ္ဓဝင်ပထမပိုင်း
#မင်းကွန်းဆရာတော်ကြီး
#ဗုဒ္ဓဝင်အကျဉ်းချုပ်
#maharbuddhawin
#buddhahistory