သောင်တင်ခဲ့တဲ့ သင်္ဘောဆီ တရုတ်နဲ့ ဖိလစ်ပိုင်က ကယ်ဆယ်ရေးတွေ အပြိုင်စေလွှတ် | People's Spring

Описание: ပိုင်နက် အငြင်းပွားရာ ရေပြင်မှာ သောင်တင်ခဲ့တဲ့ သင်္ဘောဆီ တရုတ်နဲ့ ဖိလစ်ပိုင်က ကယ်ဆယ်ရေးတွေ အပြိုင်စေလွှတ်

ပိုင်နက် အငြင်းပွားရာ ရေပြင်မှာ သင်္ဘောတစ်စီး သောင်တင်ခဲ့တဲ့နောက် တရုတ်နဲ့ ဖိလစ်ပိုင် ကမ်းခြေစောင့် တပ်တွေက ကယ်ဆယ်ရေးတွေ အပြိုင်အဆိုင် စေလွှတ်ပေးခဲ့ကြပါတယ်။

ဇန်နဝါရီ ၂၃ ရက်မှာ နှစ်နိုင်ငံစလုံးရဲ့ ကမ်းခြေစောင့်တပ်တွေက ကုန်တင်သင်္ဘော တစ်စီးရဲ့ အရေးပေါ် အကူအညီ တောင်းခံမှုကြောင့် တောင်တရုတ်ပင်လယ်ထဲက စကားဘရော့ သောင်ခုံကျွန်းတွေဆီ ကယ်ဆယ်ရေးတွေ စေလွှတ်ခဲ့ကြောင်း ကြေညာခဲ့ကြပါတယ်။

စကားဘရော့တဝိုက် ရေပြင်ဟာ ငါးသယံဇာတတွေ ကြွယ်ဝပြီး တရုတ်နဲ့ ဖိလစ်ပိုင်တို့က ရေပိုင်နက် ပိုင်ဆိုင်ခွင့်အတွက် ပြိုင်ဆိုင်နေကြတဲ့ နေရာတစ်ခုပါ။

စင်ကာပူ အလံ လွှင့်ထူထားတဲ့ သင်္ဘောပေါ်က အမှုထမ်း ၁၇ ဦးကို ရှာဖွေ ကယ်ဆယ်နိုင်ခဲ့ပေမယ့် ၂ ဦးကတော့ နောက်ပိုင်းမှာ သေဆုံးသွားတယ်လို့ တရုတ်က ပြောပါတယ်။ အရေးပေါ် အကူအညီ တောင်းခံမှုကို လက်ခံ ရရှိပြီးတဲ့နောက် သင်္ဘော နှစ်စီးကို တရုတ် ကမ်းခြေစောင့်တပ်က စေလွှတ်ခဲ့တယ်လို့ သိရပါတယ်။

ဖိလစ်ပိုင် ကမ်းခြေစောင့်တပ်ကလည်း စကားဘရော့ သောင်ခုံကျွန်းနား ပင်လယ်ပြင်မှာ သောင်တင်ပြီး ဒုက္ခရောက်နေတဲ့ သင်္ဘောကို ကယ်ဆယ်ဖို့ ရေယာဉ်နှစ်စီးနဲ့ လေယာဉ်နှစ်စီးကို စေလွှတ်ပေးခဲ့တယ်လို့ ထုတ်ပြန်ပါတယ်။ နောက်တော့ ဖိလစ်ပိုင် နိုင်ငံသား ရေယာဉ် အမှုထမ်း ၂၁ ဦးထဲက ၁၀ ယောက်ကို အဲဒီ ဧရိယာမှာ ဖြတ်သန်းသွားတဲ့ တရုတ် ကမ်းခြေစောင့် သင်္ဘောတစ်စီးက ကယ်တင်သွားတယ်ဆိုတဲ့ သတင်းပေးပို့မှုကို ရရှိခဲ့တယ်လို့ ဖိလစ်ပိုင် ကမ်းခြေစောင့်တပ်က ပြောပါတယ်။

ပင်လယ်ထဲမှာ ပြဿနာ ကြုံခဲ့တဲ့ ကုန်တင်သင်္ဘောဟာ သံရိုင်းတွေကို တင်ဆောင်ပြီး တရုတ်တောင်ပိုင်း၊ ယန်ကျင့်မြို့ဆီ ဦးတည် ခုတ်မောင်းနေခဲ့တာ ဖြစ်ပါတယ်။

စကားဘရော့ သောင်ခုံကျွန်းတွေဟာ အာရှတိုက်မှာ ပိုင်ဆိုင်ခွင့်ကိစ္စ အငြင်းအခုံတွေ အပြင်းထန်ဆုံး ရေပြင်ဧရိယာမှာ တည်ရှိနေပါတယ်။ လောလောလတ်လတ် အနေနဲ့ အခုသီတင်းပတ် အစောပိုင်းတုန်းက တရုတ် ထိန်းချုပ် ကျွန်းတန်းတွေရဲ့ လေပိုင်နက်နား ချဉ်းကပ်လာတဲ့ ဖိလစ်ပိုင် အစိုးရ လေယာဉ်တစ်စီးကို တရုတ် လေတပ်နဲ့ ရေတပ် ပူးပေါင်းပြီး နှင်ထုတ်ခဲ့ကြောင်း တရုတ်စစ်တပ်က ထုတ်ပြန် ကြေညာထားပါတယ်။

တရုတ်ဟာ တောင်တရုတ်ပင်လယ် ရေပြင်ဧရိယာ တစ်ခုလုံးနီးပါးကို နိုင်ငံပိုင်နက်အဖြစ် သတ်မှတ် ကြေညာထားတဲ့ အတွက်ကြောင့်လည်း ဖိလစ်ပိုင်နဲ့သာ မကဘဲ ဘရူနိုင်း၊ အင်ဒိုနီးရှား၊ မလေးရှား၊ ဗီယက်နမ်တို့လို ဒေသတွင်း နိုင်ငံတွေနဲ့ပါ ရေပိုင်နက် အငြင်းပွားမှုတွေ ဖြစ်ပေါ်နေပါတယ်။


𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA