DYP “Son zəng” ərəfəsində valideyn və məzunlara müraciət etdi

Описание: DYP “Son zəng” ərəfəsində valideyn və məzunlara müraciət etdi

Lənkəran Şəhər-Rayon Polis Şöbəsi orta ümumtəhsil məktəblərində keçiriləcək "Son zəng" tədbirləri ilə bağlı valideynlər və məzunlara xəbərdarlıq edib. Şöbənin Dövlət Yol Polisi bölməsinin əməkdaşları azyaşlıların və məktəblilərin sükan arxasına keçməsi halları ilə bağlı rayonda mütəmadi reydlər keçirir.

Son zəng tədbirlərinin keçirilməsi ilə əlaqədar Lənkəran Şəhər-Rayon Polis Şöbəsinin Dövlət Yol Polisinin əməkdaşları tərəfindən iyun ayının 14-dü əksər ümumtəhsil məktəbləri nəzarətə götürüləcək. Həmin gün təhlükəsizliyin təmin olunması məqsədi ilə orta məktəblərin yerləşdiyi ərazilərdə Yol Polisi əməkdaşlarının xidməti təşkil olunacaq. Görüləcək bu tədbirlərlə yanaşı Dövlət Yol Polisi bölməsi valideynlərin də köməyinə ehtiyac duyur.

Polis inspektoru qeyd etdi ki, ötən illərin təcrübəsi göstərir ki, həmin gün bəzi şagirdlər qeyri-qanuni olaraq avtomobil idarə edirlər. Hətta bəzən onların idarə etdiyi avtomobillərlə qəza törətmələri və nəticədə insanların ölməsi və xəsarət alması halları da baş verir.

İyun ayının 7-də Liman şəhəri ərazisində iki məktəblinin qəza zamanı ölməsindən təəsüfləndiklərini bildirən Emil Vəliyev valideyn və məzunlara tövsiyə edərək bildirdi ki: “Hörmətli məzunlar, unutmaq lazım deyil ki bir gün etdiyiniz ehtiyatsızlıq ucbatından özünüzə və valideynlərinizə uzunmüddətli peşmançılıqlar yarada bilərsiz.”

Bir sözlə hörmətli valideynlər, avtomobilinizi uşaqların istifadəsinə verməyin. Bununla övladlarınıza yaxşılıq yox, pislik etmiş olursuz. Unutmayaq ki, qanunla avtomobilin idarə edilməsini sürücülük vəsiqəsi olmayan şəxsə etibar etdiyinə görə avtomobil sahibi özü də məsuliyyət daşıyır.