DYP əməkdaşları Lənkəranda zəhərlənən 3 şəxsi xilas etdilər

Описание: DYP əməkdaşları Lənkəranda zəhərlənən 3 şəxsi xilas etdilər

Masallı rayonundan Lənkərana dənizə istirahətə etmək üçün gələn üç gənc aldıqları kolbasadan zəhərləniblər. Hadisə rayonun Ürgə kəndi ərazisində qeydə alınıb. Zəhərlənənlərin dadına isə ərazidə xidmət aparan Yol Patrul Xidməti alayının 11-ci tağımının əməkdaşları çatıb.

Masallı rayonu Həsənli kənd sakinləri, 29 yaşlı Samir Abbasov, 31 yaşlı Elşən Hüseynov və 29 yaşlı Fərid Məhərrəmov dənizdə çimmək üçün Lənkərana gələrkən yolda marketlərin birindən kolbasa alıblar. Kolbasanı yedikdən sonra hər üç gəncin halı pisləşib. Zəhərləndiklərini hiss edən gənclər xəstəxanaya getmək üçün dərhal avtomobillərinə minərək Ələt-Astara magistral yoluna çıxıblar. Huşlarını itirmək üzrə olan gənclər ərazidə xidmət aparan Baş Dövlət Yol Polisi İdarəsinin Yol patrul xidməti alayının 11-ci tağımının əməkdaşlarına müraciət edirlər. İnspektorlar Samir Süleymanov və Ruslan Kərimovun köməkliyi ilə zəhərlənən sakinlər Lənkəran Rayon Mərkəzi Xəstəxanasına çatdırılırlar.

Xəstəxanadan verilən məlumata görə, zəhərlənən şəxslərin birinin ağır, digərlərinin vəziyyəti isə orta ağır olaraq qiymətləndirilir. Onların müalicəsi Lənkəran Rayon Mərkəzi Xəstəxanasının İnfeksion xəstəliklər şöbəsində aparılır.