YAAD - Nazm by Alqama Ansari

Описание: YAAD - nazm by Alqama Ansari
Written & performed by Alqama Ansari

This nazm was written two years ago,
born from the pain of distance—
when you’re far from someone and the only thing left
is the thought that they might be thinking of you.

~

Jab kabhī tum yūñ nārāz hotī ho
Kahīñ dūr samundar ke pās hotī ho
Lehroñ se tum merī bāt kartī ho
Hāñ, shāyad tum mujhe yād kartī ho

Shām ko chhat se tum mujhe āwāz detī ho
Do milte huʾe tāroñ ko hamārā nām detī ho
Chhup chhup ke jugnūoñ se merī bāt kartī ho
Hāñ, shāyad tum mujhe yād kartī ho

Har guzarte kabūtaroñ se merā ḳhayāl pūchhtī ho
Purāne kaproñ meñ lipṭī merī yād ḍhūñḍhtī ho
Koī na ho darmiyāñ to ḳhud se hī merī bāt kartī ho
Hāñ, shāyad tum mujhe yād kartī ho

Sunā hai bārisheñ tumheñ merā paighām detī haiñ
Lag kar tumhāre jhumke se merā salām kehtī haiñ
Jhūkī nazreñ, bhīge kaproñ meñ ehsās kartī ho
Hāñ, shāyad tum mujhe yād kartī ho

Hāthoñ kī mehndiyoñ meñ merā nām likhtī ho
Kahīñ miṭ na jāʾe, yeh soch kar bhī ḍarā kartī ho
ʿEid kī har raunaq ko chhoṛ bas merī rāh taktī ho
Hāñ, shāyad tum mujhe yād kartī ho

Saheliyoñ se na milne kā bahānā ḍhūñḍhtī ho
Ghantoñ āʾine par baiṭh merā kab ānā pūchhtī ho
Rotī ho, hañstī ho, aur na jāne kyā kyā kartī ho
Hāñ, shāyad tum mujhe yād kartī ho

Sunā hai pehle tum bin wajah bhī muskurāyā kartī thī
Chāñd ko har roz chhat par ḍhūñḍhne jāyā kartī thī
Ab in chār dīvāriyoñ meñ gumsum sī rehtī ho
Hāñ, shāyad tum mujhe yād kartī ho

Beshak tumheñ gussa bhī ātā hogā
Kahīñ dūr bhāg jāne kā bhī jī chāhtā hogā
Zamāne kī bandhi dor ko toṛne se ḍartī ho
Hāñ, shāyad tum mujhe yād kartī ho