Senda del Oso. Palencia - 19 abril 2025 - Roteiros Galegos

Описание: ‪@Roteirosgalegos‬
A ruta iníciase ás aforas de Cervera polo camiño da Bárcena, na marxe dereita do río Pisuerga ata Arbejal, nun traxecto sinalizado coas marcas do GR1. Unha vez alí, calquera das rúas que levan ata a igrexa de santo André permite continuar por un sendeiro que, unha vez cruzada a estrada do encoro de Requejada, enlaza coa pista forestal de El Vallejo e Congosto. Esta pista sube a coroar o Collao, onde se desvía á dereita para descender polo interior dunha espesa mata de carballos ata a beira do encoro de Requejada, que se acada no enclave da canteira da que se sacou a pedra para a construción da presa.
Seguindo as trochas do gando, a ruta avanza a continuación afrontando con decisión a ascensión do empinado val que se abre ante nós neste punto e que culmina nunha mancha de carballos que chaman La Matilla, aos pés de Peñas Negras.
No seguinte tramo percórrese toda a fronte da muralla pétrea de Peñas Negras ata dobrala polo seu estremo oriental para acceder á pradeira do Camperón, onde se levanta o chozo do Tremedal. Alí tómase unha pista que sae da parte baixa do Camperón e conduce ao miradoiro das Matas, se ben a ruta a abandona pronto para desviarse á dereita polo Cordel Cerverano, ao que se refiren os lugareños como Camiño Real. A ancha caixa do cordel lévanos de volta a Cervera polo bordo da carballeira das Matas, faldeando a ladeira e en progresivo descenso. Este traxecto finaliza na estrada de Arbejal, perto dunha moderna pasarela peonil de madeira que nos permite salvar o Pisuerga e acadar o punto de inicio.
Lonxitude: 12,2 km
Desnivel: baixo
Dificultade: media