စွမ်းအားရှင်တို့ရဲ့ ခေါင်းကိုင်ဖခင် လက်မရွံ့ ခင်ရီ

Описание: စွမ်းအားရှင်တို့ရဲ့ ခေါင်းကိုင်ဖခင် လက်မရွံ့ ခင်ရီ
………………
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဥက္ကဋ္ဌ ဦးခင်ရီမှာ အာဏာပိုင်က အလိုရှိလျှင် ဘယ်အရာမှ နောက်မတွန့်သူ၊ ဒီမိုကရေစီရေးလှုပ်ရှားသူများအပေါ် ကောက်ကျစ်သည့် နည်းပေါင်းစုံသုံးလျက် အသက်ရန်ရှာရန် ဝန်မလေးသူဟု အမည်ဆိုးဖြင့် ကျော်ကြားသူဖြစ်သည်။

ဦးခင်ရီ ရဲချုပ်တာဝန်ထမ်းဆောင်ခဲ့စဉ်က ဖြစ်ပွားခဲ့သည့် ၂၀၀၃ ဒီပဲယင်းအရေးအခင်း၊ ၂၀၀၇ ရွှေဝါရောင်အရေးအခင်းများတွင် ဒီမိုကရေစီအရေး တက်ကြွလှုပ်ရှားသူများကို ရိုက်နှက် သတ်ဖြတ်ရာတွင် အရပ်ဝတ် လက်ပတ်နီ၊ စွမ်းအားရှင် လက်မရွံ့တပ်သားများကို သုံးခဲ့သည်။

စွမ်းအားရှင်များကို လေ့ကျင့်သင်ကြားပေးသည့်အပြင် လက်နက်ပါ တပ်ဆင်ပေးခဲ့ကြောင်း မြန်မာနိုင်ငံဆိုင်ရာ လူ့အခွင့်အရေး အစီရင်ခံစာတင်သွင်းသူ Tomas Ojea Quintana ကို ဦးခင်ရီက ဝန်ခံ ပြောဆိုထားကြောင်း ၂၀၀၉ ခုနှစ်က ပေါက်ကြားလာသည့် အမေရိကန်သံရုံး၏ ဖုန်းခေါ်ဆိုမှု မှတ်တမ်းတစ်ခုတွင် တွေ့ရသည်။

NLD အစိုးရလက်ထက် ၂၀၁၅-၂၀၂၁ (ဇန်နဝါရီ) အထိ ကြံ့ခိုင်ရေး ဒုဥက္ကဋ္ဌတစ်ဦးအဖြစ် ဇာတ်မြှုပ်နေခဲ့သူ ဦးခင်ရီမှာ ထိုကာလအတွင်း အစိုးရကို သိက္ခာချသည့် ဆန္ဒပြပွဲများ၊ တပ်ထောက်ခံပွဲများကို ဦးဆောင် စီစဉ်သည်ဟု အတွင်းသိ ဒုတိယဗိုလ်ချုပ်ကြီးဟောင်း စိုးသိန်းက ပေထက်အက္ခရာတင်ထားသည်။

ဦးသိန်းစိန်အစိုးရအဖွဲ့တွင် သမ္မတရုံးဝန်ကြီးဟောင်းအဖြစ် တာဝန်ယူဖူးသော ရေတပ်ဦးစီးချုပ်ဟောင်း ဦးစိုးသိမ်း ရေးသားသည့် ဒီမိုကရေစီ ဒုတိယအစိုးရသစ်နှင့် မြန်မာနိုင်ငံ (ဒုတိယတွဲ) စာအုပ် တွင် အာဏာမသိမ်းမီက ၁၁ ပွဲ၊ အာဏာသိမ်းပြီးနောက် ၁၁ ပွဲ တပ်ထောက်ခံပွဲ စုစုပေါင်း ၂၂ ပွဲကို ဦးခင်ရီ စီစဉ်သည်ဟု အသေးစိတ် ရေးသားထားသည်။

ထိုသို့ “ဇ” ရှိသည့် ဦးခင်ရီက ၂၀၂၁ ဖေဖော်ဝါရီ ၁ စစ်အာဏာသိမ်းပြီးနောက်တွင် စစ်ကောင်စီ၏ လူဝင်မှုကြီးကြပ်ရေးဝန်ကြီးဖြစ်လာသလို ကြံ့ခိုင်ရေးခေါင်းဆောင် အပြောင်းအလဲမလုပ်မီ နှစ်လခန့် အလိုတွင် စစ်ခေါင်းဆောင်က သူ့ကို ရာထူးမှ နုတ်ထွက်စေ၍ ပါတီသို့ ပြန်ပို့ထားခြင်းဖြစ်သည်။

ယခုနှစ်ကုန်ပိုင်း ကျင်းပရန်ရှိနေသည့် ရွေးကောက်ပွဲအပြီး ဖွဲ့စည်းမည့် အစိုးရအဖွဲ့တွင် စစ်ခေါင်းဆောင်က ဦးခင်ရီကို ဒုသမ္မတ သို့မဟုတ် လွှတ်တော်ဥက္ကဋ္ဌ နေရာပေးနိုင်ချေရှိသည်ဟု သတင်းထွက်ပေါ်နေသည်။

ဦးခင်ရီကို ကြံ့ခိုင်ရေးပါတီခေါင်းဆောင်နေရာအတွက် စစ်ခေါင်းဆောင်က စိတ်ကြိုက်ရွေးချယ်ထားခြင်းဖြစ်ပြီး ၎င်းတို့နှစ်ဦးကြား ကတိကဝတ်ပြုထားသည်ဟု ပါတီနှင့်နီးစပ်သူတစ်ဦးက ပြောသည်။

"အာဏာရပါတီ ဖြစ်သွားရင်လည်း ဗိုလ်ချုပ်မှူးကြီးရဲ့ လမ်းညွှန်မှုအတိုင်းပါပဲ၊ ကျွန်တော်တို့ လိုက်နာပါ့မယ်လို့ ဒီလိုမျိုး (ဦးခင်ရီက)ပြောထားတယ်” ဟု ကြံ့ခိုင်ရေးပါတီထိပ်ပိုင်းခေါင်းဆောင်များနှင့်နီးစပ်သူက ပြောသည်။