ပဋိစ္စသမုပ္ပါဒ်တရားတော် (၁/ ၁၁)

Описание: Mahasi Dhamma 24/7 - မဟာစည်တရားတော်များ ၂၄/၇ သည် မဟာစည်ဆရာတော်ဘုရားကြီး၏ တရားတော်များကို ၂၄-နာရီပတ်လုံး လွှင့်ပေးနေသည့် Channel ဖြစ်ပါသည်။ ဗုဒ္ဓသာသနာနုဂ္ဂဟအဖွဲ့ချုပ်က ၂၀၂၃-ခုနှစ် အောက်တိုဘာလ ၂၂-ရက်မှ စတင်၍ လွှင့်တင်ပါသည်။
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
“ပဋိစ္စသမုပ္ပါဒ် တရားတော်” ကို ကျေးဇူးရှင် မဟာစည်ဆရာတော်ဘုရားကြီးသည် ၁၃၂၄-ခု၊ နယုန်လဆုတ် ၈-ရက်နေ့မှ တော်သလင်းလဆုတ် ၈-ရက်နေ့အထိ ၁၁-သီတင်းတိုင် ရန်ကုန်မြို့၊ မဟာစည် သာသနာ့ရိပ်သာ၊ ဖလ်ယဉ်ဓမ္မာရုံ၌ ဟောကြားတော်မူပါသည်။

ထိုတရားတော်များကို ဦးသိန်းအောင် (ဗုဒ္ဓသာသနာနုဂ္ဂဟအဖွဲ့ချုပ်၊ အကျိုးတော်ဆောင်) နှင့် ဦးသိန်းဟန် (တရားမ တရားသူကြီး) တို့က အသံဖမ်းပါသည်။ ၄င်းအသံဖိုင်ကို ထိုစဉ်က မဟာစည် ကမ္မဋ္ဌာနာစရိယ-အရှင်ဝဏ္ဏိတ နှင့် တပည့်များက လက်ရေးဖြင့် ကူးပါသည်။ ထိုစာမူကို ဦးသိန်းဟန်က လက်နှိပ်စက်မူဖြစ်ရန် အားထုတ်ပါသည်။ ထိုလက်နှိပ်စက်မူကို မင်္ဂလာ ဦးအောင်မြင့်က “ဗုဒ္ဓဓမ္မာလောက စာစောင်” တွင် ထည့်လိုကြောင်း ဆရာတော်ဘုရားအား လျှောက်ထားရာ ထိုလက်နှိပ်စက်မူကို ဆရာတော်ဘုရား ကိုယ်တိုင် တည်းဖြတ်ပေးပါသည်။ ထို့နောက် ဗုဒ္ဓဓမ္မာလောက စာစောင်တွင် အခန်းဆက် ဖော်ပြရာ စာဖတ်ပရိသတ်က နှစ်ခြိုက်သဘောကျသဖြင့် စာအုပ်အဖြစ် ထုတ်ဝေခွင့်ပြုရန် ဆရာတော်ဘုရားအား လျှောက်ထားရာ ခွင့်ပြုချက်ရသဖြင့် “ပဋိစ္စသမုပ္ပါဒ်တရားတော်” ဟု (ပထမတွဲနှင့် ဒုတိယတွဲ ခွဲ၍) ထုတ်ဝေခဲ့ပါသည်။

“ပဋိစ္စသမုပ္ပါဒ် တရားတော်” သည် အလွန် ခက်ခဲနက်နဲပါသည်။ ထိုခက်ခဲနက်နဲသော တရားတော်ကို ဆရာတော်ဘုရားကြီးသည် မှတ်သားဖွယ် သာဓကများ၊ ဥပမာ ဥပမေယျများ၊ ဆောင်ပုဒ်များနှင့်အတူ အရပ်သုံးစကားဖြင့် ဟောကြားထားရုံသာမက ကိုယ်တွေ့ဖြင့် သိနားလည်နိုင်ရန် ဟောကြားထားသဖြင့် အဖိုးအနဂ္ဃထိုက်သော တရားရတနာ ဖြစ်ပါသည်။

ယခုထုတ်လွှင့်သော “ပဋိစ္စသမုပ္ပါဒ် တရားတော် (၁/ ၁၁)” သည် ၁၃၂၄-ခု၊ နယုန်လဆုတ် ၈-ရက်နေ့တွင် ဟောကြားတော်မူသော တရားတော် ဖြစ်ပါသည်။ (ဤတရားတော် အသံ ၀၂း၀၉ မှ ၀၃း၅၀ အထိ (၀၁း၄၁ မိနစ်ခန့်) အသံမငြိမ်မှု အနည်းငယ် ရှိပါကြောင်း အသိပေးအပ်ပါသည်။)

ဤတရားတော်၌ ဆရာတော်ဘုရားကြီးက_

“ပဋိစ္စသမုပ္ပါဒ်တရားဆိုတာ အရေးကြီးပါတယ်။ မြတ်စွာဘုရား၏ သာသနာတော်မှာ ပဋိစ္စသမုပ္ပါဒ်ကို သိဖို့ရာ အလွန်အရေးကြီးပါတယ်။ ဘုရားအလောင်းတော်ဟာ ဒီပဋိစ္စသမုပ္ပါဒ်တရားကပဲ စပြီး လမ်းမှန်အတိုင်း နှလုံးသွင်း ဆင်ခြင်ပြီးတော့ ဘုရားအဖြစ်သို့ ရောက်တော်မူရတယ်။ ဘယ်ကစပြီး ဆင်ခြင်တော်မူသလဲ-ဆိုတော့ ဇရာ မရဏ-အိုခြင်း သေခြင်း ဆိုတာက စပြီးတော့ ဆင်ခြင်တော်မူခဲ့ပါတယ်။”

“နောက်တခု စဉ်းစားစရာကတော့ ဘုရားအလောင်းတော် အလှူပေးတဲ့အခါတွေမှာ ခယ ဝယတင်ပြီး လှူကြောင်း ဘယ်မှာမှ ပြဆိုချက် မရှိဘူး။ မြတ်စွာဘုရားဟောတော်မူတဲ့ တရားတွေထဲမှာလဲ အလှူဒါနပြုတဲ့အခါ ခယ ဝယတင်ပြီး လှူရမယ်-လို့ ဘယ်မှာမှ ဟောကြားချက် မရှိဘူး။ အမှန်ရှိတာကတော့ အလှူခံပုဂ္ဂိုလ်ရဲ့ ဂုဏ်တွေ မြင့်မြတ်ရင် မြင့်မြတ်သလောက် အကျိုးကြီးကြောင်း ဟောကြားချက်သာ ရှိပါတယ်။ ဒီတော့ အလှူခံပုဂ္ဂိုလ်၏ ဂုဏ်ကိုသာ အာရုံပြုပြီး စိစစ်ရွေးချယ်ဖို့ လိုပါတယ်။” စသည်ဖြင့် ဟောကြားထားပါသည်။

ဤတရားတော်ကို နာယူပြီး သတိပဋ္ဌာန်ဝိပဿနာတရား ပွားများကာ ဒုက္ခအပေါင်းမှ ကင်းငြိမ်းကြပါစေ-လို့ ဆန္ဒပြုပါသည်။
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
ကမ္ဘာအရပ်ရပ်ရှိ ဓမ္မမိတ်ဆွေများ လွယ်ကူစွာနာယူနိုင်ရန် မဟာစည်တရားတော်များ ၂၄/၇ ပြန့်ပွားရေးကုသိုလ်ပါဝင်လိုပါက မဟာစည်ကျမ်းစာအုပ်အရောင်းဆိုင် ဖုန်း- ၀၁-၅၄၅၄၆၉, ၀၁-၅၄၁၉၇၁, ၀၉-၉၅၂၁၉၈၈၀၂ နှင့် [email protected] များထံ ဆက်သွယ်နိုင်စုံစမ်းနိုင်ပါကြောင်း အသိပေးအပ်ပါသည်။
- - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - - -
မဟာစည် တရားတော်များကို နာယူသည့်အခါ တရားတော်အချို့တွင် အနည်းငယ် အသံ မကြည်လင်ခြင်း၊ အသံ‌ နှေးခြင်း၊ အသံ မြန်ခြင်းတို့ ပါရှိသည်ကို သတိပြုမိကြပါလိမ့်မည်။ အကြောင်းမှာ အသံဖမ်းယူစဉ်က အသုံးပြုခဲ့သည့် ၇” တိပ်ရီကော်ဒါစက်များ၏ နည်းပညာနှင့် တိပ်ခွေများကို ကော်ပီပွားရယူသည့်အခါ တိပ်ရီကော်ဒါစက် မော်တာမြန်နှုန်းများ အနည်းငယ် ကွာခြားခြင်းကြောင့် ဖြစ်ပါသည်။

မဟာစည် မီဒီယာအဖွဲ့အနေဖြင့် ၁၃၈၅-ခု၊ သီတင်းကျွတ်လမှစ၍ တရားတော်များကို လွှင့်ထုတ်ရာတွင် (၁) တရားတော် အသံများကို မူရင်းအတိုင်း ထားရှိလိုခြင်း၊ (၂) ရှေးက ဖမ်းယူခဲ့သည့် အသံအတိုင်း တရားနာပရိသတ်တို့အား နာယူစေလိုခြင်းတို့ကြောင့် တရားတော် အသံများကို တည်းဖြတ်ခြင်း၊ ပေါင်းစပ်ခြင်း၊ ထုတ်ပယ်ခြင်း၊ အသံ အရည်အသွေး ပြုပြင်ခြင်းတို့ ပြုလုပ်မထားပါ။ သို့သော် နာယူရန် ခက်ခဲနေသည့် တရားတော်အနည်းငယ်ကိုမူ နာယူရန်အဆင့် အသံအရည်အသွေးရရှိရန် Digital Audio Editing Software အသုံးပြု၍ တည်းဖြတ်ပြင်ဆင်ထားကြောင်း အသိပေးအပ်ပါသည်။