思念个母親節 _客話講古(30)

Описание: 原作/朗讀：黃淑媛
影音編製：「客話講古」小編
腔調：臺灣客家海陸腔

《思念个母親節》／黃淑媛

　　母親節到了，我摎阿姆渡細人个期望過程，再過用子女對母愛个摯愛，來傳唱娘親渡子歌，正經對我來講，係一生人就無法度毋記得个！

　　這首歌，係我阿姆个最愛，當年最時行全國歌唱比賽，她乜期望我唱歌做得拿個獎盃孝敬佢！因為我係枵到差毋多會消忒个嬰兒仔，正分這位阿姆恩養長大，八個零月大个我，無正出世个嬰兒恁大，你兜做得想像出我个樣仔無？皮包骨，隔壁鄰舍講我係鬼子，見到我換尿布个時節，隔壁鄰舍个叔婆伯姆看著嗄打卵退，有一擺阿姆電等頭那毛，係外背街路有人辦喪事路過，我个面就黏時轉烏色，送到診所醫生摎我擲到凳頂，摎我姆講︰恁愛子，這種細孲仔妳也領養來蓄？我姆聽著當閼，馬上換一間安到朝陽醫院，這位先生愛心淰淰，佢講︰無相關啦！試看啊！係有緣就做得做汝个子女？盡心就好。

　　今晡日我會唱山歌，乜係受到阿姆个願望，我煞猛在客家歌謠這方向努力。在民國七十九年，感謝客雅傳播公司頭家湯慶添先生製作人，鼓勵我參賽，用渡子歌為題，在兩百零卷帶子當中（當時係錄影帶），一審再審，最尾得著新聞局文建會金帶獎第二名，獎金十萬，尤其係獎座，係我阿姆最合意个，我總算完成佢个心願。

　　過後阿姆中風，希望我在佢愛歸壽个時節，做得唱這首渡子歌分佢聽，我哪有可能唱出聲諾。好得，在阿姆身體康健做得聽時，放分給佢聽，佢斯恬恬仔一句一句應點頭，表現出溫暖快樂个母愛，顯出阿姆个感情，這真情仰般無奈，我這下目汁含等乜噭咧，毋敢噭出聲，恩情難捨啊！

　　這首娘親渡子歌在文化局社教館禮堂，苗栗文化中心，國父紀念館，滿哪位去唱還巡迴各地表演。當時新竹范振宗縣長最欣賞這首歌仔，希望教師合唱團，做得去美國唱分僑胞聽，發揚客家最深層个一首歌，還當感謝鄭榮興校長，朝晨六點就開門教我娘親渡子个唱腔，還過苗栗歌唱比賽指導先生羅秋香老師，三更半夜指導，並完成台北社教館个表演，也無意中感動前場在座个前輩楊玉蘭老師。佢就係第一位在唱片唱娘親渡子个前輩，阿姆毋識堵好又坐在兩隔壁。前輩講︰這細妹仔唱到恁好聽，當慶哦！我姆嗄嚇著，正經有影無？您仰聽得識？佢正講出佢係楊玉蘭前輩，阿姆嚇着歸身大汗，驚我唱毋著，有當大字幕，又長又多歌韻讚揚天下母親个詞，乜係懷念無在个阿姆。這下，阿姆聽我唱煞，煞棚前，寬心笑著渡我轉到戲棚下座位，感謝楊老師對汝个鼓勵，後來客家電視台，也用我現場唱个渡子歌入圍金鐘獎，哈！當得人惱，摎當年費玉清共下比，總算我圓了阿姆个夢，好笑係又對不起畫國畫老師，畫圖先生講我係做得像唱歌恁煞猛認真，今晡日不得了！哈！我無恁慶，該係先生个相惜愛護啦！

　　我無才無能生活平凡，毋好計較憨憨過，用無爭个心靈去面對逐日生活个飯碗，總係我還愛非常感謝客家界个網路先生來幫襯，珍藏這兜新聞局个金帶獎歌曲，正有這個畫面摎好朋友們分享。同時還有一路摎阿姆共下扶持蓄大我个阿姐，心中無限感恩，唱一首俳句歌曲《一世情》，希望做得表達我對阿姊个感情。內容係「姊妹親暱暱，冬暖花靚閃毋開，感情打做堆」也感謝網路先生个作曲，送分我關心愛護我个朋友，不管係爺娘惜子長江水个娘親渡子歌，也係親暱暱个俳句歌曲，本心想兩首歌歌聲代表祝福，祝福天下个阿姆逐日都快樂，逐日都闔府長壽合健康。