剁雞肉盤 _客話講古(39)

Описание: 原作/朗讀：黃淑媛
影音編製：「客話講古」小編
腔調：臺灣客家海陸腔

《剁雞肉盤》/黃淑媛
　　頭擺社會當傳統，討新娘愛看會落灶下煮食無？剁雞肉盤無？假使去男方屋下做客，正經愛有兩把手路，無斯，鄰舍个嘴，上家攀下家，名聲香廣東。
　　有一擺，四十年前，親戚愛討孫嫂，新娘先來尞，就拜託佢剁雞肉盤，佢乜無細義，圍身裙圍起來，直接菜刀剁落去，一盤靚靚雞肉盤剁好勢。實在還慶。該隔壁鄰舍嘖嘖啐啐，講到毋會煞棚，斯有恁多好講，安腦到會企，好在，新娘家庭教育當好，隨來隨鬥，萬事OK，斯在你兜仰般，親戚試著當光彩，龍潭阿妹實在靚，討著儕，食祿福滿堂。
　　年尾，廟項還福，服務小姐摎𠊎譫哆，就會講頭擺過年當多事頭，像挨粄，炊甜粄，炊發粄，菜頭粄，㓾雞捋鴨，剁雞肉盤，兜後生人全毋會，全靠賣場、市場，哈！有麼个特別？佢講，以前家庭當窮苦，兄弟姊妹當多，係伙房屋下食飯，剁雞肉盤係桌心菜，三十暗晡个飯甑－－自家愛剁到歸盤派頭好食，最好大細平大垤，做心臼就愛當注意，菜刀一落，肉愛切正，一垤就愛一垤，切菜砧枋響幾多下，就幾多垤，無！就係你偷食。詏嘴毋贏，可見頭擺家娘幾厲害。
　　頭擺心臼難為，有大伙房，子孫當多，算等來分，好在𠊎當幸福，阿姆長透剁當大垤，毋驚人食，斯驚毋好肉氣。佢又講厥哥排最大，愛背老妹上學堂，成下背兩個，係無錢就無好讀，細人係噭眵，就分先生追出去，所以，長徹無讀到書，你姊妹絕對做毋得看毋起佢。所以見擺，剁雞脾斯一支無加，佢乜擘分你兜共下食，阿姆看著實在毋盼得。
　　還有一位同事，更加笑科，摎男朋友食豬排，毋曉擎刀叉，一下豬排，劃到地泥下，當見笑，無結無煞，好得有做成老公，嫁過去，三十暗晡砧枋剁雞肉，會滑，毋曉得貼桌布，就改地泥下剁，結果一隻雞仔捩捩轉，嗄飆出去灶下角，家娘看著，笑到毋會停動，正幫忙佢。
　　所以這下歸隻社會，安到男女平等社會，毋係男主外，女主內，大家食恁豐湧，剁雞肉盤技巧，男女平權，還係市場賣攤最慶，顧好頭路，生意當旺。所以大家絕對要惜福，造福，平安生活就係享福。


【註解】
１、手路(shiuˊ lu+)：本事、手藝。
２、孫嫂(sunˋ soˊ)：孫媳婦。
３、無細義(mo seˇ ngi+)：不客氣。
４、嘖嘖啐啐(zidˋ zidˋ zudˋ zudˋ)：竊竊私語。
５、安腦(onˋ noˊ)：稱讚、褒揚。
６、好在(hoˊ cai+)：幸好。
７、試著(chiˇ doˊ)：覺得、認為。
８、譫哆(dam de)：閒聊。
９、挨粄(aiˋ banˊ)：磨粄漿。
10、飯甑(pon+ zenˇ)：用來蒸煮飯的木製器皿。
11、平大垤(piang tai+ deˇ)：一樣大塊。
12、心臼(simˋ kiuˋ)：媳婦。
13、詏嘴(auˇ zhoiˇ)：爭論、爭辯。
14、噭眵(giauˇ zhiˋ)：哭泣。
15、毋盼得(m panˇ ded)：捨不得。
16、笑科(siauˇ koˋ)：笑話。
17、無結無煞(mo gad mo sad)：不知如何是好、無可奈何。
18、捩捩轉(lid lid zhonˊ)：團團轉。