ပူတင်ဟာ တတိယ ကမ္ဘာစစ်ကို စတင်နေပြီး သူ့ကို တားဖို့လိုတယ်လို့ ယူကရိန်း သမ္မတပြော | People's Spring

Описание: ပူတင်ဟာ တတိယ ကမ္ဘာစစ်ကို စတင်နေပြီး သူ့ကို တားဖို့လိုတယ်လို့ ယူကရိန်း သမ္မတပြော
 
ဖေဖော်ဝါရီ - ၂၃ ၊၂၀၂၆ ။People’s Spring
 
ရုရှား သမ္မတ ဗလာဒီမာ ပူတင်ဟာ တတိယ ကမ္ဘာစစ်မီးကို စမွှေးထားပြီဖြစ်ပြီး သူ့ကို ရပ်တန့်ဖို့ အားကောင်းတဲ့ တုံ့ပြန်မှုတွေ လိုအပ်ကြောင်း ယူကရိန်း သမ္မတ ဗိုလိုဒီမာ ဇီလန်စကီးက ပြောကြားခဲ့ပါတယ်။
 
ရုရှားရဲ့ ကျူးကျော်စစ် ၄ နှစ်ပြည့်ခါနီး ရက်ပိုင်းအလို၊ BBC သတင်းဌာနနဲ့ အင်တာဗျူးမှာ ဇီလန်စကီးက အခုလို သတိပေးခဲ့တာ ဖြစ်ပါတယ်။ ရုရှားရဲ့ လောဘကို ချိုးနှိမ် ရပ်တန့်ဖို့ဆိုရင် အားကောင်းတဲ့ စစ်ရေးနဲ့ စီးပွားရေး ဖိအားပေးမှုတွေ လိုအပ်မယ်လို့ ဇီလန်စကီးက ဆိုပါတယ်။
 
ကိယက်ဗ်မြို့က သမ္မတ အိမ်တော်မှာ BBCနဲ့ အင်တာဗျူးခဲ့တဲ့အခါ ဇီလန်စကီးက ရုရှားနဲ့ စစ်ပွဲကို ရပ်စဲနိုင်ရေးအတွက် ယူကရိန်းဟာ ပိုင်နက်နယ်မြေတွေ စွန့်လွှတ်မှာ မဟုတ်ဘူးလို့ အခိုင်အမာ ပြောသွားခဲ့ပါတယ်။
 
ရုရှားက စစ်ပွဲရပ်ဆိုင်းဖို့ဆိုရင် ယူကရိန်း အရှေ့ပိုင်း နယ်မြေတွေကို ထိန်းချုပ်ခွင့်ရဖို့၊ ရုရှား တပ်တွေ မထိုးဖောက်နိုင်သေးတဲ့ ဒေသတချို့က ယူကရိန်း ခုခံရေးတပ်တွေ ရုပ်သိမ်းပေးဖို့ တောင်းဆိုထားပါတယ်။ ဇီလန်စကီးကတော့ အဲဒီလိုမျိုး တပ်တွေ ရုပ်သိမ်းပေးလိုက်မယ်ဆိုရင် ထောင်သောင်းချီ များပြားတဲ့ ဒေသခံတွေကို တာဝန်မဲ့ စွန့်ပယ်လိုက်တဲ့ အဓိပ္ပါယ် ဖြစ်သွားမယ်လို့ ဆိုပါတယ်။
 
ပူတင်ဟာ တတိယ ကမ္ဘာစစ်ကို စတင်ခဲ့ပြီး ဖြစ်ကြောင်း၊ အရေးကြီးတဲ့ မေးခွန်းတွေက သူဟာ နယ်မြေတွေ ဘယ်လောက်ထိကို နယ်ချဲ့သိမ်းယူမလဲ ဆိုတာနဲ့ သူ့ကို ဘယ်လို ရပ်တန့်ရမလဲဆိုတာဖြစ်ကြောင်း ဇီလန်စကီးက မှတ်ချက်ပေးခဲ့ပါတယ်။ စစ်ပွဲက ၄ နှစ်ကြာမြင့်လာပြီးချိန်မှာ ရုရှားဟာ ယူကရိန်းပိုင်နက်ရဲ့ ၅ ပုံ ၁ ပုံစာလောက် နယ်မြေတွေကို ထိန်းချုပ်ထားပါတယ်။
 
တချို့ အနောက်မဟာမိတ် နိုင်ငံခေါင်းဆောင်တွေက ယူကရိန်း အနေနဲ့ စစ်ပွဲကို ရပ်တန့်နိုင်ဖို့အတွက် နိုင်ငံပိုင်နက် နယ်မြေတချို့ကို စွန့်လွှတ်ပေးသင့်ကြောင်း ယုံကြည်နေပေမယ့် ဇီလန်စကီးကတော့ အဲဒီ အတွေးကို ငြင်းပယ်ထားပါတယ်။
 
အဲဒီလို လိုက်လျောလိုက်တာက ပူတင်အတွက် ခဏတာ ကျေနပ် နှစ်သိမ့်မှု ဖြစ်သွားမှာ သေချာကြောင်း၊ ပူတင်ကိုယ်တိုင်လည်း ခဏလောက် စစ်ပွဲကို ရပ်နားထားဖို့ လိုအပ်နေကြောင်း၊ ဒါပေမဲ့ အားပြန်မွေးပြီးတာနဲ့ ရန်လို ကျူးကျော်မှုတွေကို သေချာပေါက် ပြန်စလာမှာဖြစ်ကြောင်း ဇီလန်စကီးက ပြောကြားသွားပါတယ်။
 
လက်ရှိ အခြေအနေမှာ ဝိုင်းမတားကြဘူးဆိုရင် ပူတင်ဟာ ယူကရိန်းလောက်နဲ့တင် တင်းတိမ်နေတော့မှာ မဟုတ်ဘဲ ပိုအတင့်ရဲလာလိမ့်မယ်လို့လည်း ဇီလန်စကီးက သတိပေးသွားပါတယ်။
 
ရုရှားရဲ့ ကျူးကျော်မှုကို တွန်းလှန်နေတဲ့ စစ်ပွဲမှာ ယူကရိန်းက နိုင်ခြေရှိသလားလို့ မေးတဲ့အခါ ဇီလန်စကီးက နိုင်လိမ့်မယ်လို့ ပြန်ဖြေခဲ့ပါတယ်။ ယူကရိန်းအတွက် အနိုင်ရမှု ဆိုတာဟာ နိုင်ငံရဲ့ အချုပ်အခြာအာဏာ လွတ်လပ်ခွင့်နဲ့ ၁၉၉၁ ခုနှစ်မှာ နိုင်ငံတကာက အသိအမှတ် ပြုခဲ့တဲ့ ယူကရိန်း ပိုင်နက် နယ်နိမိတ်အတိုင်း ပြန်လည် ရရှိတာကို အဓိပ္ပါယ် သတ်မှတ်ကြောင်းလည်း သူက ဆိုပါတယ်။
 
ဒါပေမဲ့ ဆုံးရှုံးနယ်မြေ အားလုံးကို ချက်ချင်း ပြန်သိမ်းယူနိုင်ဖို့ ဆိုတာက အသက်တွေ အများကြီး စတေးရမယ့် အခြေအနေ ဖြစ်နေတယ်လို့တော့ ဇီလန်စကီးက ဝန်ခံပါတယ်။ ပြည်သူတွေ မရှိတော့တဲ့ နယ်မြေတွေကရော ဘာအသုံးဝင်မှာလဲလို့ သူက မေးခွန်းထုတ်ခဲ့ပါတယ်။
 
သူက အမေရိကန် သမ္မတ ဒေါ်နယ်လ်ထရမ့်ဟာ ရုရှားနဲ့ ယူကရိန်းတို့ စစ်ရပ်စဲရေး ပိုပြီး ခရီးရောက်အောင် ဆွေးနွေးကြဖို့ ဖိအားပေး တောင်းဆိုထားတယ် ဆိုတာကိုတော့ ဝန်ခံခဲ့ပါတယ်။ ဒါပေမဲ့ သဘောတူညီမှု တစ်ခုခုရဖို့ ယူကရိန်းက နယ်မြေတွေ လက်လွှတ်ပေးရမယ်လို့ ထရမ့်က အကြံပြုထားတယ် ဆိုတာကိုတော့ ဇီလန်စကီးက ငြင်းဆိုသွားပါတယ်။
 
အရင်တုန်းက နှစ်ဦးကြား ဆက်ဆံရေး တင်းမာမှုတွေ ရှိခဲ့ချိန်မှာ ထရမ့်က ဇီလန်စကီးဟာ စစ်ပွဲကို စတင်စေခဲ့တဲ့ အာဏာရှင် တစ်ဦးလို့ စွပ်စွဲခဲ့ဖူးပါတယ်။ BBCက အဲဒီအကြောင်းကို မေးတဲ့အခါ ဇီလန်စကီးက ရယ်ရယ်မောမောနဲ့ပဲ သူက အာဏာရှင် တစ်ယောက် မဟုတ်သလို စစ်ပွဲကိုလည်း မစခဲ့ပါဘူးလို့ ပြန်ဖြေခဲ့ပါတယ်။
 
ရုရှားနဲ့ စစ်ပွဲရပ်ဆိုင်းပြီးသွားရင် ယူကရိန်းအတွက် အမေရိကန်က ပေးအပ်မယ့် လုံခြုံရေး အာမခံချက်တွေ ဆိုတာကိုလည်း သမ္မတဖြစ်တဲ့ သူတစ်ဦးတည်းက ဆုံးဖြတ်လို့ မရဘဲ လွှတ်တော်ဆီက ထောက်ခံ သဘောတူညီမှု လိုအပ်လိမ့်မယ်လို့ ဇီလန်စကီးက ပြောကြားခဲ့ပါတယ်။ သမ္မတတွေက တစ်ယောက်ပြီးတစ်ယောက် ပြောင်းသွားပေမယ့် ဖွဲ့စည်းပုံ ဥပဒေက တည်တံ့နေမှာ ဖြစ်တယ်လို့ သူက ဆိုပါတယ်။
 
နိုင်ငံရဲ့ လုံခြုံရေးအတွက် တိကျသေချာတဲ့ အာမခံချက် အစီအမံတစ်ခုခု ရှိမလာမချင်း ယူကရိန်းဟာ ရွေးကောက်ပွဲတွေ ပြန်လည် ကျင်းပဖို့ လောလောဆယ် မဖြစ်နိုင်သေးဘူးလို့လည်း ဇီလန်စကီးက ဝန်ခံသွားပါတယ်။ ဒါကြောင့် ရွေးကောက်ပွဲတွေ ကျင်းပရေးဟာ စစ်ပွဲ ပြီးဆုံးမှုနဲ့ သက်ဆိုင်နေကြောင်း၊ ပြီးတော့ အဲဒီ ရွေးကောက်ပွဲတွေဟာ မျှတပြီး လူထုက အသိအမှတ်ပြုဖို့လည်း လိုအပ်ကြောင်း သူက ဆက်ပြောပါတယ်။
 
စစ်ပွဲ ဆက်လက် ဖြစ်ပွားနေဆဲ လက်ရှိ ကာလမှာတော့ ယူကရိန်းဟာ လေကြောင်းကာကွယ်ရေး စနစ်တွေ ပိုမိုလိုအပ်နေတဲ့အကြောင်း ဇီလန်စကီးက အလေးထား ပြောဆိုသွားပါတယ်။ ပြီးတော့ Patriot လေကြောင်း ကာကွယ်ရေး စနစ်တွေလိုမျိုး အမေရိကန် စစ်လက်နက်တွေကို လိုင်စင်ယူပြီး ပြည်တွင်းမှာ ထုတ်လုပ်နိုင်ဖို့လည်း မျှော်လင့်ကြောင်း သူက ဆိုပါတယ်။ ဒါပေမဲ့ လက်ရှိ အချိန်ထိတော့ နည်းပညာ မူပိုင်ခွင့် ကိစ္စတွေကြောင့် အမေရိကန်နဲ့ တခြားမိတ်ဖက် နိုင်ငံတွေက လက်နက် ထုတ်လုပ်ခွင့် လိုင်စင်တွေ ခွင့်ပြုတာ မရှိသေးကြောင်းလည်း ဇီလန်စကီးက ဝန်ခံခဲ့ပါတယ်။
 
အင်တာဗျူးရဲ့ အဆုံးပိုင်းမှာတော့ ဇီလန်စကီးက သံတမန်ရေး အရရော၊ စစ်ရေးအရပါ ပြင်းပြတဲ့ အားထုတ်မှုတွေနဲ့သာ လက်ရှိ စစ်ပွဲကို ရပ်တန့်နိုင်လိမ့်မယ်လို့ မှတ်ချက်ပေးသွားပါတယ်။ ယူကရိန်း အတွက်ကတော့ ပူတင်ကို ရပ်တန့်နိုင်မှသာ အောင်မြင်မှု ရလာမှာ ဖြစ်တယ်လို့ သူက ပြောကြားသွားပါတယ်။
 
ကိုးကား: BBC

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA