ራስን የመምራት ጉዞ የድል ጥበብ ነዉ [4 መንገዶች]

Описание: ከመንገዶች ሁሉ አንተን ወደ ማንነትህ ከፍታ የሚያመጣህን መንገድ ለይተህ ማወቅ ራስን የመምራት መጀመሪያ ነዉ፡፡

በየትኛዉም መንገድ ተጉዞ ወደ ግቡ መምጣትን የሚያምን ሰዉ ራሱን መምራት አያስፈልገዉም፡፡ መኪና መሪ የተሰራለት ከአንድ መስመር ዉጭ ቢጓዝ ወደ መዳረሻ ከተማዉ መምጣት ስለማይችል ነዉ፡፡ ህይወትም ከተነሳንበት እስከ መዳረሻችን ርቀት የተዘረጋ አንድ ወጥ መንገድ ሊሰመርላት ይገባል፡፡ አንተ ወይም አንቺ ትክክለኛዉን መንገድ ማወቅ ካልቻላችሁ ትክክለኛዉ መሪ መሆን አትችሉም፡፡

ራስን መምራት ሃገርን ከመምራት የሚለየዉ መሪ ማንነትና ተመሪ ማንነት በአንድ ሰዉ ዉስጥ በመኖራቸዉ ነዉ፡፡ የተሻለ እዉቀት፣ ጥበብና ምናብ ያለዉ አንተ መሪ ሲሆን ለግብህ ለመገዛት የሚሰራዉ ተገዥ ማንነት ደግሞ ተመሪዉ አንተ ነህ፡፡
የመረጥነዉ የህይወት መንገድን ለመስራት የሚያስፈልገዉ ቁርጠኝነትን መስራት ካልቻልን ያልመረጥነዉ የህይወት መንገድ ተከታዮች ነን፡፡ ምርጫ መሰረታዊ ነገር ቢሆንም ለምርጫህ እዉነት መገዛት ደግሞ ህጉን ጽኑ ያደርገዋል፡፡

ስለ መንገዳችን እርግጠኞች መሆን ያለብንን ያህል መዳረሻችንን በጥልቀት መረዳት አለብን፡፡ የምትደርሱበት ግብ ከሌላችሁ የምትመሩበት ጥበብ አይኖራችሁም፡፡ ከፊት ለፊታችሁ ያለዉ ጠንካራ መዳረሻ ነዉ አቅጣጫችሁን ሳትስቱ እንድትቆዩ የሚያደርጋችሁ፡፡

የምትደርሱበት ግብ ድረስ የሚያመጣችሁን ዘዴዎችና ጥበቦች መቀየስ አለባችሁ፡፡ ለዚህም ግባችሁን የመረጣችሁበት ምክንያትን በዉል መረዳት ይጠበቅባችኋል፡፡ አንድን ነገር ከሌላ ነገር በተሸለ ሁኔታ የመረጣችሁበትን ጥብቅ ምክንያት ካላወቃችሁ የምትሰጡት ጠንካራ ትኩረትም አይኖራችሁም፡፡

ራስን በመምራት ዉስጥ ትልቁ ፈተና ዉስጣዊና ዉጫዊ ግፊቶችን መቋቋም ነዉ፡፡ እኛ ዉስጥ በጣም የበረታ የሚያልምና የጠነከረ ማንነት እንዳለ ሁሉ ስንፍናን ምርጫዉን ያደረገ ተፈጥሮም አለ፡፡ ነጋችንን ከትናንት አርቀን መስራት ካልቻልን እኛ ራሳችንን መምራት አቁመን ትናንት እኛን መምራት ይጀምራል፡፡

ወደ ኋላ ያልተመለስንባቸዉ አብዛሃኞቹ መንገዶች መመለስ ስላልፈለግን ሳይሆን አሁን ካለንበት ሩቅ ስለሆኑ ብቻ ነዉ፡፡ ከትናንት የራቀ እዉቀት፣ሃሳብና ምናብ ሲኖራችሁ ወደ ነገ የሚሳብ መሪነት የተላበሰ ተፈጥሮ ይኖራችኋል፡፡


#ethiopia #habesha #abyssinia_impact