富國島親子之旅 ：第2集｜世界最長跨海纜車 Sunworld | 去水上樂園曬到燶咗 ｜Sunset Town 夜市 ｜Ice Jungle ｜煙花表演超震撼｜親子旅行

Описание: Sunworld樂園 （最長嘅纜車 + 水上樂園）

今日呢個行程位於富國島嘅南部。一日絕對係玩唔晒呢個地方。最大嘅原因係因為佢好早就閂門。 首先Sunworld呢個樂園係係一個島上，所以除咗纜車應該淨係快艇先可以到。不過我估大部份人都係會坐纜車。
全世界最長嘅跨海纜車，媽媽唔坐都唔知自己畏高😂。
最高點係有50層樓咁高，真係有啲驚驚。不過景色真係超靚😍。坐大概20分鐘，每架纜車都好大，應該坐大概15-20人。

呢個島其實好大，我哋淨係玩咗大概一半。佢仲有個好大嘅過山車，好靚嘅沙灘同埋公園我哋完全冇去到😂。
今次嘅行程淨係去咗佢嘅水上樂園。

Aquatopia Water Park 都好啱一家大細嘅。佢有分小朋友區域同埋刺激啲嘅水上滑梯。不過我覺得就算大人玩嗰啲都唔算太激。小朋友區域當然有大水桶，小朋友水上滑梯，嬉水池，噴水位，同埋幾樣水泡滑梯係啱細嘅小朋友。

另外佢哋可以玩嘅係開心河，同埋衝浪池。有一兩個四人或者雙人嗰啲長水泡滑梯100cm以上就玩到。所以我哋一家四口都有玩。跟住有啲就要120cm以上先玩到，所以淨係家姐可以玩呀～。

至於點解一日玩唔晒呢，因為其實呢度4:30就閂。原因係尾班纜車係五點。所以我哋四點差唔多就要去換衫，因為呢度個更衣室極度混亂。佢有好多個沖涼室，不過冇位換衫。冇凳擺吓嘢，所以你要喺沖涼室裏面換衫。係非常論盡因為完全冇地方擺嘢。沖涼液，洗頭水嗰啲唔會提供，所以自己帶定。毛巾就可以租。同埋行入更衣室嘅地方係非常之跣～要注意！

其實呢度真係幾靚，覺得好值得去。雖然佢咁早閂，但係出返嚟之後好近就有一個sunset town night market, 可以喺嗰度行吓，同埋附近都有啲餐廳。之後仲可以睇埋煙花表演。稍後再分享🤭。

@sunworldhonthomnaturepark
📍 Bãi Đất Đỏ, Tổ 10 Khu Phố 5, Bãi Nam, Tp. Phú Quốc, Kiên Giang, Vietnam


Sunset Town Night Market & Kiss of the Sea 煙花表演

之前介紹另外兩個Night Market，相比之下～Sunset Town 呢個好似比較豪華啲😆。 因為成個環境都好似靚啲。Emma 最鍾意嚟呢間按腳～ 我哋嚟咗兩次，因為佢好鍾意嗰位姐姐。氹得佢好開心。🩷

另外我哋睇咗Kiss of the Sea 嗰個show。 其實開頭都覺得幾特別嘅用水同埋雷射光整出嚟嘅畫面。但係30分鐘真係覺得太長。去到15分鐘已經覺得有啲悶， Emma直頭瞓着咗🤪。 不過都係個人意見，因為家姐就覺得超好睇。佢最尾嗰5分鐘有煙花表演，個煙花真係好震撼。因為好近，又爆得勁。煙花嗰part係值得睇嘅。

其實呢個地方嘅位置係搭纜車/Sunworld 嗰度。所以其實可以同一日去。

btw~ 好開心繼續有藉口post旅行相🤭🤭🤭。

⭐️⭐️⭐️⭐️⭐️⭐️⭐️⭐️⭐️⭐️⭐️⭐️
Sunset Town Night Market
📍 22P3+78G, Ấp 7, Phú Quốc, Kiên Giang, Vietnam

Kiss of the Sea
📍 Thị trấn Hoàng Hôn, Bãi Đất Đỏ, phường, Phú Quốc, Kiên Giang, Vietnam
⭐️⭐️⭐️⭐️⭐️⭐️⭐️⭐️⭐️⭐️⭐️⭐️