富國島親子之旅 ：第一集｜Sailing Club Signature Resort 開箱 | Vinpearl Safari 做 zookeeper ｜Grand World 冇嘢玩？ ｜親子旅行

Описание: 酒店推介：Sailing Club
我哋今次去咗越南嘅富國島。其實係我哋今次第一次去越南，所以又驚又喜🤭。
而家去富國島，暫時都係得一班直航。就係VietJet。所以飛嘅時間唔多選擇，另外係夜機去早機返，頭頭尾尾都冇咗兩日～所以點解我哋最後揀咗去八日🤣。
不過嚟緊12月6號開始 HK express 都會有直航去富國島，嚟緊可以有多個選擇！✈️✈️✈️
Anyway 講返resort 先～ 我哋今次選擇咗住富國島Sailing Club. 真係極力推介～真心正！
首先，其實我哋係book咗兩房villa with private pool. 但係入到房間嘅時候發現應該係俾咗間signature 3 bedroom 我哋😍。
今次我哋係用Agoda book酒店房。7晚大概$14xxx。跟住扣埋agoda cash back 同埋呢排用開Shop back 嗰個app, 再慳多2000幾。 所以計返其實係大概$17xx 一晚。

我哋覺得勁抵嘅，因為個Villa真係超級大。 個私人泳池都好大。其實我哋都住過好多次Villa，so far真係呢個私人泳池最大。 另外，成個villa裝修同埋用料都好新，設計都靚。 廚房設計同埋廳嘅設計真係超級鍾意。大家都好鍾意睇電視嗰個梳化位，好想未來dream House個梳化位都可以做成咁樣，真係非常舒適。
另外房間都好舒服，床又好舒服。
冷氣非常足夠，係直頭有凍嘅感覺，有時要閂細啲冷氣🤭。

其實真係接近Perfect～如果要「彈」我覺得提供嘅洗頭水沐浴露嗰度真係非常一般。我覺得用返自己嘅產品可能會好啲。另外，如果可以有返個 “Do not disturb”掣撳就會好啲。有時喺泳池游緊水～突然間有人入咗嚟，其實佢係想幫我哋添加毛巾或者零食。佢應該係有撳門鐘，不過我哋喺泳池聽唔到。亦都有試過朝頭早九點撳門鐘問方唔方便執房…雖然其實我哋都要起身食早餐，不過感覺上呢個方式俾人吵醒就有啲奇怪咁。不過呢啲都係好小事，整體嚟講真係非常讚！Staff and Service 💯!

如果下次再有機會嚟富角度都會再揀Sailing Club. 淨係自己villa都勁多打卡位🤭🤭🤭😍😍。


Vinpearl Safari

我哋行程嘅第一站就係去咗動物園。其實佢係Zoo 又係 Safari🦍🐆🦓。 有咩分別呢？Zoo就係企喺欄杆出邊睇動物，而Safari就係坐架車入近距離睇動物。
佢呢個動物園兩樣都有嘅。
咁首先買門票嗰度，其實你Trip.com , Klook, KKday 嗰啲app全部都買到。佢有啲package嘅，例如門票加飲食券同埋Tram ticket. Tram 就係有㗎golf車會喺zoo範圍載持有ticket嘅人喺唔同嘅點上落車。咁呢樣嘢我哋都有買嘅，因為當地天氣真係太熱🥵。咁樣行法會好辛苦或者中暑😅🤣。

如果小朋友想體驗做Zookeeper, 咁建議去到就即刻book時間。因為其實佢每日有幾個時段。我哋當日係星期五，我哋11點嗰場都爆滿。咁玩咗啲乜嘢呢？開始就會換Zookeeper衫👕，然後大家就會坐埋一齊，好似上堂咁答問題（關於動物）。之後就會帶小朋友去抹窗或者掃地🤣🤣🤣。估唔到俾錢叫佢哋抹嘢😆。不過因為佢哋解釋都係Zookeeper, 工作作其中之一。
清潔完之後，就會被剪刀✂️同埋紅蘿蔔🥕南瓜。小朋友要幫動物預備食物。
另外最經典一定係係活生生嘅蟲🐛。要小朋友用手自己攞起啲蟲，分落自己個碗度。真係10個有九個都嚇死🤣。當然呢啲時候要迫爸爸出動啦。可憐在爸爸都超驚蟲🐛，但係為咗啲女頂硬上。確實係man嘅。😂😂
大家記得開聲睇以上嘅影片，真係好好笑。

之後餵完動物仔，摸吓蛇同埋蜥蜴，做一個小手工就完結。過程大概一個鐘？個半鐘唔記得咗。
咁想唔想參與就自行決定😎。

之後我哋就搭tram 去唔同地方睇動物。
最後一個站係去到Safari。Safari嗰度係有架冷氣巴士，車大家入去舒服地近距離睇動物。呢個Safari巴士係唔使額外俾錢嘅。 獅子，老虎，豹，斑馬，長頸鹿，鹿，黑熊…好多動物都有㗎。

睇完Safari我哋就喺隔籬嗰個長頸鹿餐廳食晏。呢個地方就可以近距離同長頸鹿食晏，佢哋仲會埋嚟搲嘢食😅。真係好近㗎。

之後就可以坐Tram去唔同嘅地方睇其他動物。