Uttho Hussain tumse Bahen milne aaye hai - Qadeemi Nauha - Janab Fazl Hussain Lucknowi

Описание: Uttho Hussain tumse Bahen milne aaye hai
Kalaam: Janab Fazl Hussain Lucknowi
Nauhakhwani: Ahle Khana Marhoom Syed Raza Haider Saheb
============
Uttho Hussain tumse Bahen milne aaye hai
Mayyat nahiN to qabr gale se lagayi hai

Eik bekasi fizaye haqeekat par chhayi hai
Jangal pasand aa gaya basti banayi hai
Khushboo lahoo ki khaak ke zarroN meiN paayi hai
Phir Karbala se qaid me taqdeer laye hai
Mayyat nahiN to qabr gale se lagayi hai
Uttho Hussain tumse Bahen milne aaye hai

Dooba hua lahoo meiN hai Maghrib ka Aaftaab
Har zarra Karbala ka hai duniya e inqilaab
Laila ka chand aur who zulfoN meiN pech o taab
Seene meiN zakhm de gaya ujada hua shabaab
Qaatil ne dil ko dekh ke barchi lagayi hai
Uttho Hussain tumse Bahen milne aaye hai

Jo dil ko taaza karta hai ban bhi nahi mila
Sookhe hue guloN ko chaman bhi nahiN mila
Shikwa nahiN koi jo watan bhi nahiN mila
Chadar nahiN mili toh kafan bhi nahiN mila
Bete ne aa ke qaid se Turbat banayi hai
Uttho Hussain tumse Bahen milne aaye hai

Mushkil bohut thi raah magar kaam kar gaye
Maa dekhti thi Goad ke pale kidhar gaye
Eik daagh dil mein chhod diya aur guzar gaye
Jhoola bhi khatm ho gaya, Asghar bhi mar gaye
Bachche ki qabr Maa ne gale se lagayi hai
Uttho Hussain tumse Bahen milne aaye hai

Jo lab pe aah thi who Dil e Zaar tak gayi
Gham ki umang aasooN ki daar tak gayi
BaaloN se Muh ko dhaak kar bazaar tak gayi
Kya kya kahooN mazeed, ke darbaar tak gayi
Gardish na jaane kaise muqqadar ne khayi hai
Uttho Hussain tumse Bahen milne aaye hai

Mashkiza apne saath Fidayee liye huey
Dil meiN Bahen ki baat ko Bhai liye huey
Qabze meiN apne saath Khudaii liye huey
Abbas soo raheN haiN tarayii liye huey
Haibat Ali ke Sher ki dariya par chhayi hai
Uttho Hussain tumse Bahen milne aaye hai

Jis dil ko kah liyea who Bahhatar ki qabr hai
Qasim ki qabr hai, kahin Asghar ki qabr hai
Bhai se paye gi Dil e Muztar ki qabr hai
Laila se ko kah de yeh Akbar ki qabr hai
Mitti meiN kisne Chhand ki soorat chhupayi hai
Uttho Hussain tumse Bahen milne aaye hai

Uttho Hussain tumse Bahen milne aaye hai
Mayyat nahiN to qabr gale se lagayi hai

((Ujdi hui zameen hai to be-noor aasman
Kab khatm dekho hota hai Zainab ka imtehan
Sunte hai khul gayi thi mugaddar se reesma
Baazu mein aur galay meiN haiN ubhre huwe nishan
Kya jaane kitni qaid may takleef uthaayi hai
Uttho Hussain tumse Bahen milne aaye hai

Uujde hue khayam ka baakhi nahiN nashaan
Hidday tasavvuraat se bhi kho gaye makaan
Asghar hai ab na pyas se sookhi hui zabaaN
Nanhi lehad ko dhoondti phirti hai ran meiN Maa
Jo bach gaye haiN ashk woh Turbat pe laayi hai
Uttho Hussain tumse Bahen milne aaye hai))
============
Please Comment / Like / Share / Subscribe.
Download a BAYAAZ of all nauhas on this channel from:
https://archive.org/details/BayaazOfO...
Please Like / follow my Official Facebook Page:   / oldnohay  
#OldNohay #NohaWordings #LucknowNauhas #LucknowAnjuman #QadeemiNauha #NauhaLyrics #PuraneNauhe