Singarala Minchi - Annamayya Sankeerthana (సింగారాల మించీ - అన్నమయ్య సంకీర్తన) Lyrics

Описание: సింగారాల మించీ - అన్నమయ్య సంకీర్తన (Singarala Minchi - Annamayya Sankeerthana)

Singer & Composer – Sri G Nageswara Naidu garu;
(Courtesy - TTD & Sri Venkateswara Recording Project)
Ragam - Madhyamavati

Lyrics -
సింగారాల మించీ నరసింహదేవుఁడు
చెంగటనున్నాఁడు నరసింహదేవుఁడు

సురలు జయవెట్ట నసురలెల్ల మొరవెట్ట
సిరితో మెలఁగీ నరసింహదేవుఁడు
ధరణి వంపెట్ట బ్రతిధ్వనులు మిన్నులు ముట్ట
శిరసెత్తె నలి నరసింహదేవుఁడు

కాంచనదైత్యుఁడు దొరకాలువనెత్తురు వార
చించెను గోళ్ళ నరసింహదేవుఁడు
పంచలఁ బంతాలు మీరి భవనాళియేరు వార
చెంచతలఁ గోరీ నరసింహదేవుఁడు

బలిమి పైపైనెక్క ప్రహ్లాదుఁ డట్టె మొక్క
చిలికీఁ గరుణ నరసింహదేవుడు
అలరి శ్రీవేంకటాద్రి నహోబలముమీఁద
చెలువమే చూపీ నరసింహదేవుఁడు

తాత్పర్య వివరణ:
సింగారాలమించిన (శృంగార కళలో మొనగాడైన ఈ నరసింహదేవుడు, మన చెంగటనే (దగ్గరనే వున్నాడు). ఈ అహోబలనృసింహుని కీర్తించండి.
ఈ నరసింహుని భీకర రూపాన్ని చూచి దేవతలంతా జయవెట్టె (జయజయ ధ్వానాలు చేశారు). అసురులెల్లా మొరవెట్టె (మొత్తుకొంటూ) పారిపోయారు. సిరితో (శ్రీలక్ష్మితో) మెలగినవాడీ నృసింహుడు. ధరణివం పెట్ట (భూమిగగ్గోలుతో నిండిపోగా) ఆ ధ్వనుల ప్రతిధ్వనులతో ఆకాశం నిండిపోగా నరసింహదేవుడు, నలి (విజృంభించి) శిరసెత్తి (తలపైకెత్తి చూచినాడు).
కాంచనదైత్యుడు (హిరణ్యకశిపుడు) దొరయైనా వానినెత్తురు కాలువలై పారినది. ఈ నృసింహదేవుడు ఆ రాక్షసుని తన వాడిగోళ్ళతో చీల్చి చెండాడినాడు. పంతాలు తీరినవి కనుక భవనాశియేరు (నది) ప్రశాంతముగా పారింది. అప్పుడు యీ నృసింహదేవుడు చెంచుల కన్య సాంగత్యం కోరినాడు. అదంతా శ్రీహరిలీల మరి.
అంత భీకర నరసింహుని చూచిగూడా ప్రహ్లాదుడు శ్రీహరి భక్తుడైనందువలన బలిమితో (ధైర్యంతో) నృసింహుని పైనెక్కి కీర్తించాడు. ఆ నృసింహదేవుని మనస్సు కరిగి ఆతనిపై కరుణ, చిలికించినాడు. శ్రీవేంకటాద్రిపై అలరిన శ్రీవేంకటేశ్వరుడే ఈ అహోబల నృసింహుడు. ఈయన అందరికీ తన స్నేహభావం చూపించాడు.
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)