Sripati Niseva Chittamu - Annamayya Sankeerthana (శ్రీపతి నీసేవ చిత్తము - అన్నమయ్య సంకీర్తన) Lyrics

Описание: శ్రీపతి నీసేవ చిత్తము - అన్నమయ్య సంకీర్తన (Sripati Niseva Chittamu - Annamayya Sankeerthana)

Singer & Composer - Sri Nihal garu during Annamayya Paataku Pattabhishekam Program by SVBC & TTD
Ragam - Hemavati

Lyrics -
శ్రీపతి నీసేవ చిత్తము గోరదు
పాపముల వెంటనే పారీనయ్యా

తెగనికర్మము దేహములు గోరు
వగలయీపీఁగ వ్రణాలు గోరు
నగుచుఁ దొల్లింటి నా పూర్వకర్మములు
పొగరుభోగములే పొందించెనయ్యా

సాకిరివయసు సంసారము గోరు
చీకురువాయులు జీడిమాను గోరు
దీకొని నాతోడి తీరనింద్రియములు
కైకొని మర్మములు గలఁచీనయ్యా

వేదవిజ్ఞానము విరతియే కోరు
నీదాసుఁడైతేనే నీశరణు గోరు
యీదెస శ్రీవేంకటేశ నీవు నాలో
పాదైయుండి నన్ను బ్రదికించేన(వ)య్యా

తాత్పర్య వివరణ:
ఓ శ్రీపతీ! నీ సేవను నా చిత్తము (మనస్సు) కోరుట లేదయ్యా! అది పాపములవెంట పారీని (పరుగులు తీస్తున్నది. నా గతేమిటి?
ఈ జీవుడు ధరించిన దేహము యెడతెగని కర్మలను చేస్తూనేవుండాలని కోరుతుంటుంది. 'ఈగ' మక్కువతో పుండును తొలిచినట్లు ఈ దేహము కర్మలనే ఆశ్రయిస్తుంది. గత జన్మలలో చేసిన శుభాశుభకర్మల వలన, ఈ జన్మలో భోగములు కష్టములు కలుగుతుంటాయి. భోగాలు పొగరుబట్టిస్తాయి. కష్టాలు దైవాన్ని తిట్టిస్తాయి. ఈ రెండిటివలనా జననమరణ చక్రబంధంలో చిక్కుకుపోతాడు జీవుడు.
ఓ శ్రీహరీ! సాకిరివయసు (జీవులకు సాక్షీభూతముగావున్న యౌవనము) సంసార వాంఛలలో తగులుకొనునట్లు చేస్తుంది. చీకురువాయులు అనే ఒక జాతి గబ్బిలాలు జీడిమామిడి చెట్లనాశ్రయించి జీవిస్తుంటాయి. అదే విధంగా యౌవనం సంసార సుఖాన్నే ఆశ్రయిస్తుంది. ఇక నా పంచేంద్రియాలూ పూనుకొని నన్నెదిరిస్తూ నాచేత చేయరాని పనులు చేయించి నా అయుర్దాయాన్ని తగ్గిస్తుంటాయి. ఇక నేనేమి చేయగలనయ్యా?
దేవా! వేదవేదాంతములందించే విజ్ఞానమువలన జీవికి గొప్ప జ్ఞానము సిద్ధిస్తుంది. దానివలన వైరాగ్యము కలిగి సర్వసంగపరిత్యాగి అవుతాడు జీవుడు. దానికి శ్రీవేంకటేశ్వరుడని కృప కలుగవలసిందే. మరి అదెలావస్తుంది? ఆ దైవశిఖామణి దాసులై ఆయన శరణాగతితో బ్రతుకు గడుపుతుంటే అప్పుడు యేదో ఒకనాడు ఆయన అనుగ్రహం తప్పక లభిస్తుంది.
(సంకీర్తనమునకు భావవాణి… శ్రీ అమరవాది సుబ్రహ్మణ్య దీక్షితులు గారు)