History of Suraj Kund Temple Multan Pakistan || Alexander , Hiwan Tsang, Al-Biruni visited temple

Описание: سورج کنڈ مندر (Sun Tample) ملتان
جس کو محمد بن قاسم نے بھی نہیں گرایا تھا۔
اسلام کی برصغیر میں آمد سے قبل اس خطے میں ھندو ازم ، بدھ مت اور مختلف قبائلی مذاھب کا دور دورہ تھا۔ کہا جاتا ہے کہ اس قدیم تاریخی مندر کو کرشنا کے بیٹے نے تعمیر کروایا تھا تا کہ وہ کوڑھ کے مرض سے نجات حاصل کر سکے ۔ اس مندر میں سورج کی پوجا کی جاتی تھی ۔ مندر کے سامنے نہانے کے لئے ایک تالاب بھی موجود ہے۔ جسے کنڈ کہا جاتا ہے۔ اسی مناسبت سے اس مندر کا نام " سورج کنڈ " مندر ( سورج کا تالاب) پڑا۔ اسے ادتیا سن ٹیمپل بھی کہا جاتا ہے۔ ھندو مصنفین کی مختلف تاریخی کتب کے مطابق ھندوستان میں Tirupati کے علاقے میں بالا جی مندر ، Tiruvanthapuram کے علاقے میں Anantha Padmanabha مندر کے ساتھ امیر ترین تیسرا بڑا سورج کی پوجا والا یہ مندر تھا۔ ڈاکٹر ممتاز حسین پٹھان اپنی کتاب ھسٹری آف سندھ والیم 2 میں رقمطراز ہیں کہ 2000 سال قبل اس مندر کی انتظامیہ 6000 افراد پر مشتمل تھی۔ سکندر اعظم نے بھی اس مندر کا وزٹ کیا۔ چینی سیاح ہیوان سانگ نے اس مندر کا وزٹ کرنے کے بعد اس وقت کے ملتان کو ایک پنپتا ھوا شہر کہا ۔ البیرونی کا گیارہویں صدی میں ملتان سے گذر ھوا تو وہ بھی یہ مندر دیکھنے کے لیے آیا۔ المقدسی نے بھی اس مندر کا وزٹ کیا۔ عربوں کی آمد سے پہلے سندھ کی ہندو شاہی کے دور میں ملتان دارالحکومت تھا۔ کہا جاتا ہے کہ محمد بن قاسم نے بھی اس مندر کو گرانے سے انکار کر دیا تھا۔ واللہ اعلم ۔
اس مندر کے سامنے 132 فٹ چوڑا اور 10 فٹ گہرا تالاب ھے۔ جو کہ ایک دور میں ہر وقت پانی سے بھرا رھتا تھا۔ نزدیکی نہر سے اس تالاب کو پانی مہیا کیا جاتا تھا۔ وہ نہر اب بھی اس مندر کے نزدیک بہتی ھے ۔ 1821ء سے 1844ء تک سکھ دیوان " ساون مل " 23 سال تک ملتان کا گورنر تھا۔ اس نے تالاب کے گرد ہشت پہلو دیوار تعمیر کرائی۔ کامران اعظم سوھدروی اپنی کتاب پاکستان کے آثار قدیمہ میں لکھتے ہیں کہ 1848ء کے محاصرے کے دوران لیفٹیننٹ ایڈورڈ اور لیک کی قیادت میں یہ علاقہ انگریزوں کی چھاؤنی کا کام دیتا رھا ھے۔ یہ جگہ ہندو یاتریوں کے لئے سرچشمہ فیض و برکات تصور کی جاتی تھی ۔ یہاں سال میں دو میلوں کا اہتمام کیا جاتا تھا۔ جن میں سے ایک میلہ بھادوں کی سات تاریخ کو اس وقت منایا جاتا جب چاند گھٹ رھا ھوتا۔ اور دوسرا اسی تاریخ کو ماگھ کے مہینے میں منعقد کیا جاتا۔ سات تاریخ ہندو دیومالا کی تعظیم ھے کہ سورج دیوتا کا رتھ ( ارابہ) سات گھوڑے کھینچتے ہیں۔ ایک اسطورہ کے مطابق ، سات تاریخ منوں کے سات بیٹوں ( سات رشیوں) کی تعظیم میں ان روحانی اجتماعات کے لئے وقف کر دی گئی تھی جو کہ ملتان کے اولین مؤسس ( بانی) قرار دئیے جاتے ہیں۔
تقسیم ہند سے پہلے یہاں لگنے والے میلے کے لئے آنے والے یاتریوں کی سہولت کے لئے مقامی ہندو سردیوں میں رضائیاں اور گرمیوں میں ہاتھ والے پنکھے لاکر مندر میں رکھ دیتے تھے۔ کہا جاتا ہے کہ یہاں سونے کا بت رکھاھوا تھا۔ قیام پاکستان کے وقت جب حالات خراب ھوئے تو مقامی مسلمانوں کے حملے کے وقت یہاں کا بڑا پجاری بت کو ساتھ لے کر فرار ھوگیا۔ مندر کی عمارت زیر استعمال نہ ہوسکنے کی وجہ سے مخدوش ھوکر شکست و ریخت کا شکار ہو گئی ھے۔ جب کہ تالاب میں جھاڑیاں آگ گئی ہیں ۔ دیوان ساون مل کی بنائی ھوئی تالاب کی دیوار بناتے ہوئے پٹ سن ، چونا ، چاول کا پانی اور دیگر اشیاء کا استعمال کیا گیا جس کی وجہ سے دیوار ابھی تک کافی بہتر حالت میں موجود ھے ۔ تالاب سے ملحقہ ایک ھندو کی پرانی حویلی موجود ھے۔
بعض روایات کے مطابق حضرت شاہ شمس سبزواری جب اس علاقے میں تشریف لائے تو انہوں نے لوگوں سے آگ مانگی تاکہ وہ گوشت پکا سکیں مگر اہل علاقہ نے آگ دینے سے انکار کردیا۔ تب انہوں نے سورج سے کہا تو سورج نیچے آیا اور سورج کی گرمی سے انہوں نے گوشت پکایا۔ اہل علاقہ کے مطابق وہ جگہ تالاب اور مندر سے ملحقہ مسجد کے بائیں جانب اب بھی موجود ھے ۔ ( اس واقعے میں کس حد تک صداقت ھے۔ اس بارے میں کچھ نہیں کہا جاسکتا ۔ میں نے صرف اہل علاقہ کا بیان آپ کے گوش گزار کیا ہے) ۔
مندر دیکھنے کے لیے ملتان شہر کے پرانا شجاع آباد روڈ پر سورج کنڈ سٹاپ ھے۔ نزدیک ہی گلیوں میں یہ مندر واقع ھے ۔ وہاں سے سورج کنڈ شروع ھو جاتا ھے جو کہ موجودہ وہاڑی روڈ پر چوک شاہ عباس تک آتا ھے ۔
#india #pakistan #hindu #history