អត្ថបទ ជីវិតលើនាវា - ភាសាខ្មែរ ថ្នាក់ទី៨ (ការស្ដាប់)

Описание: អត្ថបទ ជីវិតលើនាវា - ភាសាខ្មែរ ថ្នាក់ទី៨ (ការស្ដាប់)
#ជីវិតលើនាវា

ក្រឡាហោមគង់ ជាមន្ត្រីខ្មែរស្នេហាជាតិមួយរូប មានទឹកចិត្តក្លាហានមោះមុតហ៊ានតស៊ូប្រឆាំងការគាបសង្កត់របស់អាណានិគមនិយមបារាំង។ បារាំងក្ដាប់គោលជំហរនិងគំនិតរើបម្រះរបស់លោកបាន ក៏រកមធ្យោបាយចាប់គាត់ដាក់កប៉ាល់យកទៅសម្លាប់ដោយសម្ងាត់។

ព្រះទិនករនៅប៉ប្រះមាត់ព្រៃ ពុំទាន់អស្ដង្គតនៅឡើយទេ។ អរុណរង្សីនៅភ្លឺច្រាលចាំងមកលើរាជធានីភ្នំពេញជាទីអវសាន។ ក្រឡាហោមគង់អង្គុយនៅត្រមង់ត្រមោចឯកឯងលើនាវាមានទឹកមុខក្រៀមក្រំជាពន្លឹក ខំប្រឹងសម្លឹងមើលត្រើយខាងលិច។ ទិដ្ឋភាពដ៏ស្រស់ឆើតឆាយនៃរាជធានីភ្នំពេញ បានអង្រួនបេះដូងក្រឡាហោមគង់ ឱ្យញាប់ ញ័ររន្ធត់ ទឹកភ្នែកហូរសស្រាក់ នឹកស្ដាយស្រណោះទឹកដី អាណិតខ្មែរដែលត្រូវបរទេសគាបសង្កត់។

កប៉ាល់បើកឃ្លាតពីវត្តឧណ្ណាលោម ឆ្ពោះត្រង់ទៅទិសខាងជើង។ ព្រះសុរិយាក៏ស្រឹបបាត់ទៅ មិនយូរប៉ុន្មានស្បៃអន្ធការ ក៏ចូលមកគ្របលើផែនពសុធាមើលអ្វីលែងឃើញទាំងអស់។ មុខគួរឱ្យសង្វេគពន់ពេក នៅលើ កប៉ាល់ក្រឡាហោមគង់ ដៃនិងជើងជាប់ច្រវាក់រើពុំរួច បានត្រឹមតែនិយាយតិចៗម្នាក់ឯង ៖ « ឱទឹកដីខ្មែរ ពេលខ្ញុំរលត់សង្ខារទៅ តើអ្នកនឹងទៅជាយ៉ាងណា។ ឪពុកម្ដាយបងប្អូនរួមលោហិត ប្រហែលជាមិនបានដឹងផងទេ។ នេះ គឺជាការព្យាបាទរបស់ជាតិបរទេស សូមឱ្យកូនខ្មែរស្នេហាជាតិទាំងឡាយ ខិតខំតស៊ូទាមតារឯករាជ្យឱ្យ បានជូនមាតុភូមិ »។

ការបាត់បង់វីរជនស្នេហាជាតិរូបនេះ បានធ្វើឱ្យព្រះសង្ឃ បញ្ញាវន្ត មហាជន។ល។ មានការសោកស្ដាយអាណិតអាសូរក្រៃលែង។ វីរភាពរបស់លោក បានបំផុសទឹកចិត្តកូនខ្មែរឱ្យក្រោកឈរឡើងនឹងពួកបរទេសឈ្លានពានវាតទីនិយមជាបន្តបន្ទាប់។ ក្រឡាហោមគង់ បានលាចាកលោកនេះមែន ប៉ុន្តែកិត្តិនាមនិងវីរភាពរបស់លោកបានមកសណ្ឋិតជាប់នឹងដួងព្រលឹងកូនខ្មែរជានិរន្ត(និរន្តរ៍ )។


ប្រសិនជាប្រិយមិត្តអ្នកស្ដាប់ទាំងអស់មានបំណងចង់ឧបត្ថម្ភគាំទ្រ និងលើកទឹកចិត្តចំពោះការផលិតអត្ថបទការស្ដាប់ជាសំឡេងរបស់ខ្ញុំ ក៏អាចចូលរួមឧបត្ថម្ភបានតាមរយៈ៖
គណនីអេស៊ីលីដាទាន់ចិត្ត ៖ 1287-0708-0
ឬ គណនីធនាគារអេស៊ីលីដា៖ 34760356300515

ឬ Facebook Page :   / edumediacambodia  

To get more news, knowledge and entertainment on
Facebook Page:   / edumediacambodia