Paxtakor tumanida pilla topshirish boshlandi

Описание: Paxtakor tumanida pilla topshirish boshlandi

Paxtakor tumanida 2025-yilgi pilla yetishtirish mavsumi boshlab yuborildi. Joriy yilda tumandagi pillakorlar tomonidan 1 609 quti ipak qurti urug‘i 248 ta xonadonda parvarishlanmoqda.

Har yili bo‘lgani kabi, bu yilgi mavsumda ham Paxtakor tumani pillakorlari viloyatda birinchilardan bo‘lib pilla topshirishni boshladi.

— 20 quti ipak qurti olib boqdik, — deydi Paxtakor mahallasida yashovchi Xujakulova Mavjuda. — Shartnoma bo‘yicha rejamiz 450 kilogramm edi. Qurtlarni yaxshi parvarish qildik, tut bargi bilan oziqlantirishni muntazam ravishda oshirib bordik. Hatto yarim tunda ham oziqlantirishni davom ettirdik. Natijada reja ortig‘i bilan bajarildi, yuzimiz yorug‘ bo‘ldi. Bundan tashqari, bir oylik faoliyatimiz uchun bir yillik mehnat staji yozildi. Shuningdek, bizga ajratilgan tut plantatsiyasi oralariga poliz va sabzavot mahsulotlari ekdik. Albatta, bu daromad ro‘zg‘orimiz farovonligiga xizmat qilmoqda. Xullas, pillachilik orqali mehnat staji ortmoqda, daromad ham yaxshi. Bundan juda mamnunmiz.

Paxtakor tumanidagi "Numonota" fermer xo‘jaligiga “Silk Expert Processing” MCHJ biriktirilgan bo‘lib, bu xo‘jalikda 7,5 quti ipak qurti parvarishlanib, 450 kilogramm pilla yetishtirish rejalashtirilgan. Turkiston hududidagi "Mirob Paxta" fermer xo‘jaligida esa 6,5 quti ipak qurti parvarishlanib, 380 kilogramm hosil kutilmoqda. Umumiy hisobda 830 kilogramm pilla yetkazib berilishi rejalashtirilgan.

Pilla qurtlarini parvarishlayotgan Usmonov Baxrom, Xo‘jaqulova Mavjuda va Usmonova Norgullar tomonidan viloyatda birinchilardan bo‘lib pilla topshirish ishlari boshlab yuborildi.

8-apreldan boshlab birinchi bosqichda 20 quti ipak qurti urug‘i tarqatilib, natijada 850 kilogramm hosil olindi. Har bir xonadon hosilini o‘z tarozisida tortib, haq to‘lovini shu joyning o‘zida oldi. Birinchi bosqichda 32 million so‘m daromad olgan Usmonova Norgullar opa, ikkinchi bosqichda yana 300 kilogramm pilla yetishtirib, 12 million so‘m daromad olishini, umumiy hisobda 40 kun ichida 44 million so‘m foyda ko‘rishini mamnuniyat bilan ta’kidladi.