«Երկրորդ շնչառություն»․ Ութ տարի Ալցհայմերի հիվանդների կողքին․ հիշողության սրճարանների փորձը 26.10

Описание: «Ալցհայմերի խնամք Հայաստան» կազմակերպությունն արդեն ութ տարի Հայաստանում գործունեություն է ծավալում՝ նպատակ ունենալով ստեղծել կայուն ծրագրեր ու ծառայություններ Ալցհայմերի հիվանդություն ունեցող անձանց, նրանց խնամողների և ընտանիքի անդամների համար։

«Աջակցության և հիշողության սրճարանները գործում են Երևանում, Գյումրիում, Վանաձորում, Աբովյանում, Արարատում և Էջմիածնում։ Աշխատում եմ, որ բոլոր հանդիպումներն ավարտվեն երգով ու երաժշտությամբ»,– ասում է Գյումրու հիշողության սրճարանի համակարգող, հոգեբան Արմենուհի Սարգսյանը։ Կարևորելով դեմենցիայի կանխարգելումն ու հիշողության խթանումը՝ նա նշում է, որ տարեցների հետ աշխատանքում կիրառում են տարբեր մեթոդներ՝ արտթերապիա, մանդալաթերապիա, ասոցիատիվ քարտեր և այլն։

Արարատի հիշողության սրճարանի համակարգող, հոգեբան Լուսինե Կարապետյանի խոսքերով, պատասխանատվությունը շատ մեծ է այդ տարիքի մարդկանց հետ աշխատելիս՝ հատկապես Արցախից բռնի տեղահանված, այդքան ցավ ու դառնություն տեսած մեր հայրենակիցների պարագայում։ «Հանդիպումների ընթացքում փորձում ենք այնպես անել, որ տարեցները գոնե մի փոքր հանգստություն ունենան իրենց հույզերում և խոսքում, ուրախանան, կտրվեն ծանր հիշողություններից»,– ասում է հոգեբանը։

Մասնագետները համոզված են՝ մտքով ու մարմնով առողջ ծերանալու համար անհրաժեշտ է ապրել հագեցած ու հետաքրքիր կյանքով և հետևել առողջությանը։