ကြက်တောင်ပံ တုန်ယမ်းဟင်းချို

Описание: ကြက်တောင်ပံ တုန်ယမ်းဟင်းချို
၄ ယောက်စာ
ကြာချိန် - ၃၀ မိနစ်

ထိုင်းတုန်ယမ်းဟင်းချိုကို အသား၊ ငါး၊ ပင်လယ်စာတို့နဲ့ ချက်ပြုတ်နိုင်ပါတယ်။ သို့ပေမဲ့ ပုစွန်တုန်ယမ်းဟင်းချိုကိုတော့ နိုင်ငံတကာမှာ အကြိုက်များပါတယ်။ ထိုင်းဟင်းချက်ငရုတ်သီးနှစ်၊ ပုစွန်၊ အုန်းနို့၊ ဟင်းခတ်ရွက်တွေနဲ့ ခပ်ပြင်းပြင်းပြည့်ပြည့်ဝဝရှိလှတဲ့ အနံ့အရသာကြောင့်လို့ ထင်ပါ
တယ်။ ခုချက်ပြတဲ့ တုန်ယမ်းဟင်းချိုကိုတော့ ကြက်တောင်ပံ(drumettes) နဲ့ ချက်ပြထားပါတယ်။ ထိုင်းဟင်းချက်ငရုတ်သီးအနှစ်၊ အုန်းနို့ မသုံးထားပါဘူး။ အစပ်အတွက် ငရုတ်သီးအနီအခြောက်တောင့်ကို သုံးထားပါတယ်။ အရိုးလွတ်ကြက်သားသုံးမယ်ဆိုရင်တော့ ဟင်းခတ်မှုန့်လိုပါမယ်။ ကြည့်လိုက်ကြရအောင်။
ပါဝင်ပစ္စည်းများ
ရေ - ၁.၅လီတာ
ကြက်တောင်ပံ - ၆၀၀ ဂရမ်
ကြက်သွန်နီ - ၆၀ ဂရမ်
ငံပြာရည် - စားပွဲဇွန်း ၄ ဇွန်း
သကြား - လက်ဖက်ရည်ဇွန်း ၃ ဇွန်း
ငရုတ်သီးအနီအခြောက်တောင့် - ၅ တောင့်
စပါးလင် - ၂ ချောင်း (အရင်းပိုင်း ၂ လက်မ အရွယ်)
ပတဲကော - ပါးပါးလှီးထားတာ ၁၀ ခု
ရှောက်ဘီလူးရွက် ၁၀ ရွက်
အောက်စတာမှို - ၁၀၀ ဂရမ်
ခရမ်းချဉ်သီး - ၂၀၀ ဂရမ်(လေးစိတ်စိတ်ပါ)
သံပရာရည် - စားပွဲဇွန်း ၃ ဇွန်း
နံနံပင် - ၁၀ ဂရမ် (နုပ်နုပ်စဉ်း)
ပြုလုပ်နည်း
အိုးတစ်ခုတွင် ရေထည့်ပြီး ဆူသည်အထိတည်ပါ။ ရေဆူလာလျှင် ကြက်သား၊ ကြက်သွန်နီ၊ ငံပြာရည်၊ သကြား အစဉ်လိုက်ထည့်ပြီး မီးအနေတော်ဖြင့် ကြက်သားနူးလာသည်အထိ မိနစ်၂၀ ခန့်တည်ပါ။
ကြက်သားတည်ထားစဉ် ငရုတ်သီးအနီအခြောက်တောင့်ကို အနံ့မွှေးလာသည်ထိ လှော်ပါ။
ကြက်သားကျက်ပါက လှော်ထားသော ငရုတ်သီးအနီအခြောက်တောင့်( အစပ်ကြိုက်လျှင် အစေ့များခွဲခြမ်းပြီး များများထည့်နိုင်ပါတယ်)။ စပါးလင်၊ ပတဲကော၊ မှိုထည့်ပါ။ ရှောက်ဘီလူးရွက် အနံ့ထွက်လာသည်ထိ ခြေမွပြီး ထည့်ပါ။ မီးအနေတော်ဖြင့် ၇ မိနစ်ခန့် တည်ပါ။
ထို့နောက် ခရမ်းချဉ်သီး ထည့်ပါ။ နူးလာအောင်၂ မိနစ်ခန့်တည်ပါ။ ခရမ်းချဉ်သီးများ အရောင်ဖျော့သွားပြီး ပုံစံမပျက်ပါစေနဲ့။ မီးပိတ်ပြီး သံပရာရည်ထည့်ပါ။ အရသာမြည်းပြီး လိုအပ်ပါက ငံပြာရည်၊ သကြား၊ အချဉ် လိုက်ပါ။ အချိုအရသာထက်စာရင် အငန်၊ အချဉ် အရသာ ပိုပေါ်လွင်ဖို့ လိုပါမယ်။ နံနံပင်ဖြင့်ထည့်ပြီး အရသာရှိရှိ သုံးဆောင်နိုင်ပါပြီ။

#Taste_Window_Food_Magazine
#Half_Potato_Food_Television
#ကြက်တောင်ပံတုန်ယမ်းဟင်းချို