RAIS DKT. HUSSEIN ALI MWINYI AUZINDUA MJI WA DKT. HUSSEIN MWINYI MOMBASA

Описание: Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, ameuzindua rasmi Mji wa Dkt. Hussein Mwinyi uliopo Mombasa, Mkoa wa Mjini Magharibi, na kuutaka Mfuko wa Hifadhi ya Jamii Zanzibar (ZSSF) kujikita katika utekelezaji wa miradi mikubwa yenye tija kwa maendeleo ya Taifa.

Rais Dkt. Mwinyi ameyasema hayo leo tarehe 23 Disemba 2025 wakati wa uzinduzi wa mji huo uliofanyika ikiwa ni sehemu ya shamrashamra za maadhimisho ya Miaka 62 ya Mapinduzi ya Zanzibar. Amesema miradi ya aina hiyo ni nguzo muhimu katika kuboresha maisha ya wananchi na kuimarisha uchumi wa Zanzibar.

Aidha, amewataka wananchi kuwa tayari kwa mabadiliko pale Serikali inapotekeleza miradi mikubwa ya maendeleo, ikiwemo ujenzi wa nyumba za makaazi, kwa kuunga mkono juhudi za Serikali. Amehakikishia kuwa hakuna mwananchi atakayodhulumiwa haki yake endapo atatoa eneo lake kwa ajili ya utekelezaji wa miradi ya maendeleo.

Uzinduzi wa nyumba za gharama nafuu katika mji huo umeenda sambamba na uzinduzi wa Msikiti mpya wa Masjid Balad Salaam uliojengwa katika eneo hilo.

Kwa upande wake, Waziri wa Fedha, Dkt. Juma Malik Akili, amempongeza Rais Dkt. Mwinyi kwa kutekeleza kwa vitendo ahadi anazozitoa kwa wananchi, akisema hatua hiyo inathibitisha dhana ya uongozi unaoacha alama chanya kwa kizazi cha sasa na kijacho.

Akitoa taarifa ya kitaalamu ya mradi huo, Katibu Mkuu wa Wizara ya Fedha na Mipango, Dkt. Rahma Salim Mahfoudh, amesema mradi umegharimu shilingi bilioni 34 na unajumuisha majengo 14 ya ghorofa tano kila moja, yenye jumla ya nyumba 276 za kisasa. Amesema mradi huo umejengwa na Kampuni ya CRJE kutoka China.

#Mapinduzi62
#MaendeleoZanzibar
#NyumbaZaGharamaNafuu
#UongoziUnaoachaAlama
#ZSSF