مراجعة مسلسل The Manipulated (2025) | افضل مسلسل كوري جديد

Описание: مراجعة مسلسل The Manipulated الظلم على أقصى مستوياته! (مستوحى من Fabricated City)
كم مرة شفت فيلم أو مسلسل وحسيت إنو العدالة ماتت؟ تخيل إنك تصحى تلاقي حالك متهم بجريمة قتل، وكل الأدلة ضدك، وكل اللي حواليك عم يتلاعبوا بمصيرك! المسلسل الكوري الجديد The Manipulated بياخد هي الفكرة وبيخليك تشوف التلاعب والظلم بمستوى جديد كلياً!
هذا المسلسل الكوي بيجي بـ 12 حلقة من إنتاج شركة Disney+، واللي هو بالحقيقة مستوحى من الفيلم القوي فابْريكيتِد سيتي (Fabricated City) لعام 2017، لكن هالمرة القصة أعمق وأشمل بتفاصيل جديدة كلياً! المسلسل الكوري الجديد بيحطنا فوراً بقلب الحدث مع شخصية بارك تاي جونغ (Park Tae-Joong)، اللي بيلعب دورو النجم جي تشانغ ووك (Ji Chang Wook). هذا الشب كان إنسان عادي، ليلاقي حالو فجأة متورط ظلماً بجريمة قتل شنيعة، وتتحول حياتو لحياة سجين ضحية مؤامرة.
هون بتشوف القصة بأقسى صورها، وهي الشرارة اللي بتخلي تاي جونغ يتحول من ضحية لشخص قرر إنو يكسر كل الحدود مشان يبدأ رحلة انتقام شرسة ضد الشخص أو الجهة اللي تلاعبت بحياتو، وعلى رأسها آن يو هان (An Yo-Han)، اللي بيجسد دورو النجم دو كيونغ سو (Doh Kyung Soo / EXO's D.O.)، اللي عم يقدم أول دور شرير له بشخصية متلاعبة وباردة القلب.
The Manipulated عمل فني كوري بيستاهل المشاهدة وكل ثانية منه مهمة، لأنو الكتابة ممتازة من الكاتب أوه سانغ-هو (Oh Sang Ho). رغم إنو فكرة الظلم والانتقام مو جديدة، طريقة معالجة الكاتب والسيناريو خلت المشاهدة ممتعة ومختلفة. اللي شدني فعلاً هو الإيقاع السريع جداً والحبكة المكثفة! ما في ولا لحظة ملل، الأحداث بتضل عم تتسارع، والقصة بتطور بشكل طبيعي ومقنع. المسلسل من أول أربع حلقات بيضرب بالعمق مباشرة، بيورجيك قصة شخص بريء عم يتفتت تدريجياً، وهاد الشي بيعمل ضغط نفسي مهول على المشاهد بيخليه ما يقدر يوقف.
أداء جي تشانغ ووك كان قوي جدا ومبهر. كل مشاعر السعادة، الخوف، اليأس، الألم، الحزن، الإرهاق، والقوة، والشغف المتفجر... كلها تم تجسيدها منو بعمق ودقة لا توصف. هذا الدور تحديداً نقلو لفئة ثانية من الممثلين. كمان الشخصية السايكوباثية بالمسلسلات الكورية بالعمل، اللي بتحرك كل خيوط التلاعب والمؤامرات، تم تنفيذها بإتقان عالي
المسلسل الكوري هاد ما اكتفى بالتشويق النفسي والأداء القوي، لأ! كمان قدم لنا جرعة محترمة من الأكشن والقتال اللي بتستاهل الوقفة. مشاهد الأكشن هون كانت جبارة ومُنفّذة بحرفية عالية جداً. ما بتحس إنك عم تشوف مسلسل تلفزيوني عادي، بالعكس تماماً، بتحس إنك عم تشوف فيلم أكشن ضخم، وهاد الشي نابع من الجودة السينمائية القوية للعمل ككل. الأكشن هون مو مجرد إثارة، الأكشن هون كان ثمن الظلم والقهر!
هاد الأكشن ما كان ممكن يوصلنا بهالقوة لولا عبقرية المخرج كيم تشانغ-جو (Kim Chang Ju)، اللي عرف تماماً كيف يستخدم الكاميرا لخدمة القصة والمشاعر. السينماتوغرافيا (جودة الصورة والدقة) كانت على أعلى مستوى. الألوان الباردة والمشاهد المظلمة عكست حالة الضياع والقهر اللي عاشها البطل. كمان لازم نذكر دور الممثل لي كوانغ سو (Lee Kwang Soo) اللي بيجسد دور بايك دو كيونغ (Baek Do Kyung)، وشخصية نو إيون بي (Noh Eun Bi) اللي بتلعب دورها جو يون سو (Jo Yoon Su) كحليفة للبطل في رحلتو للانتقام. الموسيقى التصويرية كانت مؤثرة جداً وتستاهل الإشادة، وكان إلها دور كبير بـ إشعال موجة قوية من العواطف.
الكوتش إياد الصالح: بصراحة وبدون مجاملة: المسلسل هو عبارة عن تحفة فنية، وهو تجربة بتستاهل وقتك. إذا كنت عم تبحث عن سلسلة مشوّقة، غنية عاطفياً، وما بتقدر تتنبأ بأحداثها، وبتورجيك أقصى درجات الظلم وقوة الإرادة... فهاد المسلسل هو خيارك الأكيد. أنا عم أوصي فيه بكل ثقة! تقييمي النهائي للمسلسل هو 9/10
==================================
حسابي في الانستقرام 👇👇👇
  / cinemania_93  

حسابي في التيكتوك 👇👇👇
  / cinemania93  

===================================
قناتي الثانية المختصة في رياضة كمال الاجسام 👇👇👇
   / @dopafit  

===================================
#اياد_الصالح #كينومانيا #themanipulated #kdrama #كيدراما