Տեր Տիրատուր քհն.: Խորհրդածություն Մեծ Պահքի ԻԴ (24-րդ) օրը: Ելք 3,16–22

Описание: 11.03.2026 / Շտուտգարտ
Խորհրդածություն Մեծ Պահքի ԻԴ (24-րդ) օրը
Ելք 3,16–22

Այսօր Մեծ Պահքի միջինքն է: Առաջին շաբաթներն արդեն մեր ետևում են՝ գիտակցված ժուժկալության, ջերմեռանդ աղոթքի և ներքին ինքնաքննության շաբաթներ: Մեզանից ոմանք արդեն զգում են մարիմնի հոգնածությունը: Մեր ներքին ձայնը կարծես հարցնում է՝ արդյոք այս ամենն իսկապես օգուտ ունի՞, արդյոք ապաշխարությունը չափազանց ծա՞նր չէ, արդյոք փափագած ազատությունն իսկապե՞ս մոտենում է: Հենց մեր անցած անապատային ճանապարհի կեսին է, որ Աստված խոսում է մեզ հետ մորենու միջից:

«Արդ, գնա հաւաքի՛ր իսրայէլացի ծերերին ու նրանց ասա՛. “Ձեր հայրերի Տէր Աստուածը՝ Աբրահամի Աստուածը, Իսահակի Աստուածը եւ Յակոբի Աստուածը, երեւաց ինձ ու ասաց. ես այցելեցի ձեզ ու գիտեմ, թէ ինչ բաներ պատահեցին ձեզ հետ Եգիպտոսում:» (հմմտ. Ելք 3,16–17):

Աստված չի ասում. «Լսել եմ, որ ձեզ վատ է պահում»:
Նա ասում է. «Ես գիտեմ, ես տեսել եմ այդ ամենը»:
Նա չի ասում. «Մի օր կգամ, կօգնեմ»:
Նա ասում է. «Ես եկա, որպեսզի ձեզ դուրս հանեմ ձեր ստրկությունից»:

Սա է այն առանցքը, որ Մեծ Պահքի ընթացքում նորից ու նորից սովորում ենք հավատալ. Աստված հեռավոր դիտորդ չէ: Նա տեսնում է, նա գիտի ամեն ինչ: Նա ուշադրությամբ հետևում է: Նա տեսնում է այն, ինչ մենք երբեմն հազիվ ենք համարձակվում տանել՝ մեր ներքին ու արտաքին ստրկությունները, մեր հին վերքերը, մեր գերությունն ու կախվածությունը սովորություններից, ոխից, վախից, կրքից, դատարկությունից:

Եվ որովհետև Նա տեսնում է, ուրեմն նաև գործում է: Բայց ոչ թե մեր ժամանակացույցով, ոչ թե արագության մեր պատկերացումներով, բայց Նա գործում է:

Ելից Գրքի 3-րդ գլխի 19–22-րդ համարներում Մովսեսին մի բան է հայտնվում, որ առաջին հայացքից գրեթե գայթակղիչ է հնչում. Փարավոնը չի կամենա ժողովրդին բաց թողնել, «բայց հզօր մի ձեռք կստիպի նրան» (հ. 19): Եվ ապա հետևում է հայտարարությունը, որ իսրայելացի կանայք իրենց եգիպտացի հարևանուհիներից արծաթ, ոսկի և հանդերձներ պիտի խնդրեն և կստանան դրանք (հ. 21–22):

Հայրերն այստեղ հաճախ տեսնում էին արդար հատուցման նշան. ինչից որ իսրայելացիները տասնամյակներ շարունակ զրկված էին եղել՝ իրենց վարձից ծանր գործի համար, այժմ Աստված հրաշքով վերադարձնում է նրանց: Եգիպտոսն ինքն իրեն կողոպտում է, որովհետև Աստված այդպես է տնօրինում:

Սակայն մեզ համար այս հատվածը ավելի խորունկ իմաստ ունի: Պահքի ընթացքում մենք մերկանում ենք շատ բաներից՝ ավելորդ ցրվածություններից, մտքերի, ժամանակի, հույզերի ավելորդ բեռից:
Եվ հենց այս մերկացման մեջ է, որ Աստված պատրաստում է մեզ նոր հանդերձներով զարդարել՝ ոչ թե «Եգիպտոսի» կամ ստրկության հին աղբով, այլ շնորհքով, զորությամբ, ազատությամբ և ուրախությամբ, որ այս աշխարհից չէ:

Մեծ Պահքի միջինքը հաճախ այն վայրն է, որտեղ փշրվում է այն պատրանքը, թե մենք ինքներս կարող ենք մեզ ազատել: Մովսեսը պիտի սովորեր. ես չեմ Փրկիչը: Աստված է Փրկիչը: Ես միայն պատգամաբերը կարող եմ լինել: Ես կարող եմ միայն գնալ և ասել. Նա գիտի, Նա տեսնում է:

Եկեք այս օրերին կանգնենք Աստծո առաջ և ասենք Նրան. «Տե՛ր, Դու ուշադրությամբ հետևում ես ինձ: Տեսնում ես, թե որտեղ եմ ես դեռ գերի մնացել: Տեսնում ես իմ հոգնածությունն ապաշխարության մեջ: Տեսնում ես իմ գաղտնի զիջումները: Օգնիր ինձ ազատվել իմ բեռից, իմ ստրկությունից»:

Հավատանք, որ Նա արդեն իսկ սկսել է մեզ դուրս հանելու գործը, անգամ եթե մեր ներսի Փարավոնը (մեր հին եսը, մեր կրքերը, մեր վախերը) դեռ բարձրաձայն «ո՛չ» է ասում այդ փրկությանը:

Աղաչենք Նրան, որ նորովի պարգևի մեզ Իր շնորհքի «ոսկին ու արծաթը», անմահության հանդերձը, որ Զատկի առավոտյան պիտի ընդունենք իր ողջ լիությամբ:

Աղոթք
Աստվա՛ծ մեր հայրերի,
Դու Մովսեսին կանչեցիր մորենու միջից
և Իսրայելին ազատեցիր Եգիպտոսից:
Դու մեզ նույն ուշադրությամբ հետևում ես,
տեսնում ես այսօր՝ մեզ մեր անապատի մեջ,
մեր տկարության մեջ:
Մովսեսի վստահությունը շնորհիր մեզ.
որ Դու ոչ միայն տեսնում ես, այլև գործում ես:
Թույլ մի՛ տուր, որ ճանապարհի կեսից ետ դառնանք:
Վերացրո՛ւ այն ամենը, ինչ դեռ գերի է պահում մեզ,
և նորովի զգեստավորի՛ր մեզ
Քո զորությամբ և Քո ուրախությամբ:
Հանուն Քրիստոսի՝ մեր Տիրոջ,
Ով Խաչի վրա ազատագրեց մեզ
և իր մահվան երրորդ օրը,
Իր հարությամն մեզ պարգևեց
Աստծո զավակներ լինելու ազատությունը:
Ամեն:

Տերը օրհնի ձեզ և պահպանի ձեզ Մեծ Պահքի այս սուրբ ընթացկին: Նա Իր երեսը պայծառացնի ձեզ վրա և շնորհի ձեզ Իր խաղաղությունը՝ Նրա խաղաղությունը, Ով արդեն գիտի, թե ինչպես է ավարտվում խաչի ճանապարհը, Ով գիտի, որ վերջում Հարություն կա մեռելներից:

-
Besuchen Sie uns auch bei:

Facebook Seite:   / agbw.org  
Instagram:   / channel  
Twitter:   / agbw1973  
Lintr.ee: https://linktr.ee/diradur
Web: https://www.agbw.org/