ဒဏ္ဍာရီထဲက ဒေါ်သုဓ္ဓမဝတီ (ခေါ်) ဆရာကြီးသမီးချစ် (2)

Описание: ဗုဒ္ဓစာပေ သင်ကြားခွင့်ခွင့်ရချင်တဲ့အတွက် ပျင်းပြသောစိတ်ဆန္ဒနဲ့ အခက်အခဲအမျိုးမျိုးကို ကျော်ဖြတ်ပြီး မြန်မာပြည်ကို မရောက်အရောက်လှမ်းခဲ့တဲ့ နီပေါနိုင်ငံသူ သီလရှင်ဆရာကြီး ဒေါ်သုဓမ္မဝတီ ခေါ် သမီးချစ်အကြောင်းဖြစ်ပါတယ်။

သီလရှင်ဆရာကြီး ဒေါ်သုဓမ္မဝတီဖြစ်လာမယ့် ဂဏေသ ကုမာရီဆိုတဲ့လုံမပျိုကို နီပေါနိုင်ငံမြို့တော် ခတ္တမန္ဒူမြို့နဲ့ ၄ မိုင်အကွာ လလိတပူရမြို့မှာ ၁၉၃၇ ခုနှစ်က မွေးဖွားခဲ့ပါတယ်။ မွေးချင်းမောင်နှမလေးဦးအနက် တဦးတည်းသောသမီးမိန်းကလေးဖြစ်တာမို့ ဖခင်နဲ့ မိခင်တို့က ချစ်လွန်းအားကြီးလို့ သမီးချစ်လို့သာ ခေါ်ခဲ့ကြပါတယ်။ သမီးချစ်ဟာ ငယ်စဉ်ကတည်းက ဘာသာရေးကိုင်းရှိုင်းပြီး အရွယ်နဲ့မလိုက်အောင် တည်ငြိမ်ရင့်ကျက်သူတဦး ဖြစ်ပါတယ်။
သမီးချစ်တို့ရဲ့ မိဘတွေဟာ မဟာယန ဗုဒ္ဓဘာသာတွေဖြစ်ပေမယ့် မြန်မာပြည်ကပြန်လာတဲ့ နီပေါ ထေရဝါဒ ရဟန်းတော် အရှင်သီရိ ဗုဒ္ဓဃောသနဲ့တွေ့ရှိပြီးနောက်မှ ထေရဝါဒဘက်ကို ကူးပြောင်းလာခဲ့ကြတာပါ။

မိခင်ဖြစ်သူက ၁၂ အရွယ် သမီးချစ်ကို ကျောင်းကနေထုတ်ပြီး အရှင်ဗုဒ္ဓဃောသထံအပ်နှံပြီး ဗုဒ္ဓစာပေများ သင်ကြားစေခဲ့ပါတယ်။ ဉာဏ်ကောင်းတဲ့သမီးချစ်ဟာ ဗုဒ္ဓဃောသထံမှာ တနှစ်ကြာမျှ သင်ကြားပြီးတဲ့နောက်မှာတော့ ပါဠိစာပေကို ရေးနိုင်၊ ပြောနိုင်တဲ့အထိ တတ်မြောက်လာခဲ့ပါတယ်။ ဒီလိုသင်ကြားနေရင်း ဆရာဖြစ်သူ ဗုဒ္ဓဃောသက သာသနာရေးကိစ္စနဲ့ ကုသိနာရုံကို ရွှေ့ပြောင်းသတင်းသုံးတဲ့အတွက် သမီးချစ်အဖို့ လှေလှော်ရင်း တက်ကျိုးဆိုသလို ဗုဒ္ဓစာပေကျမ်းဂန်တွေ သင်ကြားခွင့် ရပ်ဆိုင်းသွားခဲ့ရပါတယ်။ မိဘတွေက ချမ်းသာကြွယ်ဝသူတွေဖြစ်တာကြောင့် သမီးကို လိုလေသေးမရှိ ပြုစုပျိုးထောင်ပေးခဲ့ပေမယ့် ဗုဒ္ဓစာပေသင်ကြားခွင့်မရတဲ့ သမီးချစ်ဟာ ချမ်းသာမှုမှာ မပျော်မွေ့နိုင်ဘဲ ဖြစ်နေပါတော့တယ်။

ဒီလိုနေရင်းက ၁၉၅၁ ခုနှစ်မှာ သမီးချစ်တို့နေရပ်ကို မြန်မာဘုန်းတော်ကြီး ဦးဓမ္မဝုဓ က နိဗ္ဗာန်ရောက်ကြောင်း တရားလာဟောခဲ့ပါတယ်။ အသက် ၁၄ နှစ်အရွယ် သမီးချစ်လေးဟာ မြန်မာဘုန်းတော်ကြီးရဲ့တရားကို နာကြားရပြီး ဗုဒ္ဓစာပေသင်ကြားလိုသောစိတ်တွေက တားဆီးမရနိုင်အောင် ဖြစ်ရပါတော့တယ်။

“ဗုဒ္ဓစာပေကို သင်ကြားချင်ပါလျက် သင်ကြားခွင့်မရတာ လောကမှာ အဆင်းရဲဆုံးပါပဲ အရှင်ဘုရား”လို့ သမီးချစ်လေးက ဘုန်းတော်ကြီးကို လျှောက်ထားခဲ့ပါတယ်။ ဒီအသက်အရွယ်နဲ့ ဒီလိုလျှောက်တင်တဲ့ သမီးချစ်အပေါ် ဂရုဏာသက်မိတာကြောင့် ဘုန်းတော်ကြီး ဦးဓမ္မဝုဓ က ဗုဒ္ဓစာပေများကို သင်ကြားပေးခဲ့ပါတယ်။

ဒီလိုသင်ကြားနေရင်း ၃ လလောက်ကြာတဲ့အခါ ဦးဓမ္မဝုဓဟာ မြန်မာနိုင်ငံကို ပြန်ကြွဖို့အကြောင်းဖန်လာခဲ့ပါတယ်။ တကယ်လို့များ ဗုဒ္ဓရဲ့စာပေကို သင်ကြားချင်ရင် မြန်မာနိုင်ငံကိုလိုက်ခဲ့ဖို့နဲ့ မြန်မာနိုင်ငံမှာရှိတဲ့ သီလရှင်စာသင်တိုက်ကြီးတခုမှာ အပ်နှံပေးမယ်လို့ ဘုန်းတော်ကြီးက မိန့်ကြားခဲ့ပါတယ်။

သမီးချစ်လေးဟာ ဘုန်းတော်ကြီးရဲ့ မိန့်မှာခဲ့တာကို ကြားရပြီးနောက် မြန်မာနိုင်ငံကို သွားရောက်ချင်စိတ်တွေ တဖွားဖွားပေါ်လာခဲ့ပါတယ်။

အခွင့်အရေးပေးလာတဲ့တရက်မှာ မြန်မာပြည်ခရီးကို သူငယ်ချင်း ၂ ယောက်နဲ့အတူ စတင်ခဲ့ပေမယ့် တကယ့်ကို ခရောင်းလမ်းကို ဖြတ်သန်းခဲ့ရတာပါ။ ဗီဒီယိုမှာ အသေးစိတ်ရှင်းပြထားပါတယ်။ နိုငယ်တဲ့ မိန်းကလေးတယောက်အနေနဲ့ ဗုဒ္ဓစာပေကျမ်းဂန်သင်ယူချင်စိတ်တခုတည်းနဲ့ အခက်အခဲမျိုးစုံကြားက မြန်မာပြည်ဆီခရီးနှင်ခဲ့တဲ့ တကယ့်ခရီးကြမ်းကြီးဖြစ်ခဲ့ရပါတယ်။

နောက်ဆုံးမှာတော့ နီပေါသူ ဆရာလေး သမီးချစ်ဟာ မော်လမြိုင်မြို့ ကျိုက်သလ္လံစေတီအနီးက ခေမာရာမ သီလရှင်စာသင်တိုက်ကြီးမှာ ဗုဒ္ဓစာပေကို အဆင့်မြင့်မြင့် သင်ကြားခွင့်ရခဲ့ပါတယ်။ သီလရှင်ဘွဲ့ကတော့ မသုဓမ္မဝတီ ဖြစ်ပါတယ်။ ဒါပေမဲ့ အများကတော့ မနီပေါလို့ပဲ ချစ်စနိုးခေါ်ကြပါတယ်။ သူ အနှစ်နှစ်အလလ တောင့်တခဲ့ရတဲ့ ဗုဒ္ဓစာပေတွေ သင်ယူခွင့်ရခဲ့တဲ့နောက်မှာတော့ ၁၉၆၂ ခုနှစ် ဒီဇင်ဘာ ၂ ရက်နေ့ အသက် ၂၅ နှစ်အရွယ်မှာ သာသနာ့ဓဇဓမ္မစရိယဘွဲ့ကို ရရှိခဲ့ပါတယ်။ မြန်မာနိုင်ငံမှာ ဗုဒ္ဓစာပေကို ၁၄ နှစ်ကြာ သင်ကြားပြီးတဲ့နောက်မှာတော့ သမီးချစ်တဖြစ်လဲ မသုဓမ္မဝတီဟာ ပဋိယတ် ပဋိပတ် စွယ်စုံတတ်တဲ့ သီလရှင်ဆရာလေးအဖြစ်နဲ့ အမိတိုင်းပြည် နီပေါဆီကို ပြန်လည်ကြွသွားခဲ့ပါတယ်။

တချိန်က မြန်မာနိုင်ငံသွားဖို့ ခါးခါးသီးသီး ငြင်းဆန်ခဲ့တဲ့ ဖခင်ဖြစ်သူက သမီးဖြစ်သူအတွက် ခတ္တမန္ဒူမြို့မှာ မြေဝယ်ပြီး သီလရှင်ကျောင်း ဆောက်လုပ်လှူဒါန်းခဲ့ပါတယ်။ သမီးချစ်တဖြစ်လဲ ဒေါ်သုဓမ္မဝတီဟာ အဲဒီသီလရှင်စာသင်တိုက်မှာ ထေရဝါဒ ပဋိယတ္တိစာပေတွေပို့ချနေစဉ် ဒေါ်အောင်ဆန်းစုကြည်ဟာ မိခင်ဖြစ်သူ နီပေါနိုင်ငံဆိုင်ရာ မြန်မာသံအမတ်ကြီး ဒေါ်ခင်ကြည်နဲ့အတူ ၁၉၆၂ ခုနှစ်မှာ သူမရဲ့ ကျောင်းတိုက်ကို လာရောက်ဖူးမြော်ခဲ့ပါတယ်။

ဒေါ်အောင်ဆန်းစုကြည်ရဲ့ ခင်ပွန်း ဒေါက်တာမိုက်ကယ်အဲရစ်တယောက် မဟာယာနဗုဒ္ဓဘာသာနဲ့ ပီအိပ်ချ်ဒီဘွဲ့ယူဖို့အတွက် သုတေသနစာတမ်းပြုစုဖို့ တိဗက်ဘုန်းတော်ကြီးကျောင်းတွေကို လှည့်လည်သွားရောက်ခဲ့တဲ့ ကာလတလျှောက် ၁၉၇၂ ခုနှစ်အတွင်းမှာ ဒေါ်အောင်ဆန်းစုကြည်ဟာ သားဦး အလဇန္ဒားလေးနဲ့အတူ ဒေါ်သုဓမ္မဝတီရဲ့ကျောင်းမှာ ၆ လကြာ တည်းခိုနေထိုင်ခဲ့ပါတယ်။

နောက်ပိုင်း ဒေါ်အောင်ဆန်းစုကြည် နိုင်ငံတော်အတိုင်ပင်ခံပုဂ္ဂိုလ်ဖြစ်လာခဲ့ပြီးနောက် ၂၀၁၆ ခုနှစ်မှာလည်း ဒေါ်သုဓမ္မဝတီထံ တတိယအကြိမ်မြောက် သွားရောက်ဖူးမြော်ခဲ့ပါသေးတယ်။

ဒေါ်သုဓမ္မဝတီ ခေါ် ဆရာကြီး သမီးချစ်ဟာ နီပေါနိုင်ငံမှာ ဓမ္မကိတ္တိဝိဟာသီလရှင်စာသင်တိုက်ကြီးတည်ထောင်ပြီး ထေရဝါဒပဋိယတ္တိစာပေတွေ သင်ကြားပေးနေသလို ရန်ကုန်မြို့ မြောက်ဥက္ကလာပမြို့နယ်မှာလည်း နီပေါ သီလရှင်စာသင်တိုက်ကိုလည်း တည်ထောင်ထားပါတယ်။

အာဂဗုဒ္ဓရဲ့သမီးတော်တပါးဖြစ်တဲ့ ဆရာကြီးသမီးချစ် (ခေါ်) ဒေါ်သုဓမ္မဝတီနဲ့ပတ်သက်လို့ မြန်မာစာအုပ်စာပေ အနည်းအကျဉ်းသာရှိသေးပြီး သိရှိသူနည်းပါးနေပါသေးတယ်။ ဆရာကြီး သမီးချစ် (ခေါ်) ဒေါ်သုဓမ္မဝတီဟာ လက်ရှိ သက်တော် ၉၆ နှစ်အရွယ်ရှိပြီဖြစ်ကာ နီပေါနိုင်ငံမှာ သက်ရှိထင်ရှား နေထိုင်လျက်ရှိကြောင်း မျှဝေတင်ဆက်ပေးလိုက်ရပါတယ် ခင်ဗျား။