Xurshid Davron va Azim Mullaxonovning "Ota" qo‘shig‘ini "Zamondosh" ko‘rsatuvida eslashdi (14.12)

Описание: Хуршид Даврон ва Азим Муллахоновнинг "Ота" қўшиғини "Замондош" кўрсатувида эслашди (14.12.2025) “Маданият ва маърифат” телеканали / Xurshid Davron va Azim Mullaxonovning "Ota" qo‘shig‘ini "Zamondosh" ko‘rsatuvida eslashdi (14.12.2025) “Madaniyat va ma’rifat” telekanali

Қўшиққа асос бўлган Хуршид Даврон шеъри 1982 йилда ўғли Темур 1 ёшга тўлганда ёзилган / Qo‘shiqqa asos bo‘lgan Xurshid Davron she'ri 1982 yilda o‘g‘li Temur 1 yoshga to‘lganda yozilgan.

* *

Ota haqidagi she’rga to‘xtalmoqchi bo‘lsam, yuragimda bir armon chuqur iz qoldirgan. Men Germaniya degan yurtning sharqiy qismida harbiy xizmatda burchimni o‘tab yurgan paytda, otam vafot etganlar. Uzoq mamlakatdan salkam bir oy deganda otam mozori boshiga kela olganman.

Men otamning erka o‘g‘li bo‘lganman. Otamdan erta ajralish hissi, so‘nggi lahzalarda yonlarida bo‘lmaganim, tobutlarini ko‘tarmaganim armon bo‘lib qolgan.. Oradan ancha vaqt o‘tgandan keyin o‘g‘illik bo‘lganimda, mana shu nevaralarni bir ko‘rsalar edi, degan achchiq o‘y uyg‘ongandi yurakda. Endi bu insoniy bir dard. Ana shunda yozilgan bu she’r.

Ota-onam haqida ko‘p she’rlar yozganman. Faqat shu she’rim qo‘shiqqa aylandi. Bu she’rning qo‘shiq bo‘lishi ham tasodif. Taniqli qo‘shiqchi Azim Mullaxonov mashinada ketayotib, allaqaysi jurnalni varaqlab o‘tirgan-da, shu she’rni o‘qib varaqni yirtib olgan-da, keyin o‘sha kuniyoq kuy bastalab, qo‘shiq qilgan (Xurshid Davron bilan suhbatdan).

* *

Derazamning ostida tongda
Sayragan qush sizmasmi, ota?

Yo to‘nimga ko‘klam, mozorda
Yopishgan gul sizmasmi, ota?

O‘n yildir-ki dunyoda yo‘qsiz,
Yuragimda alamli cho‘g‘siz.

Ko‘rmagansiz mening o‘g‘limni,
Erkatoyim, sho‘xim, to‘qlimni.

Men ham yoshim oshgani sayin
Boshimga oq tushgani sayin

Ba’zan qo‘msab sizni ich-ichdan,
Yurak titrab sog‘inch,ilinjdan,

Otam deya, alqab o‘g‘limni,
Ko‘taraman o‘zim ko‘nglimni.

1982

* *

Ота ҳақидаги шеърга тўхталмоқчи бўлсам, юрагимда бир армон чуқур из қолдирган. Мен Германия деган юртнинг шарқий қисмида ҳарбий хизматда бурчимни ўтаб юрган пайтда, отам вафот этганлар. Узоқ мамлакатдан салкам бир ой деганда отам мозори бошига кела олганман.

Мен отамнинг эрка ўғли бўлганман. Отамдан эрта ажралиш ҳисси, сўнгги лаҳзаларда ёнларида бўлмаганим, тобутларини кўтармаганим армон бўлиб қолган.. Орадан анча вақт ўтгандан кейин ўғиллик бўлганимда, мана шу невараларни бир кўрсалар эди, деган аччиқ ўй уйғонганди юракда. Энди бу инсоний бир дард. Ана шунда ёзилган бу шеър.

Ота-онам ҳақида кўп шеърлар ёзганман. Фақат шу шеърим қўшиққа айланди. Бу шеърнинг қўшиқ бўлиши ҳам тасодиф. Таниқли қўшиқчи Азим Муллахонов машинада кетаётиб, аллақайси журнални варақлаб ўтирган-да, шу шеърни ўқиб варақни йиртиб олган-да, кейин ўша куниёқ куй басталаб, қўшиқ қилган (Хуршид Даврон билан суҳбатдан).

* *

Деразамнинг остида тонгда
Сайраган қуш сизмасми, ота?

Ё тўнимга кўклам, мозорда
Ёпишган гул сизмасми, ота?

Ўн йилдир-ки дунёда йўқсиз,
Юрагимда аламли чўғсиз.

Кўрмагансиз менинг ўғлимни,
Эркатойим, шўхим, тўқлимни.

Мен ҳам ёшим ошгани сайин
Бошимга оқ тушгани сайин

Баъзан қўмсаб сизни ич-ичдан,
Юрак титраб соғинч,илинждан,

Отам дея, алқаб ўғлимни,
Кўтараман ўзим кўнглимни.

1982