Kush jane “Daja” e “Tani”? I penduari Bengasi tregon detaje| ABC News Albania

Описание: Zbardhen detaje të reja në lidhje me dëshminë e bashkëpunëtorit të drejtësisë Alkond Bengasi. Ai ka dëshmuar para grupit hetimor se pranoi të modifikonte furgonët më të cilët u krye grabitja për arsye ekonomike.

Alkond Bengasi, pasi ka pranuar të flasë për grupin hetimor, ka dhënë detaje të rëndësishme lidhur me planin e Admir Murataj dhe Klemet Çalës për grabitjen e 9 prillit të ndodhur në Rinas.

34-vjeçari dëshmoi sesi ai u takua me të ndjerin Murataj te Shkëmbi i Kavajës, ndërsa iniciator ishin  vëllezërit që janë shpallur në kërkim Klement dhe Eldi Çala.

Prokuroria e krimeve të Rënda dyshon se, ai takim u bë edhe për faktin që Klement Cala ka lidhje gjaku me Alkond Bengasin, duke rritur edhe besimin te anëtarët e tjerë të grupit, teksa plani i grabitjes së fundit në Rinas ishte hartuar rreth 5 muaj më parë.

Sipas Bengasit i cili ka marrë statusin e dëshmitarit të mbrojtur të drejtësisë ai u përfshi në atë ngjarje vetëm për shkak të gjendjes së vështirë ekonomike që ndodhej.

“Duke qenë se unë punoja në një servis, ata më kërkuan t’i shoqëroja në Kavajë, ku do të merrnim një furgon. Fillimisht nuk pranova, sepse kam pasur fëmijën sëmurë dhe nuk doja të largohesha nga Elbasani. Por më pas pranova dhe shkuam të tre tek Shkëmbi i Kavajës. Aty na prisnin 3 persona për drekë. Një u prezantua si Admir Murataj, i cili ishte në shoqërinë e 2 personave nga Kosova. Një prej tyre e thërrisnin “Daja” ndërsa tjetrin “Tani. Pasi hëngrëm drekë, morëm furgonat ‘Chevrolet’, të cilët unë më pas i modifikova. Më vonë mësova se mjetet do të përdoreshin për grabitje”.

Policia arriti të identifikonte Alkond Bengasin pasi në furgonin me mbishkrimin  “Hetimi Tatimor” janë gjetur në pjesën e brendshme, shenjat e gishtave të tij. Bengasi është një ndër pesë personat e arrestuar deri më tani për grabitjen e Rinasit. Në atë ngjajre janë përshirë edhe një ish punonjës policie I shpallur në kërkim si edhe një femër, roli i së cilës është ende i paqartë.

Ndërkohë prokurori e Krimeve të Rënda ka administruar edhe një telefonatë mes kunatës së Klement Çalës dhe një tjetër familjareje të tij. Gratë kanë shprehur shqetësimin se personi që mund të ishte vrarë gjatë shkëmbimit të zjarrit me policinë mund të kishte qenë pikërisht Klementi por përgjigjja e ADN mbërritur nga Greqia saktësoi se viktimë ishte Admir Murataj./abcnews.al