Oğuzda Xocalı soyqırımının otuz dördüncü ildönümü ilə əlaqədar tədbir keçirilib

Описание: Oğuzda Xocalı soyqırımının otuz dördüncü ildönümü ilə əlaqədar tədbir keçirilib
Xocalı soyqırımının 34-cü ildönümü ilə əlaqədar Oğuz rayonunda anım tədbiri təşkil olunub.
İlk öncə 1992-ci il fevralın 26-da törədilmiş Xocalı soyqırımı qurbanlarının və Vətən uğrunda canlarını fəda etmiş bütün şəhidlərin əziz xatirəsi bir dəqiqəlik sükutla yad edilib. Daha sonra Xocalı faciəsini əks etdirən videoçarx nümayiş olunub.
Çıxış edənlər bildiriblər ki, Xocalıda dinc əhaliyə qarşı törədilmiş bu ağır cinayət insanlığa qarşı yönəlmiş ən dəhşətli faciələrdən biridir. Qeyd olunub ki, soyqırımı nəticəsində 613 nəfər qətlə yetirilib, 1275 nəfər əsir götürülüb, 487 nəfər yaralanıb, yüzlərlə ailə öz doğma yurd-yuvasından didərgin düşüb.
Vurğulanıb ki, Xocalı faciəsinə siyasi-hüquqi qiymət Ümummilli Lider Heydər Əliyev tərəfindən verilib, faciə qurbanlarının xatirəsinin əbədiləşdirilməsi və həqiqətlərin dünya ictimaiyyətinə çatdırılması istiqamətində mühüm addımlar atılıb. Bildirilib ki, bu gün də Azərbaycan dövləti tərəfindən Xocalı həqiqətlərinin beynəlxalq miqyasda tanıdılması istiqamətində məqsədyönlü və ardıcıl fəaliyyət həyata keçirilir.
Tədbirdə Qaçqınların və Məcburi Köçkünlərin İşləri üzrə Dövlət Komitəsinin Oğuz rayon şöbəsinin müdiri Yaqub Abbasov, YAP Oğuz rayon təşkilatının sədri Saleh Məhərrəmov, Oğuz Rayon İcra Hakimiyyəti yanında İctimai Şuranın sədri Günel Abdullayeva və Xocalı sakini çıxış edərək faciə qurbanlarının əziz xatirəsinin xalqımız tərəfindən daim ehtiramla yad olunduğunu bildiriblər.
Tədbirin sonunda qeyd olunub ki, Xocalı soyqırımı qurbanlarının xatirəsi heç vaxt unudulmayacaq, onların əziz xatirəsi daim uca tutulacaqdır.
#oguzrayonicrahakimiyyeti
#oguzda
#XocalıSoyqırımı
#XocalıyaƏdalət
#26Fevral1992