សង្ខេបព័ត៌មានអន្តរជាតិ ប្រចាំថ្ងៃអង្គារទី១៧ ខែមិថុនា ឆ្នាំ២០២៥

Описание: —-
១. អ៊ីស្រាអែលបានបើកការវាយប្រហារទៅលើស្ថានីយទូរទស្សន៍រដ្ឋរបស់អ៊ីរ៉ង់ កាលពីថ្ងៃចន្ទ ទី១៦ ខែមិថុនា ខណៈអ៊ីរ៉ង់បានអំពាវនាវឱ្យសហរដ្ឋអាមេរិកធ្វើយ៉ាងណាបង្ខំឱ្យអ៊ីស្រាអែលឈប់បាញ់ ក្នុងសង្គ្រាមផ្លូវអាកាសរយៈពេលបួនថ្ងៃមកនេះ។ ចំណែកឯប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិ បានលើកឡើងថា ការវាយប្រហាររបស់អ៊ីស្រាអែល បានធ្វើឱ្យខូចខាតយ៉ាងដំណំលើរោងចក្រចម្រាញ់សារធាតុអ៊ុយរ៉ាញ៉ូមដ៏ធំបំផុតរបស់អ៊ីរ៉ង់។ នៅល្ងាចថ្ងៃចន្ទ អ៊ីស្រាអែលបានអះអាងថាខ្លួនបានវាយប្រហារលើប្រព័ន្ធផ្សព្វផ្សាយរបស់រដ្ឋអ៊ីរ៉ង់ ដោយមានវីដេអូបានបង្ហាញថា អ្នកអានព័ត៌មានម្នាក់រត់ស្ទុះងើបចេញភ្លាមៗពីមុខកាមេរ៉ាទូរទស្សន៍ ខណៈពេលកំពុងផ្សាយផ្ទាល់ ក្រោយពីសំឡេងផ្ទុះរង្គើស្ថានីយផ្សាយបានឮឡើង។ កងទ័ពអ៊ីស្រាអែលបានបញ្ជាក់ថា អគារនៃប្រព័ន្ធផ្សព្វផ្សាយនេះ ត្រូវបានប្រើប្រាស់ជាមជ្ឈមណ្ឌលទំនាក់ទំនង របស់កងកម្លាំងប្រដាប់អាវុធអ៊ីរ៉ង់។
ប្រភព៖ CNA

២. រដ្ឋាភិបាលបានថៃ បានត្រៀមខ្លួនរួចរាល់ហើយ ក្នុងការជម្លៀសពលករថៃប្រមាណ ៤០,០០០នាក់ពីប្រទេសអ៊ីស្រាអែល ប្រសិនបើជម្លោះរវាងអ៊ីស្រាអែល និងអ៊ីរ៉ង់ កាន់តែរីករាលដាលខ្លាំង។ នេះបើយោងតាមការបញ្ជាក់របស់នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ នៅថ្ងៃអង្គារ ទី១៧ ខែមិថុនានេះ។ ថ្លែងទៅកាន់អ្នកសារព័ត៌មានក្រោយកិច្ចប្រជុំគណៈរដ្ឋមន្ត្រីប្រចាំសប្តាហ៍នារសៀលថ្ងៃអង្គារនេះ លោកស្រី ផែថងថាន កងទ័ពអាកាសភូមិន្ទថៃ បានត្រៀមយន្តហោះយោធាសម្រាបប្រតិបត្តិការជម្លៀសរួចរាល់ហើយ។
ការត្រៀមលក្ខណៈរបស់ថៃនាពេលនេះ គឺកើតឡើងបន្ទាប់ពីអ៊ីស្រាអែល និងអ៊ីរ៉ង បានផ្ទុះជម្លោះ នៅថ្ងៃទី១២ ខែមិថុនាកន្លងទៅ ដោយកងកម្លាំងអ៊ីស្រាអែលបានបើកការវាយប្រហារផ្លូវអាកាសទ្រង់ទ្រាយធំទៅលើហេដ្ឋារចនាសម្ព័ន្ធនុយក្លេអ៊ែរ និងមូលដ្ឋានយោធារបស់អ៊ីរ៉ង់។ ប្រតិបត្តិការនេះ ត្រូវបានគេរាយការណ៍ថា មានគោលបំណងកម្ទេចមជ្ឈមណ្ឌលចម្រាញ់សារធាតុសម្រាប់នុយក្លេអ៊ែរ ព្រមទាំងសម្លាប់ឧត្តមសេនីយ៍ជាន់ខ្ពស់ និងអ្នកវិទ្យាសាស្ត្រនុយក្លេអ៊ែរអ៊ីរ៉ង់ជាដើម។
ប្រភព៖ The Nation

៣. ក្រុមការងារពិសេសថ្មីមួយរបស់ថៃ ឬ Team Thailand ត្រូវបានបង្កើតឡើង នៅថ្ងៃអង្គារ ទី១៧ ខែមិថុនានេះ ដើម្បីដោះស្រាយភាពតានតឹងដែលកំពុងកើនឡើងតាមបណ្តោយព្រំដែន។ បើតាមសារព័ត៌មានថៃ ក្រុមការងារពិសេស ក៏នឹងឆ្លើយតបចំពោះការបង្ហោះសារនៅលើបណ្តាញសង្គម របស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែរ។ អនុរដ្ឋមន្ត្រីក្រសួងការពារជាតិថៃបញ្ជាក់ថាគោលបំណងចម្បងនៃក្រុមការងារពិសេសនេះ គឺដើម្បីគាំទ្រកិច្ចប្រជុំគណៈកម្មាធិការព្រំដែនតំបន់(RBC) ដែលគ្រោងធ្វើឡើង នៅចុងខែមិថុនានេះ ដោយមានគោលបំណងបន្ថយវត្តមានយោធានៅតាមបណ្តោយព្រំដែនរវាងថៃ និងកម្ពុជា។ ក្រុមការងារពិសេសក៏នឹងតាមដាន និងដោះស្រាយបញ្ហារយៈពេលវែងដែលទាក់ទងនឹងគណៈកម្មាធិការព្រំដែនចម្រុះថៃ-កម្ពុជា(JBC) និងករណីតុលាការយុត្តិធម៌អន្តរជាតិ(ICJ) ផងដែរ។
ប្រភព៖ The Nation

៤. មេបញ្ជាការកងកម្លាំងបូព៌ារបស់កងទ័ពថៃ(Burapa Task Force) បានហាមឃាត់ពលរដ្ឋថៃ មិនឱ្យឆ្លងកាត់ព្រំដែនចូលទៅបំរើការងារ នៅកន្លែងកម្សាន្ត និងកាស៊ីណូ ក្នុងក្រុងប៉ោយប៉ែតនៃប្រទេសកម្ពុជា។ បើតាមការសែតបាងកកប៉ុស្តិ៍ នៅថ្ងៃទី១៧ ខែមិថុនា ការហាមឃាត់នេះនឹងបន្តអនុវត្តរហូតដល់មានការជូនដំណឹងជាថ្មី។ បទបញ្ជានេះ ត្រូវបានធ្វើឡើងក្នុងគោលបំណងធានាសុវត្ថិភាពរបស់ប្រជាជនថៃ។ បើតាមកាសែតថៃដដែល បទបញ្ជានេះ បានចូលជាធរមាននៅម៉ោង ៨ព្រឹកថ្ងៃអង្គារ ទី១៧ ខែមិថុនា ហើយនឹងបន្តមានសុពលភាពរហូតដល់មេបញ្ជាការកងកម្លាំងបូព៌ា សម្រេចកែសម្រួលជាថ្មី ឬដកចេញ។ វិធានការហាមឃាត់ពលរដ្ឋថៃ មិនឱ្យឆ្លងកាត់ព្រំដែន ចូលកម្ពុជាដោយយោធាថៃ ក៏ស្របពេលដែលកម្ពុជាបានហាមឃាត់មិនឱ្យមានការនាំចូល ផ្លែឈើ និងបន្លែស្រស់ពីប្រទេសថៃ។
ប្រភព៖ Bangkok Post

៤. មេដឹកនាំពិភពលោក ដែលចូលរួមក្នុងកិច្ចប្រជុំកំពូល G7 នៅប្រទេសកាណាដា កាលពីថ្ងៃចន្ទ ទី១៦ មិថុនា បានជំរុញឱ្យប្រធានាធិបតីអាមេរិក លោក ដូណាល់ ត្រាំ បោះបង់ចោលសង្គ្រាមពាណិជ្ជកម្មដ៏តឹងរ៉ឹងរបស់លោក ដោយលើកហេតុផលថាបើសង្រ្គាមនេះ នៅតែបន្ត នោះនឹងមានហានិភ័យដល់ស្ថិរភាពសេដ្ឋកិច្ចពិភពលោក។ ប្រទេសភាគច្រើន ដែលបានចូលរួមក្នុងកិច្ចប្រជុំ G7 សុទ្ធតែទទួលរងអត្រាពន្ធមូលដ្ឋាន ១០ភាគរយដែលដាក់ដោយលោក ដូណាល់ ត្រាំ ខណៈដែលប្រទេសអឺរ៉ុប និងជប៉ុន រងអត្រាពន្ធបន្ថែមទៀតលើសពី ១០ភាគរយលើផលិតផលរថយន្ត ដែកថែប និងអាលុយមីញ៉ូម ដែលនាំទៅលក់នៅសហរដ្ឋអាមេរិក។ មេដឹកនាំ G7 ប្រើប្រាស់កិច្ចប្រជុំនេះ ក្នុងគោលដៅជួបជាមួយលោក ដូណាល់ ត្រាំ ទល់មុខគ្នា ដើម្បីបង្ហាញហេតុផលរបស់ពួកគេ ជំរុញឱ្យមេដឹកនាំអាមេរិករូបនេះ យល់ព្រមលើកិច្ចព្រមព្រៀង ដែលនឹងលុបបំបាត់ការគំរាមកំហែងពន្ធគយ។
ប្រភព៖ CNA