【Multi SUB】兒童學單車 | 合昌單車行 | 一日之內學識踩雙輪單車？🤔 | 堅毅小戰士Daniel 🚴‍♂️ 【大挑戰系列】

Описание: 【Multi SUB】兒童學單車 | 合昌單車行 | 一日之內學識踩雙輪單車？🤔 | 堅毅小戰士Daniel 🚴‍♂️ 【大挑戰系列】

日期：清明節假期
時間：10am-4pm
地點：合昌單車行 (柴灣怡順街1號)
開店時間：逢星期二休息；平日11am-8pm；星期六日及公眾假期10am-8pm
價錢：學單車$280/位；租單車$60/2小時

Daniel嘅同學家長介紹，柴灣有間單車店專教小朋友學踩單車，Daniel嘅同學都係幾個鐘就學識，所以趁清明節假期，爸爸帶Daniel慕名去拜師。

因為紅日，好多小朋友一早等開店學踩單車，計埋Daniel起碼有8個小朋友一齊學，老闆非常繁忙，所以建議平日去學比較好。雖然人多，但老闆仍然好有耐性咁教每個小朋友，唔好睇老闆外表cool cool地，但其實對小朋友好nice，唔明會講到明先俾小朋友去練習。

練習基本分3個階段：
1. 15分鐘4輪車熱身
2. 講解踩單車既原理，各位小朋友要排排坐聽老闆講解，呢部份需要小朋友專注同理解能力，同場有個3歲幾既小朋友就無辦法學。聽完就一人一架平衡車練習，要做到最少2次雙腳離地滑行8秒，拍片俾老闆睇，先可以去下一階段，呢部份平均要練40分鐘
3. 結合之前學的理論+平衡車的練習成果，實際運用喺踩雙輪單車上，直到成功踩到為止

Daniel對踩單車既領悟能力唔算好高，第2階段都用咗大約90分鐘先做到兩次平衡車8秒雙腳離地，但佢勝在夠堅毅，跌親擦損手都無喊過，練到攰休息一陣又自動波再練。

勉強過到第2階段，第3階段又花咗好長時間去學控制單車行直線，最大問題係Daniel唔習慣要不斷踩腳踏，架車無動力就好快失平衡。眨吓眼又練咗差唔多2個鐘，開始勉強踩到直線，但未識自己起步，爸爸見大家都攰，正想放棄還單車之際，突然，Daniel自己識得用右腳喺地上撐三下，然後起步踩，一開始仍未行得好穩，再試幾次後，越踩越穩定，爸爸真係感動到想喊，除咗不斷讚Daniel「叻仔！」外，都唔知可以講咩。

同單車店老闆匯報Daniel學識踩單車，老闆仲好好人咁俾咗支珍寶珠Daniel，以示讚賞，我想珍寶珠的甜都比不上苦練過後成功帶來的甜。希望Daniel今日除咗學識踩單車，也學識成功是要用刻苦換取的。

有時，小朋友的成長就係咁神奇，好似講極小朋友都唔明，當想放棄之際，小朋友好似突然開竅一樣，令你意想不到，只能說生命有自己成長的軌跡，急也急不來。


-------------------------------

章節：
0:00 出發去單車店
0:50 到達合昌單車行
1:19 教學Level 1 - 4輪車熱身
1:53 平衡車熱身
2:04 踩單車原理示範
2:41 教學Level 2 - 平衡車滑行8秒(成功2次)
4:07 教學Level 3 - 雙輪單車實戰
4:39 終於成功學識啦!!!!
5:11 總結
5:44 相片回顧

--------------------------------


音樂: Journey 01
音樂家: Xuxiao