MAHAL KITA - Astrild Lee Littérateur

Описание: #spokenwordpoetry
#tagalogspokenwordpoetry

MAHAL KITA
Isinulat at Isinatinig ni Astrild Lee Littérateur

Mahal kita.
Walang palamuti.
Walang sigaw.
Tahimik lang,
tulad ng pag-ibig na hindi humihingi ng kapalit.

Kahit limitado ang oras,
kahit ilang sandali lang ang usapan,
sapat na iyon para sumaya
ang isang pusong
matagal nang naghihintay
sa hindi naman ipinangako.

Kapag hindi kita kausap,
ikaw pa rin ang kausap ng isip ko.
Iniisip kung nasaan ka,
kung kumusta ka,
kung ligtas ka ba
sa mundong madalas
maging malupit
sa mga mababait.

Parang dasal kang
paulit-ulit binibigkas—
hindi para angkinin,
kundi para siguraduhing
maayos ka.

Hindi ako
humihiling ng buo.
Hindi ko hinihingi
ang puso mo.
Isang saglit lang sana—
isang segundo sa pagitan
ng dalawang paghinga mo—
na maalala mo rin ako.

Isang maliit na puwang,
isang pitak,
isang bakas
na hindi kailangang
pangalanan.

Pero malinaw sa akin
ang katotohanan.
Ako’y hindi
ang babaeng pipiliin.
Hindi ako ang uuwian
ng mga tanong mo sa gabi.

Isa lang akong
ordinaryong tao
na tunay na humahanga,
wagas na nagmamahal—
kahit walang katiyakan,
kahit walang patutunguhan.

Okay lang ako.
Tanggap ko ang lahat.
Dahil ang pagmamahal ko’y
hindi humihingi ng kapalit,
hindi humihingi ng karapatan.

Hindi ito galit
o tampo
kapag hindi napansin.
Hindi ito masasaktan
kapag hindi sinuklian.
Ito’y paninindigang manatili—
kahit sa malayo,
kahit sa tahimik.

Hindi man ako sapat.
Hindi man ako nararapat.
Ako at ang nararamdaman ko’y totoo pa rin.

At kung dumating ang araw
na tuluyan akong mawala
sa isip mo’t buhay,
tandaan mo lang na minsan
may nagmahal sa’yo
nang buong-buo—
kahit hindi kailanman
maaangkin.

Nandito lang ako.
Alam ko ang lugar ko.
Tanggap ang distansya.
Payapang mamumuhay
sa pagitan ng pag-asa
na walang pinanghahawakan…

Pagkat ika’y sadyang
minamahal ko.

Note: Ang background music ay 'di po akin. Ang kredito ang ibinibigay sa composer ng musika na "Your Love" na ginamit bilang background sa spoken word poetry video na "Mahal Kita."

Litrato ni: Astrild Lee Littérateur
Lokasyon ng Litrato: Surigao

Maraming salamat po.

© Astrild Lee Littérateur
Surigao Del Norte, Philippines