Китобга ошно талаба қиз "ҚОРАҚАЛПОҚНОМА" шеърини ифодали ўқиди

Описание: ҚОРАҚАЛПОҚНОМА

Қорақалпоқ эли мудом “Оқ йўл” сўзин – “Ҳақ йўл” дейди,
Ҳақ йўлида ҳақиқатга эришганлар ризқин ейди.
Яратганнинг ўзи қўллар тинчликсевар элимизни,
Эзгу ишга маҳкам боғлаб оға-ини белимизни!
Оққан дарё оққан мисол Орол денгизи ҳам тўлар,
Ўзбек-қорақалпоқ элин кўчасида байрам бўлар.
Қўнғиротнинг довруғини бугун аҳли жаҳон билар,
Алпомишнинг авлодлари ўғлонларга омад тилар.
Боболарим яхши билар Мўйноқ, Шуманай даштини,
Чўпон-чўлиқ бу заминда сурар ҳаётнинг гаштини.
Кегейли ва Қонликўлнинг ботирлари бўлган достон,
“Борса келмас” жойлари ҳам энди жаннатмакон бўстон!
Амударё саховатин боғларида кўринг мўл-кўл,
Меҳмонларга қучоқ очар дастурхони файзли Тўрткўл.
Берунийдек олим шунда таваллуд топган бир замон,
Илм излаб бола ҳолда интилгандир Урганч томон.
Бу заминда Абу Райҳон Берунийнинг руҳи шоддир,
Буюк аждодлар мероси ёшлар қалбида ҳам ёддир.
Ибройим Юсуп тилидан таралгандир алёрлари:
“Хаёлимда саҳар-саҳар эсар Жайхун шамоллари”.
Ўзбегимнинг учинчи бир дарёси бунда жўш урган,
«Қизминайим» қўшиғидек дунё қандай санъат кўрган?..
Неча йиллар асов Жайхун кўприк-эгарга кўнмади,
Сибир совуғи келмаса, тўлқини асло тўнгмади.
Қум соҳиллар қарор топмай, ўзгарарди ўзан йилда,
Йўловчини ўтказай деб самолёт турди соҳилда.
Таранг занжирга боғланган паром бориб-келар эди,
Минг йиллардан бери Жайхун шамоллари елар эди…
Истиқлол туфайли азим кўприк бунёд бўлди бунда,
Йўловчилар кутиб қолмас, ўтиш мумкин ҳатто тунда.
Гарчи Аму аввалгидек эмас энди асов, ўйноқ,
Балиқчилар шаҳри бўлмай қолди, афсус, энди Мўйноқ…
Соҳил кетди жуда олис, яъни соҳилнинг ўзи йўқ,
Оролимнинг кўкка боққан ул теран мовий кўзи йўқ…
Кўтарилса тузли қуюн гоҳ тик эсар, гоҳи ёнлаб,
Шўрхокларга саксовуллар қадалди милён-милёнлаб.
Орол бўйининг шоири эди кекса Бердақ оқин,
Айтди бунда ватан тутган эли – қорақалпоқ оҳин.
Тўлепберген Қайипберген “Қорақалпоқнома” тузди,
Роман-трилогия ёзиб, ҳатто ўзбеклардан ўзди.
Қўнғирот шаҳри воҳада катта саноат қалъаси,
Қорақалпоқнинг тенг ярми Устюрт – сувсиз дашт даласи.
Кўҳна тамаддун бешиги – очиқ музей Элликқалъа,
Тарихчилар ишхонаси қанчалаб минг йиллик қалъа.
Кенг далада яйраб юрар туялари, дўнон тойи,
Муҳаммад Юсуфдек шоир шеър ўқиган сўнгги жойи…
Ўтовини – бешик, ўзни чақалоққа қилган қиёс,
Саксон ёшга кирганда ҳам Ажиниёз – Ҳожиниёз.
Ватан бизга она эрур тирик чоғда, ўлганда ҳам:
Фироғида юрганда ҳам, қучоғида бўлганда ҳам.
Ватан эрур қора уй ҳам, кўшку қаср, тандир, ўчоқ,
Отанг топиб келган нону, онанг очган иссиқ қучоқ!
Қорақалпоқ узук бўлса, унинг гавҳар кўзи – Нукус,
Янги Ўзбекистонда у чирой очар бекаму кўст!

Тўлқин ЭШБЕК
2017 йил