ယနေ့ ( ၃ - ၃ - ၂၀၂၆ ) အတွက် မိုးလေဝသခန့်မှန်းချက်များ

Описание: ယနေ့ ( ၃ - ၃ - ၂၀၂၆ ) အတွက် မိုးလေဝသခန့်မှန်းချက်များ

▪ ပဲခူးနဲ့ ဧရာဝတီမှာ အပူရှိန်ပြင်းမယ်
▪ ရှမ်းပြည်အတွင်း စိုက်ပျိုးရေးနဲ့ လေထုညစ်ညမ်းမှုအခြေအနေ

လက်ရှိရာသီဥတုအခြေအနေအရ အာပျော့တဲ့လာနီညာဟာ ဆက်လက်ရှိနေဆဲဖြစ်ပြီး ဧပြီလအထိ ပုံမှန်ရာသီဥတုအခြေအနေကို ပြောင်းလဲဖို ရှိနေသလို အိန္ဒိယနီညိုကလည်း ကြားနေဖြစ်တဲ့ ပုံမှန်ရာသီဥတုအခြေအနေမှာ ဧပြီလအထိ ရှိနေဦးမှာ ဖြစ်ပါတယ်။
ဒီလို လာနီညာ အခြေအနေရှိနေတာကြောင့် မတ်လ ပထမအပတ်အတွင်းမှာ အပူချိန်လွန်ကဲစွာမြင့်တက်နိုင်ခြင်း ရှိမှာ မဟုတ်ဘူးလို့ မိုးလေဝသ ပညာရှင် ဦးဝင်းနိုင်က အသိပေးထားပါတယ်။
နွေဦးကာလကို အပြည့်အဝရောက်ရှိလာပြီဖြစ်တာကြောင့် နိုင်ငံတစ်ဝန်းမှာ အပူရှိန်တွေ သိသိသာသာ မြင့်တက်နေပြီဖြစ်ပါတယ်။
ဒီနေ့ရဲ့ အပူဆုံးဒေသတွေကတော့ မကွေးတိုင်း၊ ပဲခူးတိုင်း (အရှေ့ခြမ်းနဲ့ အနောက်ခြမ်း)၊ ဧရာဝတီတိုင်း၊ ကရင်ပြည်နဲ့ တနင်္သာရီတိုင်းတို့ဟာ အပူဆုံးဒေသတွေ ဖြစ်နေပါတယ်။
ပဲခူးတိုင်းနဲ့ ဧရာဝတီတိုင်း စစ်ကိုင်းတိုင်းအောက်ပိုင်းနဲ့ မန္တလေးတိုင်းတို့ဟာ မနေ့ကထက်စာရင်လည်း နေ့အပူချိန် ၂ ဒီဂရီလောက် ထပ်မံမြင့်တက်လာတာကို တွေ့ရပေမဲ့ ကချင်ပြည်၊ စစ်ကိုင်းတိုင်းအထက်ပိုင်း၊ ရှမ်းပြည်မြောက်ပိုင်းနဲ့ ရခိုင်ပြည်တို့မှာတော့ နေ့အပူချိန်က မနေ့ကထက်စာရင် အနည်းငယ် ပြန်လည်လျော့ကျသွားနိုင်တာကို တွေ့ရပါတယ်။
ပဲခူးတိုင်းနဲ့ ဧရာဝတီတိုင်းတို့ကတော့ အပြင်မှာတကယ်ခံစားရမယ့် အပူရှိန်ဟာ ၄၀ ဒီဂရီဆဲလ်စီးရပ်အထိ ရှိနိုင်မှာ ဖြစ်သလို မကွေးတိုင်းက အောင်လံနဲ့ သရက်၊ ဧရာဝတီတိုင်းက ပုသိမ်၊ ငပုတောနဲ့ လပွတ္တာမြို့နယ်တွေအပြင် တနင်္သာရီတိုင်းအတွင်းက တနင်္သာရီနဲ့ ပြည်ကြီးမဏ္ဍိုင်မြို့နယ်တွေမှာ အပူရှိန်အပြင်းဆုံး ခံစားရမှာဖြစ်ပါတယ်။
ဒါ့အပြင် နေပြည်တော်၊ ရန်ကုန်တိုင်းနဲ့ မွန်ပြည်က သထုံ၊ မော်လမြိုင်နဲ့ မုဒုံ မြို့နယ်တွေမှာလည်း ခံစားရမယ့်အပူချိန်က ၃၈ ဒီဂရီအထိ ရှိနေမှာဖြစ်ပြီး၊ မန္တလေး၊ စဉ့်ကူး၊ မတ္တရာ၊ မုံရွာ၊ ဆားလင်းကြီး၊ ချောင်းဦး၊ မြောင်၊ မြင်းမူ၊ ရခိုင်ပြည်က (ကျောက်တော်၊ ဘူးသီးတောင်၊ ရသေ့တောင်၊ မြောက်ဦး၊ အမ်း၊ မအီ) နဲ့ ချင်းပြည်က (ပလက်ဝနဲ့ စမီး) တို့မှာတော့ ခံစားရမယ့်အပူချိန် ၃၆ ဒီဂရီအထိ ရှိနိုင်တာကြောင့် ပူအိုက်နေမှာ ဖြစ်ပါတယ်။
ညအပူချိန်တွေမှာတော့ တောင်တန်းဒေသတွေမှာ အေးနေဦးမှာဖြစ်ပြီး ချင်းတောင်တန်းတွေမှာဆိုရင် ၆ ဒီဂရီဝန်းကျင်အထိ ခံစားရနိုင်ပြီး ရှမ်းပြည်တောင်ပိုင်းက ဟဲဟိုး၊ တောင်ကြီး၊ လွိုင်လင်နဲ့ နမ့်ဆန် တို့မှာတော့ ၈ ဒီဂရီအထိ ခံစားရနိုင်ပါတယ်။
ကရင်နီပြည်ရဲ့ လွိုင်ကော်နဲ့ ဒီမောဆိုမြို့နယ်တွေမှာတော့ ညဘက်ခံစားရမယ့်အပူချိန်က ၁၂ ဒီဂရီဝန်းကျင် ရှိနေမှာဖြစ်ပြီး ရှမ်းပြည်မြောက်ပိုင်းနဲ့ အရှေ့ပိုင်းတို့မှာလည်း အအေးဓာတ် ရှိနေဦးမှာဖြစ်ပါတယ်။
ဒါ့အပြင်မန္တလေးတိုင်းက ပြင်ဦးလွင်မှာ ၁၆ ဒီဂရီနဲ့ မိုးကုတ်မှာ ၁၄ ဒီဂရီဝန်း၊ မြစ်ကြီးနားနဲ့ ဗန်းမော်တို့မှာတော့ ၁၈ ဒီဂရီကနေ ၂၀ ဒီဂရီဝန်းကျင်အထိ ခံစားရနိုင်သလို။ ရန်ကုန်၊ ဧရာဝတီနဲ့ ကရင်ပြည်တို့မှာတော့ ညဘက်မှာ ၂၀ ဒီဂရီကနေ ၂၆ ဒီဂရီဝန်းကျင်အထိ ရှိနိုင်တာကြောင့် အအေးပေါ့နေမှာ ဖြစ်ပါတယ်။
ညအပူချိန်ထဲ ထူးခြားမှုအနေနဲ့တော့ တနင်္သာရီတိုင်းရဲ့ ကမ်းရိုးတန်းဒေသတွေမှာ ညဘက်မှာတောင် ၃၂ ဒီဂရီဝန်းကျင်အထိ အပူရှိန်ရှိနေနိုင်တာကြောင့် ညဘက်မှာပါ အတော်လေး အိုက်စပ်စပ် ဖြစ်နေနိုင်မှာဖြစ်ပါတယ်။

ရှမ်းပြည်နယ်ရဲ့ ဒေသအလိုက် မြေဆီလွှာအခြေအနေတွေမှာတော့ ရှမ်းပြည်နယ်တောင်ပိုင်းက တောင်ကြီးနဲ့ ဟဲဟိုးတစ်ဝိုက်မှာ မြေဆီလွှာအစိုဓာတ်ဟာ ၁၁ ရာခိုင်နှုန်းလောက်ပဲ ကျန်တော့တဲ့အပြင် ရေငွေ့ပျံနှုန်းဟာလည်း တစ်ရက်ကို ၅ မီလီမီတာကျော်အထိ မြင့်မားနေပါတယ်။
ညောင်ရွှေမြို့နယ်မှာဆိုရင် ရေငွေ့ပျံနှုန်းဟာ တိုင်းအတွင်း အမြင့်ဆုံးအဆင့် ၆ မီလီမီတာနီးပါးအထိ ရှိနေတာကြောင့် ရှမ်းတောင်ဒေသဟာ အစိုဓာတ် အနည်းဆုံးနဲ့ ရေဆုံးရှုံးမှု အများဆုံးဖြစ်နေပြီး အပင်တွေ ရေငတ်တဲ့ဒဏ် ကို ခံရနိုင်ပါတယ်။
ရှမ်းပြည်နယ်မြောက်ပိုင်း သီပေါ၊ လားရှိုးနဲ့ ကွတ်ခိုင်တို့မှာတော့ အစိုဓာတ် ၂၂ ရာခိုင်နှုန်းဝန်းကျင် ရှိနေသေးပေမဲ့ ရေငွေ့ပျံနှုန်း မြင့်မားတာကြောင့် အစိုဓာတ်တွေ အလျင်အမြန် လျော့ပါးသွားနိုင်ပါတယ်။
ရှမ်းပြည်နယ်အရှေ့ပိုင်း တာချီလိတ်၊ ကျိုင်းတုံနဲ့ မိုင်းယောင်းတို့မှာတော့ အစိုဓာတ် ၂၆ ရာခိုင်နှုန်းကနေ ၃၃ ရာခိုင်နှုန်းအထိ ရှိနေလို့ အခြေအနေ အကောင်းဆုံးဖြစ်ပေမဲ့ ရေငွေ့ပျံနှုန်း ၅ မီလီမီတာကျော် ရှိနေတာကြောင့် အရွက်တွေကနေ ရေဓာတ်ဆုံးရှုံးမှု များနိုင်တာကို သတိပြုရပါမယ်။
ဒီလို နေ့ခင်းဘက်တွေမှာ လေထုစိုထိုင်းဆ ၁၅ ရာခိုင်နှုန်းကနေ ၃၀ ရာခိုင်နှုန်းအတွင်းမှာပဲ ရှိပြီး လေထုက အလွန်ခြောက်သွေ့နေတာကြောင့် လိမ္မော်နဲ့ ဟင်းသီးဟင်းရွက် စိုက်တောင်သူတွေအနေနဲ့ "မွှားပင့်ကူနီ" ကျရောက်မှုကို အထူးသတိထားကြဖို့ လိုအပ်ပါတယ်။
ဒီလိုရာသီမျိုးမှာ မွှားပင့်ကူနီတွေဟာ မျိုးပွားနှုန်းများပြီး အရွက်အောက်မျက်နှာပြင်ကနေ သစ်ရည်ကို စုပ်စားပြီး အပေါ်မျက်နှာပြင်တွင် အဝါရောင် ခပ်မှိုင်းမှိုင်း အပြောက်များဖြစ်ကာ အရွက်များ တွန့်ကုပ် ခြောက်သွေ့သွားတတ်ပါတယ်။
ဒါကို ကာကွယ်ဖို့အတွက် ခြံအတွင်းက ပေါင်းပင်တွေ၊ အရွက်ကြွေတွေနဲ့ ကိုင်းခြောက်တွေကို ဖယ်ရှားရှင်းလင်းပေးဖို့နဲ့ လေဝင်လေထွက်ကောင်းအောင် မလိုအပ်တဲ့ ကိုင်းတွေ ရောဂါရကိုင်းတွေကို ဖြတ်တောက်ပေးဖို့ လိုပါတယ်။
ရှမ်းပြည်အတွင်း ရေငွေ့ပျံနှုန်း မြင့်မားနေတာကြောင့် ရေသွင်းတဲ့အခါမှာ နေ့လယ်ပိုင်း ရေလောင်းရင် အပင်က မရဘဲ လေထဲကို အငွေ့ပျံသွားနိုင်တာကြောင့် ညနေစောင်း ဒါမှမဟုတ် ညဘက်တွေမှာပဲ ရေသွင်းပေးသင့်ပါတယ်။
နောက်ဆုံးအနေနဲ့ ရှမ်းပြည်က ဒေသခံတွေအတွက် ကျန်းမာရေးနဲ့ ပတ်ဝန်းကျင်ဆိုင်ရာ သတိပေးချက်တစ်ခုကတော့ လက်ရှိ လားရှိုးနဲ့ တောင်ကြီးဒေသတွေမှာ လေထုညစ်ညမ်းမှုအညွှန်းကိန်း (AQI) ဟာ ၁၆၀ ကျော်အထိ မြင့်တက်နေတာကြောင့် စိုက်ခင်းအတွင်း အလုပ်လုပ်တဲ့အခါ အပြင်ထွက်တဲ့အခါ နှာခေါင်းစည်း (Mask) ကို မဖြစ်မနေ တပ်ဖို့လိုအပ်သလို အဆုတ်နဲ့ နှလုံးရောဂါအခံရှိသူတွေ အနေနဲ့ ပြင်ပမှာ ပြင်းပြင်းထန်ထန် လှုပ်ရှားတာမျိုးတွေကို ရှောင်ကြဉ်ကြဖို့ အသိပေးလိုပါတယ်ရှင်။

#psm_weather
#psm_myanmar
#psm_news