Елімізде қорғасынды онлайн құйып емдейтіндер пайда болды

Описание: Елімізде онлайн емшілер көбейді. Қазір әлеуметтік желіде «қорғасын құйып, жол ашамын» дейтіндер бар. Алдына барудың қажеті жоқ. Ақысын аударсаңыз болды – дертіңізді қашықтан анықтап, ем жасап береді. Тіпті «сиқыр бар», «лас зат бар» деп сендіріп, онлайн ұшықтайтындар да шыққан. Бұл шынымен шипа ма, әлде сенімге сауда ма? Ал мұндай әрекетке дін не дейді? Әріптесім анықтады.
Әлеуметтік желіні ашсаңыз болды «қашықтан емдеймін» деген жарнамадан көз сүрінеді.Тіпті тіл көзден сақтап, жолыңызды ашамын деп сендіреді. Тараздық емші Мирай Нұсқабаева бұл іспен 20 жылдан бері айналысып келеді екен. Бүгінде офлайн да, онлайн да ем жүргізеді. Сөзінше, алғашында туыстарын қашықтан емдеп көрген. Кейін ауыр науқастар хабарласыпты.
МИРАЙ НҰСҚАБАЕВА, емші:
Офлайн және онлайн ем жүргіземін. Нағыз емші екі жақтамай жүргізуі керек. Офлайн да онлайн да. Медицина біз бұл кісілерге ары қарай жәрдемдесе алмаймыз деген соң, маған олар хабарласты.
Емші онлайн тәсілдің де нәтижесі барын айтады. Алайда тұрғындардың бәрі бірдей бұған илана бермейді.
Дұрыс емес қой ол. Олардың лицензиясы бар ма, әлде дәрігер ме, кім біледі?
Менің атам да емші болған. Барлығы үйге келіп, емін сол үйде жасайтын.
Діни басқарма өкілдері қазақта қорғасын құю дәстүрі болғанын жоққа шығармайды. Бірақ интернет арқылы «жол ашу», «бойды тазалау» секілді әрекеттер шариғатқа сай емес дейді.
ЕЛБЕК ТАСБОЛАТҰЛЫ, ҚР Діни Басқармасы шариғат және пәтуа бөлімінің маманы:
Интернеттен көріп алып, «емдейміз», «сиқырды табамыз», «жол ашамыз» деген секілді қазақтың бар дәстүрін басқа бағытқа бұрып жіберген. Сондықтан қазақтың дәстүріндегі қорғасын құюмен қазіргі істеп жатқан бақсы-балгерлердің түсініксіз әрекеттерін шариғат құптамайды.
Этнографтар болса, қорғасын құю – ежелгі ғұрып дейді. Негізгі мақсаты – шошынған баланың қорқынышын басу болған.
ЖАНБОЛАТ ҚАЗАНБАЕВ, этнограф:
Көз тию мен суық тию ғой. Қалың киініп жүріп, сосын қамшымен дем салу арасында кейде жауырын қарау элементтері кездеседі. Ол қорғасын құйған кездегі құйылған қорғасынның бейнесін білдіреді. Содан қорқып, үркіп қалды деген тұжырымды білдіреді.
Әлеуметтік желіде онлайн қорғасын құю видеосы қызу талқыланып жатыр. Бірі – шипа дейді. Енді бірі – алаяқтыққа балайды. Қашықтан құйылған қорғасын ем бола ма? Әлде бұл сенімнің бағасын белгілеген жаңа бизнес пе? Ол жағы белгісіз.
#Информбюро #31арна #БастыЖаңалықтар #Новости #31канал