Serbia mbeti pa Botëror, Kostic kritikon ish-trajnerin Stojkovic: Humbja me Shqipërinë, më e rënda…

Описание: Serbia është praktikisht jashtë Kupës së Botës 2026, me Filip Kostic që flet hapur për një eliminim të sigurt “99.9%”. Mbrojtësi i majtë i Juventusit dhe i kombëtares serbe ka hedhur një kritikë të drejtpërdrejtë ndaj ish-trajnerit Dragan Stojkovic, i cili dha dorëheqjen pas humbjes vendimtare ndaj Shqipërisë në tetor, një ndeshje që, sipas tij, i ka kushtuar Serbisë shtrenjtë.

Sipas Kostic-it, kombëtarja do të kishte pasur më shumë shanse me trajnerin aktual, Veljko Paunoviç, i cili mori drejtimin pas largimit të Stojkovic-it. Në një prononcim për “Arena Sport” pas humbjes së fundit ndaj Anglisë, ai u shpreh:

Nëse do të kishim pasur këtë trajner dhe këtë punë paraprake më herët, besoj se do të kishim marrë një rezultat shumë më të mirë dhe do të kishim dalë të dytët. Humbja ndaj Shqipërisë është një nga më të rëndat në karrierën time. Të gjithë jemi të goditur, por duhet të ngrihemi dhe të ecim përpara.”

Kostic, i cili mbajti për herë të parë shiritin e kapitenit në ndeshjen ndaj Anglisë, e cilësoi këtë moment si një nder të madh:

“Është një ëndërr ta mbaj shiritin. Kjo më jep më shumë motivim. Luajtëm kundër një prej ekipeve më të mira në botë, patëm raste, por nuk i shfrytëzuam. Megjithatë treguam karakter dhe potencial, kombëtarja do të përmirësohet, kjo është e sigurt.”



Që Serbia të mbajë ende gjallë shpresat për një vend në Botëror, duhet të përmbushen të paktën tri nga këto katër kushte:

Rumania duhet të renditet në dy vendet e para të grupit të saj.
Suedia duhet të mbyllë grupin në një nga dy pozicionet e para.
Irlanda e Veriut duhet të renditet mes dy skuadrave kryesuese të grupit të saj.
Belgjika nuk duhet të jetë mes dy ekipeve të para të grupit.


Sidoqoftë, edhe vetë Kostiç e pranon se shanset janë minimale, duke përforcuar ndjesinë se eliminimi i Serbisë është tashmë pothuajse i pashmangshëm.