IL-MALTA RED CROSS B’KORS ONLINE TAL-EWWEL GĦAJNUNA

Описание: ONE.COM.MT • Għall-ewwel darba, il-Malta Red Cross nediet kors online dwar l-ewwel għajnuna, biex mill-kumdità ta’ djarhom, in-nies ikunu jistgħu jitgħallmu x’għandhom jagħmlu f’każijiet ta’ emerġenza.

KITBA: EMAN PORTELLI
FILMAT: MHSE

Waqt emerġenza, disgħin fil-mija tal-ħajjiet jiġu salvati minn persuni li m’għandhom l-ebda taħriġ mediku.

F’dan il-kuntest, u l-fatt li qed ngħixu fi żmien ta’ pandemija, il-Malta Red Cross nediet kors online dwar l-ewwel għajnuna, biex b’mod innovattiv twassal taħriġ fil-kumdita tad-djar tan-nies.

Id-Direttur tas-Soċjetà tas-Salib l-Aħmar Robert Brincau spjega li n-nuqqas ta’ tagħrif tal-ewwel l-għajnuna jista’ jwassal għal nuqqas ta’ azzjoni f’ċerti każijiet, li jista’ jwassal ukoll għal telf ta’ ħajjiet.

ROBERT BRINCAU
DIRETTUR MALTA RED CROSS
“PILLASTRU FIL-FIRST AID HUWA LI TGĦIN KEMM JISTA’ JKUN TGĦIN LILL-PAZJENT FUQ BARRA, TIPPROVA TISTABILIZZAH BIEX MA JKOMPLIEX JIDDETERJORA U MIN AFFARIJIET ŻGĦAR, TIBDA MIT-TELEFONATA TAL-112, TIBDA TAGĦTI L-INFORMAZZJONI U TGĦID L-GĦAJNUNA LI GĦANDEK BŻONN"

It-taħriġ jinkludi struzzjonijiet faċli u huwa aċċessibli għal dawk li m’għandhom l-ebda sfond mediku, u jittratta sitwazzjonijiet bħal attakki tal-qalb, ħruq u ksur.

Fil-bini tas-Soċjetà tas-Salib l-Aħmar f’Pembroke, il-Ministru għall-Intern, is-Sigurtà Nazzjonali u l-Infurzar tal-Liġi Byron Camilleri qal li minkejja l-imxija tal-coronavirus, din l-għaqda xorta qed tagħti s-servizzi tagħha lin-nies.

BYRON CAMILLERI
MINISTRU
“BĦALA MINISTERU TAL-INTERN QED NAĦDMU ID F’ID MAGĦHOM FUQ DIVERSI PROĠETTI SABIEX INSALVAW IL-ĦAJJIET TAN-NIES U BIEX NAGĦMLU L-ĦAJJIET TAN-NIES GĦALL-AĦJAR”

Aktar dettalji dwar dan il-kors jistgħu jinkisbu minn fuq is-sit www.redcross.org.mt.